ཆོས་ཀྱི་དབྱིངས་
ཆོས་ཀྱི་དབྱིངས་ནི་ཤེར་ཕྱིན་གྱི་གཞུང་ལུགས་སུ་བཤད་པའི་ཆོས་ཐམས་ཅད་ཀྱི་ངོ་བོ་ཉིད་དང་རང་བཞིན་ཏེ། འདི་ནི་སྣང་ཞིང་སྲིད་པའི་དངོས་པོ་ཐམས་ཅད་ཀྱི་གཞི་རྟེན་དང་རང་བཞིན་ལ་གོ་དགོས། ཆོས་ཀྱི་དབྱིངས་ཀྱི་ཁྱད་ཆོས་གཙོ་བོ་ནི་ཡེ་ནས་དག་ཅིང་འཕེལ་འགྲིབ་མེད་པ། མཉམ་པ་ཉིད་ཀྱི་ངང་ཚུལ་དུ་རྟག་ཏུ་གནས་པ་ཞིག་ཡིན།
སྒྲ་བཤད།
[རྩོམ་སྒྲིག]ཆོས་ཞེས་པ་ནི་སྣང་སྲིད་ཀྱི་དངོས་པོ་ཐམས་ཅད་དང་། ཀུན་རྫོབ་དོན་དམ་གྱི་ཆོས་ཐམས་ཅད་ལ་གོ། དབྱིངས་ཞེས་པ་ནི་རང་བཞིན་དང་ངོ་བོ་ཉིད། ཁམས། གཞི་ལ་སོགས་པའི་དོན་དུ་གོ་དགོས། དེས་ན་ཆོས་ཀྱི་དབྱིངས་ཞེས་པ་ནི་ཆོས་ཐམས་ཅད་ཀྱི་རང་བཞིན་གཞི་མ་དང་ངོ་བོ་ཉིད་ཀྱི་གནས་ལུགས་མཐར་ཐུག་ལ་གོ་དགོས་པ་ཡིན།
ནང་དོན།
[རྩོམ་སྒྲིག]ཆོས་ཀྱི་དབྱིངས་ཞེས་པ་ནི་ཇི་ལྟར་ན་ཆོས་ཐམས་ཅད་ཀྱི་ངོ་བོ་ཉིད་ཡིན་ཞེ་ན། འདི་ནི་སྣང་ཞིང་སྲིད་པའི་དངོས་པོ་ཐམས་ཅད་ཀྱི་གཞི་རྟེན་དང་རང་བཞིན་ཏེ། གང་ལ་ཞེ་ན། ཆོས་ཀྱི་དབྱིངས་ལ་དངོས་གནས་སུ་སྐྱོན་དང་ཡོན་ཏན་གྱི་འཕེལ་འགྲིབ་ཅུང་ཟད་ཀྱང་མེད་པའི་ཕྱིར་ཏེ། "ཆོས་ཀྱི་དབྱིངས་ལ་སྐྱོན་ཡེ་ནས་མེད་པས་འཕྲལ་དུ་ཟད་པ་མེད་ཅིང༌། ཡོན་ཏན་ཡེ་ནས་རྫོགས་པས་འཕྲལ་དུ་འཕེལ་བའང་མེད་ཀྱི་"[༡]ཞེས་གསུངས། ཆོས་ཀྱི་དབྱིངས་ཀྱི་རང་བཞིན། ཆོས་ཀྱི་དབྱིངས་ཀྱི་རང་བཞིན་ལ་ཁྱད་ཆོས་ལྔ་ཡོད། དང་པོ། སྐྱོན་ཟད་པ་མེད་པ། གཉིས་པ། ཡོན་ཏན་འཕེལ་བ་མེད་པ། གསུམ་པ། མཉམ་པ་ཉིད་ཀྱི་ངང་ཚུལ། བཞི་པ། བརྗོད་དུ་མེད་པ། ལྔ་པ། བྲི་གང་བྲལ་བར་རྟག་ཏུ་གནས་པ་ནི། "དེས་ཆོས་ཀྱི་དབྱིངས་རང་གི་ངོ་བོ་ལ་ནི་སྐྱོན་ཟད་པ་མེད་ཅིང་ཡོན་ཏན་འཕེལ་བ་ཅུང་ཟད་ཀྱང་མེད་དེ་མཉམ་པ་ཉིད་བརྗོད་དུ་མེད་ལ་བྲི་གང་བྲལ་བར་རྟག་ཏུ་གནས་པའོ། །"[༢]ཞེས་གསལ་བར་གསུངས། བདེན་པས་སྟོང་པའི་ཚུལ། ཆོས་ཀྱི་དབྱིངས་ནི་བདེན་གྲུབ་ཀྱིས་སྟོང་པའི་ངང་ཚུལ་ཞིག་ཡིན་ལ། དེའི་ངང་ལ་དོན་དམ་པར་ཟད་པ་དང་འཕེལ་བ་གཉིས་ཀ་མེད་དེ། "བདེན་པས་སྟོང་པའི་ཆོས་ཀྱི་དབྱིངས་ལ་དོན་དམ་པར་ཟད་པ་མེད་ཅིང་འཕེལ་བ་མེད་པར་ཤེས་སོ། །"[༣]ཞེས་བཤད་པ་ལྟར།
ལམ་དང་འབྲེལ་བ།
[རྩོམ་སྒྲིག]མཐོང་བའི་ལམ་དང་འབྲེལ་བ། བྱང་ཆུབ་སེམས་དཔའ་རྣམས་ཀྱིས་མཐོང་བའི་ལམ་གྱི་སྐབས་སུ་ཆོས་ཀྱི་དབྱིངས་མངོན་སུམ་དུ་མཐོང་གི། དེ་ཙམ་གྱིས་ཆོས་ཀྱི་དབྱིངས་ལ་འཕེལ་འགྲིབ་ཅུང་ཟད་ཀྱང་མི་འབྱུང་བར་ངེས་ཏེ། "སྟོང་པ་ཉིད་ཀྱི་རང་བཞིན་ཆོས་ཀྱི་དབྱིངས་མཐོང་བའི་ལམ་ཟད་པར་མི་འགྱུར་རོ་"[༤]ཞེས་གསུངས། ཤེས་རབ་ཀྱིས་རྟོགས་པའི་ཚུལ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ནས་ཆོས་ཀྱི་དབྱིངས་རྟོགས་པའི་ཚེ། ཤེས་རབ་ཀྱིས་ཆོས་ཉིད་མཐོང་ཡང་ཆོས་ཀྱི་དབྱིངས་ལ་འཕེལ་བ་ཅུང་ཟད་ཀྱང་མི་འབྱུང་། "ཤེས་རབ་ཀྱིས་ཡང་དག་པའི་ཆོས་ཉིད་མཐོང་བའི་ལམ་རྟོགས་པས་ཅུང་ཟད་འཕེལ་བ་མེད་དོ་"[༥]ཞེས་གསུངས་སོ། །
ཡང་དག་པའི་དོན།
[རྩོམ་སྒྲིག]དོན་དམ་པའི་ངོས་ནས་བལྟས་ན་ཆོས་ཀྱི་དབྱིངས་ཀྱི་གནས་ཚུལ་ནི་ཅི་ཞིག་ཡིན་ཞེ་ན། ཆོས་ཐམས་ཅད་ཀྱི་ངོ་བོ་ཉིད་ནི་ཡེ་ནས་མྱ་ངན་ལས་འདས་པའི་ངང་ཚུལ་ཞིག་ཡིན་ལ། དེར་སླར་ཡང་བྱང་ཆུབ་པར་བྱ་བའི་དངོས་པོ་ཅུང་ཟད་ཀྱང་མེད། "དེས་ན་ཡང་དག་པའི་དོན་དུ་ཆོས་ཐམས་ཅད་ཟད་འཕེལ་མེད་པར་མཉམ་པ་ཉིད་དུ་ཡེ་ནས་མྱ་ངན་ལས་འདས་པ་ཡིན་གྱི་སླར་ཡང་བྱང་ཆུབ་པར་བྱ་བ་ཅུང་ཟད་ཀྱང་མེད་དོ། །"[༦]ཞེས་གསལ་བར་གསུངས།
ཐ་སྙད་ཙམ་དུ་ཡོད་ཚུལ།
ཀུན་རྫོབ་ཏུ་ཆོས་ཀྱི་རྣམ་གྲངས་འདི་ཐམས་ཅད་ནི་བརྗོད་པ་ཙམ་དང་ཐ་སྙད་ཙམ་དུ་ཟད་ཀྱི་རང་ངོས་ནས་གྲུབ་པའི་ངོ་བོ་ཅུང་ཟད་ཀྱང་མེད། "ཆོས་ཀྱི་རྣམ་གྲངས་འདི་ཐམས་ཅད་བརྗོད་པ་ཙམ་དང་ཐ་སྙད་ཙམ་དུ་ཟད་ཀྱི་ངོ་བོ་མེད་པར་ཤེས་ནས།"[༧] ཞེས་གསུངས་པ་ལྟར།
ལུང་ཁུངས།
[རྩོམ་སྒྲིག]- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་ནོར་བུ། ལྕགས་པར།
- ↑ འཇུ་མི་ཕམ། མདོ་སྡུད་པའི་འགྲེལ་པ་ཡུམ་གྱི་དགོངས་དོན་ལ་འཇུག་པའི་ལེགས་བཤད། ལག་བྲིས།
- ↑ ཅོ་ནེ་གྲགས་པ་བཤད་སྒྲུབ། སྡུད་པའི་འགྲེལ་པ་རྒྱལ་བའི་དགོངས་གསལ། ཤིང་དཔར།
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར།
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར།
- ↑ འཇུ་མི་ཕམ། མདོ་སྡུད་པའི་འགྲེལ་པ་ཡུམ་གྱི་དགོངས་དོན་ལ་འཇུག་པའི་ལེགས་བཤད། ལག་བྲིས།
- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་ནོར་བུ། ལྕགས་པར།