ཆོས་གྲྭའི་སློབ་དཔོན་

ཆོས་གྲྭའི་སློབ་དཔོན།

ཆོས་སློབ་སློབ་གྲྭའི་སློབ་དཔོན་རྒྱལ་པོ་སྲོང་བཙན་སྒམ་པོའི་སྐབས་ཆོས་ཀྱི་སློབ་གྲྭའི་སློབ་དཔོན་དང་ལོ་ཙཱ་བ་གཅིག་ལྕོགས་ལྟ་བུ་ནི་ཐོན་མི་སམ་བྷོ་ཊ་ཡིན་པ་ལས་གཞན་དག་ཡོད་པའི་གནས་ཚུལ་ལོ་རྒྱུས་ཁག་ཏུ་མི་གསལ་ཞིང་། རྒྱལ་པོ་ཁྲི་སྲོང་ལྡེ་བཙན་སྐབས་བསམ་ཡས་སུ་ཆོས་ཀྱི་གྲྭ་ཐོག་མར་བཙུགས་ཏེ་དེར་སློབ་གྲྭ་བ་མི་གྲངས་ཉི་ཤུ་རྩ་ལྔ་དང་། ཆོས་སློབ་སློབ་དཔོན་བཅུ་གསུམ་ཡོད་པ་དང་། དེ་རྣམས་ལ་ཟླ་བ་རེར་ཕོགས་ཇི་ཙམ་ཡོད་པའི་སྐོར་བཅས་རྒྱལ་པོ་ཁྲི་སྲོང་ལྡེ་བཙན་གྱི་ལོ་རྒྱུས་སྐབས་སུ་གསལ་བས་འདིར་མ་སྨྲོས།