ཆོས་ཀྱི་སྐུ་

ཆོས་ཀྱི་སྐུ་ནི་སངས་རྒྱས་ཀྱི་སྐུ་གསུམ་གྱི་ནང་གསེས་ཤིག་སྟེ། དོན་དམ་པའི་བདེན་པའི་ངོ་བོ་ཆོས་ཀྱི་དབྱིངས་དང་གཉིས་སུ་མེད་པའི་རང་བྱུང་གི་ཡེ་ཤེས་ཉིད་ཡིན་ནོ། །"སངས་རྒྱས་ཀྱི་ཐུགས་རྒྱུད་ཀྱི་དབྱིངས་རང་བཞིན་གྱིས་རྣམ་པར་དག་པ་ལ་གློ་བུར་གྱི་དྲི་མ་མཐའ་དག་དང་བྲལ་བའི་ཆོས་ཀྱི་སྐུ་ནི་སངས་རྒྱས་དཀོན་མཆོག་ཡིན་པར་མ་ཟད་ཆོས་དཀོན་མཆོག་ཀྱང་ཡིན།" ཞེས་གསུངས་སོ། །

སྒྲ་བཤད།

ཆོས་ཞེས་པ་ནི་ཆོས་ཉིད་དམ་ཆོས་ཀྱི་དབྱིངས་ལ་གོ་ལ། སྐུ་ཞེས་པ་ནི་ཕུང་པོ་ལ་གོ་བ་མ་ཡིན་གྱི་ཡེ་ཤེས་ཀྱི་ཚོགས་ཀྱི་ཆ་ནས་སྐུ་ཞེས་བྱ་སྟེ། ཆོས་དང་སྐུ་གཉིས་དབྱེར་མེད་པར་གནས་པ་ལ་ཆོས་ཀྱི་སྐུ་ཞེས་བྱ་བ་ཡིན། །"ཆོས་ཀྱི་སྐུ་ཞེས་པའི་ཚིག་གི་ནུས་པ་གཅིག་གིས་ཆོས་དཀོན་མཆོག་ཡང་བསྟན་སྟེ། གང་ཆགས་པ་དང་བྲལ་བའི་འགོག་བདེན་ནི་ཆོས་དཀོན་མཆོག་གི་མཐར་ཐུག་ཡིན་ལ། གནས་སྐབས་ལམ་གྱི་བདེན་པ་རྣམས་ནི་སྲས་བྱང་སེམས་ཀྱི་རྒྱུད་ལ་ལྡན་པའི་ཕྱིར།" ཞེས་གསུངས་སོ། །

ནང་དོན།

དོན་དམ་པའི་སྐུ། ཆོས་ཀྱི་སྐུ་ནི་སངས་རྒྱས་ཀྱི་ཡེ་ཤེས་ཀྱི་སྐུ་སྟེ། སྤྲོས་པ་ཐམས་ཅད་ལས་འདས་ཤིང་སྐྱེ་འགག་གི་མཚན་ཉིད་དང་བྲལ་བ། ཆོས་ཀྱི་དབྱིངས་དང་ཡེ་ཤེས་གཉིས་སུ་མེད་པར་གནས་པ་ཞིག་ཡིན། "དབྱིངས་རང་བཞིན་གྱིས་རྣམ་པར་དག་པ་ལ་དྲི་མ་མཐའ་དག་དང་བྲལ་བའི་ཆོས་ཀྱི་སྐུ་ནི་ཆོས་དཀོན་མཆོག་སྟེ། དེ་གང་ལ་མངའ་བ་ནི་བདེ་བར་གཤེགས་པའོ། །"ཞེས་གསུངས་པ་ལྟར་མངོན་པར་རྟོགས་པ་བརྒྱད་ཀྱི་ཐ་མ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་པའི་འབྲས་བུ་མཐར་ཐུག་པ་ཡིན་ནོ། །

ངོ་བོ།

ཆོས་ཀྱི་དབྱིངས་དང་གཉིས་སུ་མེད་པ། "གློ་བུར་བའི་སྒྲིབ་པ་མ་རིག་པའི་ཐིབ་པོ་མ་ལུས་པ་བཅོམ་ནས་ཆོས་ཀྱི་དབྱིངས་དང་གཉིས་སུ་མེད་པ་རང་བྱུང་གི་ཡེ་ཤེས་ཉིད་ཐོབ་སྟེ་སངས་རྒྱས་པར་འགྱུར་རོ། །"ཞེས་གསུངས་པ་ལྟར། ཆོས་ཀྱི་སྐུ་ནི་རང་བྱུང་གི་ཡེ་ཤེས་ཆོས་ཀྱི་དབྱིངས་དང་གཉིས་སུ་མེད་པར་གྲུབ་པ་ཡིན་ནོ། །

ཐོབ་ཚུལ།

སྐད་ཅིག་མ་གཅིག་ལ་མངོན་པར་བྱང་ཆུབ་པ། "སྐད་ཅིག་མ་གཅིག་ལ་མངོན་པར་བྱང་ཆུབ་པ་ཤིན་ཏུ་བསྒོམས་པས་སྐད་ཅིག་མ་གཉིས་པ་ལ་ཆོས་ཀྱི་སྐུར་མངོན་པར་བྱང་ཆུབ་པ་ཡིན་ནོ་ཞེས་བསྟན་པའི་ཕྱིར།" ཞེས་གསུངས་པ་ལྟར། སྐད་ཅིག་མ་གཅིག་གི་སྦྱོར་བ་རྫོགས་ནས་ཆོས་ཀྱི་སྐུར་འཚང་རྒྱ་བར་འགྱུར་རོ། །

མཛད་པ།

"འགྲོ་བ་ཀུན་གྱི་ཉོན་མོངས་པ་དང་སྡུག་བསྔལ་གྱི་ནད་རྣམས་གསོ་བར་མཛད་པ་སྨན་པའི་མཆོག་ཏུ་འགྱུར་རོ། །"ཞེས་གསུངས་པ་ལྟར། ཆོས་ཀྱི་སྐུ་ཐོབ་པའི་སངས་རྒྱས་ཀྱིས་སེམས་ཅན་ཐམས་ཅད་ཀྱི་ཉོན་མོངས་པ་དང་སྡུག་བསྔལ་སེལ་བའི་མཛད་པ་མཛད་དོ། །

དབྱེ་བ།

རྒྱུད་བླ་མ་ལས། "ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་པ། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །"ཞེས་གསུངས་པ་ལྟར།

དག་པ་གཉིས་ལྡན་གྱི་ངོ་བོ་ཉིད་སྐུ་ལ།

"སངས་རྒྱས་ཀྱི་སའི་དབྱིངས་རང་བཞིན་གྱིས་རྣམ་པར་དག་པ་བདེན་གྲུབ་ཀྱི་མཚན་མ་ཐམས་ཅད་དང་བྲལ་བ་ནི་རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུ་དང་" ཞེས་རང་བཞིན་རྣམ་དག་དང་།
"དགག་བྱ་གློ་བུར་གྱི་དྲི་མ་སྒྲིབ་གཉིས་ཕྲ་མོ་དང་བྲལ་བ་ནི་གློ་བུར་དྲི་བྲལ་གྱི་ཆར་གྱུར་པའི་ངོ་བོ་ཉིད་སྐུ་ཡིན་ལ།" ཞེས་གློ་བུར་དྲི་བྲལ་ཏེ་ངོ་བོ་ཉིད་སྐུ་དང་།

ཡེ་ཤེས་ཆོས་སྐུ།

"སངས་རྒྱས་ཀྱི་ཐུགས་རྒྱུད་ཀྱི་བྱང་ཕྱོགས་སོ་བདུན་ནས་རྣམ་མཁྱེན་བར་གྱི་སྡེ་ཚན་ཉེར་གཅིག་གི་ཡོན་ཏན་རྣམས་ནི་ཡེ་ཤེས་ཆོས་སྐུ་སྟེ། བསྡུ་ན་ཡེ་ཤེས་ལྔའམ་ཇི་ལྟ་ཇི་སྙེད་མཁྱེན་པའི་ཡེ་ཤེས་གཉིས་ཏེ་"ཞེས་ཡེ་ཤེས་ཆོས་སྐུ་བསྟན་ཏོ། །

འགོག་ལམ་གཉིས་ཀྱི་ཆོས་དཀོན་མཆོག

"དེ་ལྟ་བུའི་མཁྱེན་པའི་ཡེ་ཤེས་རྣམས་ནི་གང་གིས་འདོད་ཆགས་དང་བྲལ་བྱེད་ལམ་གྱི་བདེན་པའི་རིགས་སུ་གནས་པ་ཡིན་ལ། དེ་ལྟ་བུའི་འགོག་ལམ་གཉིས་ནི་ཆོས་དཀོན་མཆོག་སྟེ། རྒྱུད་བླ་མར། གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་ཏེ་ཆོས། །"ཞེས་གསུངས།

"དེའི་ཕྱི་མ་ནི་གང་ཞིག་འདོད་ཆགས་དང་བྲལ་བ་འགོག་པའི་བདེན་པ་ཡིན།"ཞེས་གསུངས་སོ། །

རྩོད་སྤོང་།

"རྒྱ་དཔེ་ལྟར་ན། བདེ་གཤེགས་སྲས་བཅས་ཆོས་ཀྱི་སྐུ་མངའ་ཞེས་འབྱུང་ལ་དེ་ནི་ཚིགས་སུ་བཅད་པ་སྦྱར་བའི་ངོར་བྱས་པ་དང་བྱང་སེམས་ལའང་རྟོགས་པའི་ཆོས་སྐུ་མངའ་བར་བསྟན་པའི་ཆེད་ཡིན།" ཞེས་གསུངས་པའི་ཕྱིར་རོ། །