ཆོས་འཆད་པའི་སྐབས་ཀྱི་ཉེས་བྱས་སྡེ་ཚན་ཉེར་དྲུག་

ཆོས་འཆད་པའི་སྐབས་ཀྱི་ཉེས་བྱས་སྡེ་ཚན་ཉེར་དྲུག

མི་ན་བར་འདུག་པ་ལ་འགྲེང་སྟེ་བཤད་པ། ཉལ་བ་ལ་འདུག་སྟེ་སྟོན་པ། སྟན་མཐོན་པོ་དང་བཟང་པོར་འདུག་པ་ལ་དམའ་བ་དང་ངན་པར་འདུག་སྟེ་བཤད་པ། མདུན་ནས་འགྲོ་བ་ལ་རྒྱབ་ནས་སྟོན་པ། ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་སྟོན་པ། མགོ་གཡོག་པ་དང་། གོས་བརྫེས་པ་དང་། ཆོས་གོས་ཕྲག་པ་གཉིས་ཀར་གཟར་བ་དང་། ལག་པ་གཉའ་གོང་དུ་བསྣོལ་བ་དང་། ལྟག་པར་བསྣོལ་བ་དང་། དོ་ཀེར་ཅན（མགོ་སྐྲ་གཙུག་ཏོར་ལྟར་བཅིངས）དང་། ཞྭ་གྱོན་པ་དང་། ཅོད་པན་ཅན་དང་། མགོ་ལ་ཕྲེང་བ་བཅིངས་པ་དང་། མགོ་ཐོད་ཀྱིས་དཀྲིས་པ་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། འདོ་ལེ་སོགས་ཁྱོགས་ལ་འདུག་པ། བཞོན་པའི་སྟེང་ན་འདུག་པ། མཆིལ་ལྷམ་གྱིན་པ་དང་། ལག་ན་འཁར་བ་ཐོགས་པ་དང་། གདུགས་ཐོགས་པ་དང་། མཚོན་ཐོགས་པ་དང་། རལ་གྲི་ཐོགས་པ་དང་། དགྲ་སྟ་ཐོགས་པ་དང་། གོ་ཆ་གྱོན་པ་ལ་ཆོས་བཤད་པའོ། །