ཆོས་རྒྱལ་མེས་དབོན་རྣམ་གསུམ་

ཆོས་རྒྱལ་མེས་དབོན་རྣམ་གསུམ།

འདི་ལ་དྲངས་ཚུལ་འདྲ་མིན་གཉིས་ལས། གཅིག་ནི། ལྷ་ཐོ་ཐོ་རི་སྙན་ཤལ། སྲོང་བཙན་སྒམ་པོ། ཁྲི་སྲོང་ལྡེ་བཙན་གསུམ་དུ་བྱས་པ་དང་། གཞན་ཞིག་ནི་སྲོང་བཙན། ཁྲི་སྲོང་། ཁྲི་རལ་པ་ཅན་གསུམ་ལ་ངོས་འཛིན་པ་ཡིན། འདྲེན་ཚུལ་དང་པོ་དེ་ནི། ལྷ་ཐོ་ཐོ་རི་སྙན་ཤལ་གྱི་དུས་སུ་ཆོས་ཀྱི་དབུ་བརྙེས། སྲོང་བཙན་གྱི་དུས་སུ་སྲོལ་བཏད། ཁྲི་སྲོང་གི་དུས་སུ་དར་ཞིང་རྒྱས་པར་མཛད་ཅེས་པའི་ཐ་སྙད་སྦྱར་སྲོལ་ལྟར་དང་། འདྲེན་ཚུལ་གཉིས་པ་དེ་ནི། སྤྱན་རས་གཟིགས་ཀྱི་སྤྲུལ་པ་སྲོང་བཙན། འཇམ་དབྱངས་ཀྱི་སྤྲུལ་པ་ཁྲི་སྲོང་ལྡེ་བཙན། ཕྱག་ན་རྡོ་རྗེའི་སྤྲུལ་པ་ཁྲི་རལ་པ་ཅན་ཞེས་རིགས་གསུམ་མགོན་པོའི་སྤྲུལ་པའི་རྒྱལ་པོ་གསུམ་ཟེར་བའི་ཐ་སྙད་སྦྱར་སྲོལ་ལྟར་ཡིན།