ཆོས་རྗེ་ཀུན་དགའ་རྒྱལ་མཚན་
ཆོས་རྗེ་ཀུན་དགའ་རྒྱལ་མཚན།
[རྩོམ་སྒྲིག]རྗེ་འདི་ཉིད་མོན་མཐའ་ཡུལ་སྟན་ཆར་ཞེས་པར་མ་སངས་ཨར་པ་སྤུན་བརྒྱད་ཀྱི་རིགས་སུ་རབ་བྱུང་བརྒྱད་པའི་མེ་སྦྲུལ（༡༤༩༧）ལོར་འཁྲུངས། ཆུང་ངུའི་དུས་སྐྱེ་བ་སྔོན་མའི་བག་ཆགས་གསལ་བར་གསུངས། དགུང་ལོ་བཅུ་བཞི་པ་ལ་དབུས་སུ་བྱོན་ནས་སྤྱན་སྔ་ཆོས་གྲགས་པའི་དྲུང་དུ་རབ་ཏུ་བྱུང་། ཀུན་དགའ་རྒྱལ་མཚན་ཞེས་པའི་མཚན་གསོལ། སྔ་རྗེས་སུ་ཆགས་ལོ་རིན་ཆེན་ཆོས་རྒྱལ། འབུམ་རལ་པ་རིན་ཆེན་ཆོས་དབང་། ལོ་ཆེན་ཆོས་སྐྱོང་བཟང་པོ། སྤྲུལ་སྐུ་རྡོ་རྗེ་སེང་གེ གཡུལ་རྒྱལ་བ་ཆོས་ཀྱི་ཤེས་རབ། ཀུན་བཟང་གླིང་པ་ཆོས་ཀྱི་དཔལ་བ་སོགས་བཤེས་གཉེན་དུ་མ་ལས་མདོ་སྔགས་ཐ་སྙད་དང་བཅས་པའི་ཟབ་ཆོས་གསན་སྦྱོང་གིས་ཆུབ་པར་གྱུར། གཡུལ་རྒྱལ་ཆོས་རྗེས་བཀྲ་ཤིས་དགེ་འཕེལ་དང་། ཉི་ལྡེའི་གདན་སར་མངའ་གསོལ། ཕྱིས་ལྷུན་གྲུབ་ཆོས་སྡེ་ཡང་བསྐྱངས། དེ་ནས་གྲུབ་ཆེན་ཀུན་བཟང་རྡོ་རྗེ་ལས་གསང་བ་བླ་ན་མེད་པའི་དབང་ཁྲིད་མན་ངག་དང་བཅས་གསན་ཏེ་ཉམས་ལེན་ནན་ཏན་མཛད་པས་ཉམས་རྟོགས་ཕུན་སུམ་ཚོགས་པ་འཁྲུངས། གདུལ་བྱ་རྣམས་ལ་སོ་སོའི་མོས་བློ་དང་འཚམས་པར་རྒྱལ་བའི་བཀའ་འགྱུར་རོ་ཅོག་གིས་མཚོན་དམ་པའི་ཆོས་ཀྱི་སྒོ་ཐམས་ཅད་བསྟན་པས་བུ་སློབ་ཀྱང་འབྲི་གུང་པ་རིན་ཆེན་ཕུན་ཚོགས་ཡབ་སྲས། ཆོས་ལུང་མཁན་པོ་ཀུན་བློ། སྐྱེད་ཚལ་བ་ཤེས་རབ་རྒྱལ་མཚན་སོགས་ཆེ་བཙུན་མཁས་པའི་བཤེས་གཉེན་མཐའ་ཡས་པ་དང་། སྤྲུལ་སྐུ་སྣ་ཚོགས་རང་འགྲོལ་དང་རྫོགས་ཆེན་པ་བསོད་ནམས་རིན་ཆེན་སོགས་སྙིང་པོའི་བསྟན་འཛིན་དུ་མ་བྱུང་། སྐུ་ཚེའི་སྨད་ལ་གནས་ནང་དང་ཡངས་པ་ཅན་གྱི་གདན་ས་མཛད་པ་མཚོན་གཞན་ཕན་འགྲོ་དོན་ཆེར་བསྐྱངས་ནས་དགུང་ལོ་བདུན་ཅུ་དོན་གཉིས་ལ་ཕེབས་པ་རབ་བྱུང་བཅུ་པའི་ས་འབྲུག（༡༥༦༨）ལོར་འདས།