ཆོས་ཀྱི་རྣམ་གྲངས་

ཆོས་ཀྱི་རྣམ་གྲངས་ཞེས་པ་ནི་སངས་རྒྱས་ཀྱི་བཀའ་དང་ཤཱསྟྲའི་ནང་དུ་གསུངས་པའི་ཆོས་ཀྱི་རྣམ་པ་སྣ་ཚོགས་དང་། ཆོས་ཀྱི་མིང་གི་རིགས་སོ་སོ་ལ་བྱ་བའི་ཐ་སྙད་ཅིག་ཡིན། གཙོ་བོ་ཕུང་པོ་དང་ཁམས། སྐྱེ་མཆེད་སོགས་ཀྱི་ཆོས་ཀྱི་དབྱེ་བ་རྣམས་ལ་ཟེར།

སྒྲ་བཤད།

"ཆོས་ནི་ཕུང་པ་ལ་སོགས་པ་ཡིན་ཏེ་རང་གི་མཚན་ཉིད་པ་ཉིད་དུ་འདོད་དོ། །ཡོངས་སུ་ཀུན་ཏུ་ཐམས་ཅད་དུ་འདི་ལ་འམ་འདིས་ཁོང་དུ་ཆུད་རྟོགས་རིག་པས་ན་ཆོས་ཀྱི་རྣམ་གྲངས་ཞེས་བྱའོ། །" "ཆོས་ཀྱི་རྣམ་གྲངས་ནི་ཕུང་ཁམས་སྐྱེ་མཆེད་སོགས་སོ། །" "ཟབ་མོ་སྣང་བ་ཞེས་པའི་ཟབ་མོ་ནི་བློ་ལ་འཆར་དཀའ་བ་སྟེ་དཔེར་ན་མཚོའི་ནང་དུ་ཉི་ཟླ་སོགས་ཀྱི་གཟུགས་བརྙན་འཆར་མི་དཀའ་ཡང་ནམ་མཁའི་མཐའ་འཆར་དཀའ་བ་ལྟར་ཀུན་རྫོབ་འཆར་སླ་ཞིང་དོན་དམ་འཆར་དཀའོ། །སྣང་བ་ནི་དེ་ལྟ་བུ་ཟབ་མོ་མཁྱེན་པའི་ཡེ་ཤེས་སོ། །ཆོས་ཀྱི་རྣམ་གྲངས་ནི་ཕུང་ཁམས་སྐྱེ་མཆེད་སོགས་སོ། །"

དབྱེ་བ།

ཆོས་ཀྱི་རྣམ་གྲངས་ཀྱི་གཙོ་བོ་ནི་གསུམ་དུ་ཕྱེ་སྟེ། ཕུང་པོ་ལྔ། "ཕུང་པོ་ལྔ་པོ་ཞེས་བྱ་བ་གསུངས་སོ། །ཕུང་པོའི་སྒྲས་སྐྱེ་མཆེད་དང་ཁམས་ཀྱང་མཚོན་པ་ཡིན་ཏེ། མཇུག་སྡུད་པ་ན་དེ་དག་ཀྱང་བརྗོད་པའི་ཕྱིར་རོ། །" སྐྱེ་མཆེད་བཅུ་གཉིས། "སྐྱེ་མཆེད་བཅུ་གཉིས་མེད་པར་བསྟན་པ་ནི། མིག་མེད་ཅེས་པ་ནས། གཟུགས་མེད་ཅེས་པ་དང་ཆོས་མེད་ཅེས་པའི་བར་གྱིས་བསྟན་ཏོ། །" ཁམས་བཅོ་བརྒྱད། "ཁམས་བཅོ་བརྒྱད་མེད་པར་བསྟན་པ་ནི། མིག་གི་ཁམས་མེད་ཅེས་པ་ནས་ཡིད་ཀྱི་ཁམས་མེད་ཅེས་པའི་བར་གྱིས་ནི་རྟེན་དབང་པོའི་ཁམས་དྲུག་མེད་པར་བསྟན་ཏོ། །བར་ནས་དམིགས་པ་ཡུལ་གྱི་ཁམས་དྲུག་མེད་པར་ཡང་བསྟན་ཏོ། །མིག་གི་རྣམ་པར་ཤེས་པའི་ཁམས་མེད་ཅེས་པ་ནས། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་མེད་ཅེས་པས་ནི་བརྟེན་པ་རྣམ་པར་ཤེས་པའི་ཁམས་དྲུག་མེད་པར་བསྟན་ཏོ། །"

ཤེས་རབ་སྙིང་པོར་གསུངས་ཚུལ།

ཟབ་མོ་སྣང་བའི་ཏིང་ངེ་འཛིན། "བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པས་བསྟན་ཏེ། ཟབ་མོ་ནི་སྟོང་པ་ཉིད་ཡིན་ལ། སྣང་བ་ནི་ཡུལ་ཅན་གྱི་ཏིང་ངེ་འཛིན་ནོ། །" ཟབ་མོའི་དོན། "ཟབ་མོ་ནི་སྟོང་པ་ཉིད་ལ་སོགས་པ་སྟེ། གང་དུ་འམ་གང་གིས་སྣང་བ་གོ་རིམ་བཞིན་དུ་རང་དང་གཞན་གྱི་རྒྱུད་ལ་བལྟོས་པ་དེ་ནི་ཟབ་མོ་སྣང་བ་ཡིན་ནོ། །"

སྟོང་པ་ཉིད་དུ་མཐོང་ཚུལ།

སྟོང་པ་ཉིད་ཀྱི་རྣམ་པ་བཞི། "གཟུགས་སུ་སྣང་བའི་དུས་ཉིད་ནས་གཟུགས་ཀྱི་རང་གི་ངོ་བོས་སྟོང་པ་སྟེ། འདི་ནི་གཟུགས་སྟོང་པའོ་ཞེས་པའི་དོན་ནོ། །གནས་ཚུལ་ལ་སྟོང་པ་ཉིད་ཡིན་ཡང་ཐ་སྙད་དུ་གཟུགས་ཀྱི་སྣང་བ་མ་འགག་པར་བློ་ལ་སྣང་བ་སྟེ། སྟོང་པ་ཉིད་གཟུགས་སོ་ཞེས་པའི་དོན་ནོ། །གཟུགས་སུ་སྣང་བ་ཉིད་གཟུགས་ཀྱི་རང་གི་དངོས་པོ་སྟོང་པ་ཡིན་གྱི་དེ་ལས་ལོགས་སུ་གཟུགས་ཀྱི་སྟོང་པ་ཉིད་བཙལ་དུ་མེད་པས་ན་གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ་ཞེས་གསུངས་སོ། །" ཆུ་ཟླའི་དཔེ། "འདི་ནི་ཆུ་ཟླའི་དཔེ་ཤེས་པར་བྱ་སྟེ། དཔེར་ན་ཆུ་ནང་དུ་ཟླ་བའི་གཟུགས་བརྙན་སྣང་བ་ན། ཆུ་ནང་དུ་ཟླ་བ་སྣང་ཙམ་མ་འགག་པར་ཡོད་པ་དང་། ཟླ་བ་སྣང་བའི་དུས་ནས་ཆུ་ནང་དུ་ཟླ་བར་ཡོད་མ་མྱོང་བ་དང་ཟླ་བར་སྣང་བ་དང་། ཟླ་བའི་རང་གི་ངོ་བོར་ཡོད་མ་མྱོང་པ་ཐ་མི་དད་པ་དང་། ཟླ་བའི་མཚན་ཉིད་ཤེས་ནས་རང་སར་གྲོལ་བའོ། །དཔེ་དེ་བཞིན་དུ་གཟུགས་སུ་སྣང་བའི་དུས་ཉིད་ནས་གཟུགས་ཀྱི་རང་གི་ངོ་བོས་སྟོང་པ་སྟེ།"

སྒོམ་ལམ་དུ་བསྒོམ་ཚུལ།

མཉམ་བཞག་གི་ཉམས་མྱོང་། "སྟོང་པ་ཉིད་ཡང་དག་པར་རྗེས་སུ་མཐོང་པ་ལ་གཟུགས་ཡང་དག་པར་རྗེས་སུ་བ་ལྟར་མེད་ཅེས་པའི་དགོངས་པ་ཡིན་པས། དེས་ན་མཉམ་བཞག་གི་གཟིགས་ངོ་ལ་ཕུང་པོ་ལྔ་མི་སྣང་བ་ནི། གཟུགས་མེད་ཅེས་པ་ནས་རྣམ་པར་ཤེས་པ་མེད་ཅེས་པའི་བར་རོ། །" མཐོང་ལམ་དུ་སྒོམ་ཚུལ། "ཤཱ་རིའི་བུ་ཞེས་བོས་ནས་དེ་ལྟར་ཆོས་ཐམས་ཅད་སྟོང་བ་ཉིད་དེ་ཞེས་པ་ལ་རྣམ་པར་ཐར་པའི་སྒོ་སྟོང་པ་ཉིད་དང་། མཚན་ཉིད་མེད་པ། མ་སྐྱེས་པ། མ་འགག་པ། དྲི་མ་མེད་པ། དྲི་མ་དང་བྲལ་བ་མེད་པ་ཞེས་པས་རྣམ་པར་ཐར་པའི་སྒོ་མཚན་མ་མེད་པ་དང་། བྲི་བ་མེད་པ་དང་། གང་བ་མེད་པ་ཞེས་པས་རྣམ་པར་ཐར་པའི་སྒོ་སྨོན་པ་མེད་པ་བསྟན།"

སྔགས་ཀྱི་སྒོ་ནས་འགྲེལ་པ།

ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། "ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་ཞེས་སོགས་གསུངས་ཏེ། སྔགས་ཀྱི་ངོ་བོ་ནི་རྣམ་པར་མི་རྟོག་པའི་ཡེ་ཤེས་སོ། །མ་རིག་པ་ཟློག་པས་ན་རིག་པ་ཆེན་པོའི་སྔགས་སོ། །འདི་ལས་ལྷག་པ་མེད་པས་ན་བླ་ན་མེད་པའི་སྔགས་སོ། །" ལམ་ལྔར་སྦྱར་བ། "ཤེར་ཕྱིན་ལ་སློབ་ཚུལ་རྒྱས་པར་བསྟན་ནས་སློབ་ཚུལ་ཇི་སྐད་བསྟན་པ་ལྟར་བསླབ་པར་བྱའོ་ཞེས་གདམས་པ་ནི། བཙུན་པ་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་དེ་ལྟར་བསླབ་པར་བྱའོ་ཞེས་པས་བསྟན་ཏོ། །"