ཆོས་རྗེ་ནམ་མཁའ་དཔལ་བཟང་པོ་
ཆོས་རྗེ་ནམ་མཁའ་དཔལ་བཟང་པོ།
[རྩོམ་སྒྲིག]སྟག་ལུང་ཆོས་རྗེ་ནམ་མཁའ་དཔལ་བཟང་མཆོག་ནི་ཡབ་ཡོན་བདག་ཡེ་ཤེས་རིན་ཆེན་དང་ཡུམ་ཕྱུག་མོ་དཔལ་ལེའི་སྲས་སུ་རབ་བྱུང་དྲུག་པའི་ཆུ་བྱ（༡༣༣༣）ལོར་འཕན་པོ་དར་ཡུལ་དུ་སྐུ་འཁྲུངས། དགུང་ལོ་ལྔ་ཙམ་ལ་ཕེབས་སྐབས་གཞན་སྡུག་བསྔལ་བ་གཟིགས་ཚེ་སྙིང་རྗེ་ཆེན་པོ་འཁྲུངས་ནས་སྤྱན་ཆབ་ཕྱུང་བའི་བག་ཆགས་བཟང་པོ་རང་བཞིན་དུ་གསལ། དགུང་ལོ་བདུན་ལ་ཕེབས་སྐབས་མཁན་པོ་བླ་མ་ནམ་ལེགས་པ་དང་། སློབ་དཔོན་དོན་ཡོད་པ་ལས་རབ་ཏུ་བྱུང་། མཚན་ནམ་མཁའ་རྒྱལ་མཚན་དཔལ་བཟང་པོ་ཞེས་གསོལ། དགུང་ལོ་བརྒྱད་པ་ལ་མངོན་ཤེས་འཁྲུངས། དགུང་ལོ་བཅུ་པ་ལ《རྟགས་ཀྱི་ཊཱིཀྐ》མཆན་ལ་སོགས་པ་གསན་པས་སྦྱོར་དྲུག་ལས་བྱུང་བའི་རྟགས་རྣམས་མ་བསྒོམས་པ་མངོན་དུ་གྱུར། དགུང་ལོ་བཅུ་གཅིག་པ་ལ་སྐུ་སྐྱེ་སྔ་མ་གང་དུ་འཁྲུངས་པ་ལྷང་ལྷང་དྲན་སྣང་བསྐྱེད། དུས་ཕྱིས་ཏིང་ངེ་འཛིན་ལ་བཞུགས་པ་ན་འདས་མ་འོངས་རྣམས་ཀྱང་མཁྱེན། དགུང་ལོ་བཅོ་བརྒྱད་ལ་ཆོས་རྗེ་བླ་མ་དང་། ལོ་ཆེན་བྱང་རྩེ་དུས་འཁོར། སྤྱོད་འཇུག་ཐུབ་པའི་དགོངས་རྒྱན་སོགས་གསན་པས་ཚར་རེ་ལ་ཐུགས་སུ་ཆུད། དགུང་ལོ་ཉི་ཤུ་རྩ་བདུན་ལ་ལྷ་སར་ཕེབས་ནས་ཏོ་སྟན་མཁན་ཆེན་བཀྲས་ཚུལ་བ། ལས་སློབ་ཚུལ་བླ་མ། སློབ་དཔོན་སྟོན་རྒྱལ་རྣམས་ལས་བསྙེན་པར་རྫོགས། དགུང་ལོ་ཉི་ཤུ་རྩ་དགུའི་བར་དུ་དབྱར་ཆོས་དགུན་ཆོས་མ་ཆག་པར་དུས་འཁོར། བརྟག་གཉིས་སྤྱོད་འཇུག ཐུབ་པའི་དགོངས་རྒྱན། སྐྱེས་རབས་ལམ་འབྲས་གསུངས། དགུང་ལོ་ཉི་ཤུ་རྩ་དགུ་པ་ལྕགས་གླང（༡༣༦༡）ལོར་སྟག་ལུང་གི་གདན་སར་ཕེབས་ནས་ལོ་བཅོ་ལྔའི་རིང་ཚོགས་པ་བསྐྱངས། སྦྱོར་དྲུག་གི་ཁྲིད་ཡིག་ངོ་སྤྲོད། རྩིས་ཡིག་ལ་སོགས་པའི་བསྟན་བཅོས་མང་པོ་མཛད། ཟབ་མོའི་གདམས་པས་ཀྱང་གདུལ་བྱ་རྣམས་ལེགས་པར་བསྐྱངས། གཙོ་བོར་སྐུ་མཚམས་ཁོ་ན་ལ་བཞུགས། དགུང་ལོ་བཞི་བཅུ་ཞེ་གསུམ་བར་གདན་སར་བཞུགས་རིང་དགེ་འདུན་གྱི་སྡེ་འཕེལ་ཞིང་དར་རྒྱས་ཆེན་པོ་བྱུང་། དེ་ནས་རིན་པོ་ཆེ་བཀྲ་ཤིས་དཔལ་བརྩེགས་པ་གདན་སར་བཞུགས་སུ་གསོལ་ནས་སེ་གླེར་ལོ་བཞི་བཞུགས། བསྐྱེད་པའི་རིམ་པ་བདེ་མཆོག་དང་གཤེད་དམར་ལ་མཛད། རྫོགས་རིམ་སྦྱོར་བ་ཡན་ལག་དྲུག་པ་ལ་མཛད། རྗེ་འདི་ཉིད་སྒྲ་ཚད་དུས་འཁོར་རྣམས་ལ་མཁས་ཤིང་། དུས་འཁོར། ཀ་ཙན། སྙན་ངག སྡེབ་སྦྱོར་སོགས་ལ་བཤད་པ་མང་དུ་མཛད། དེའི་བཤད་རྒྱུན་དབུས་སུ་ཆེས་ཆེར་དར། ལོ་ཆེན་བྱང་ཆུབ་རྩེ་མོའི་ཕྱག་ཕྱི་མཛད་ནས་ཀ་ལཱ་འགྲེལ་པ་སློབ་ཕན་རྩེ་མོའི་ཕྱག་ཕྱི་མཛད་ནས་ཀ་ལཱ་པའི་འགྲེལ་པ་སློབ་ཕན་ཡོངས་སུ་རྫོགས་པར་འགྱུར་བ་ལ་སོགས་པའི་ཕྱག་རྗེས་ཀྱང་ཤིན་ཏུ་ཆེ། རྗེ་ཉིད་དགུང་ལོ་སོ་དགུ་བཞེས་སྐབས་གསུངས་པ་ཇི་བཞིན་དགུང་ལོ་ཞེ་བདུན་བཞེས་པ་རབ་བྱུང་དྲུག་པའི་ས་ལུག（༡༣༧༩）ལོར་་དགོངས་པ་ཆོས་དབྱིངས་སུ་ཐིམ།