ཆེ་ཤོས་ངག་དབང་བཤད་སྒྲུབ་བསྟན་པའི་ཉི་མ་
ཆེ་ཤོས་ངག་དབང་བཤད་སྒྲུབ་བསྟན་པའི་ཉི་མ།
[རྩོམ་སྒྲིག]རྗེ་འདི་ནི་མདོ་སྨད་ཙོང་ཁ་ཆུ་རུལ་ཁ་ཞེས་པར་ཡབ་སྔགས་འཚང་ཚེ་དབང་དང་། ཡུམ་སྐྱིད་རི་གཉིས་ཀྱི་སྲས་སུ་རབ་བྱུང་གསུམ་པའི་མེ་ལུག（༡༧༨༧）ལོར་འཁྲུངས། མཚན་བཤད་སྒྲུབ་བསྟན་པའི་ཉི་མ་ཞེས་གསོལ། ལོ་དེར་གདན་སར་གདན་དྲངས། དགུང་ལོ་དགུ་ལ་མི་ཉག་མཁན་པོ་ཚུལ་ཁྲིམས་བསྟན་པའི་ཉི་མའི་སར་དགེ་ཚུལ་གྱི་སྡོམ་པ་མནོས། མཚན་ངག་དབང་བཤད་སྒྲུབ་བསྟན་པའི་ཉི་མ་ཞེས་གསོལ། དགུང་ལོ་བཅུ་གསུམ་ལ་སྐུ་འབུམ་དགོན་དུ་ཆོས་ཞུགས་མཛད་ནས་གཞུང་ཆེན་ལ་གསན་བསམ་གནང་། དགུང་ལོ་བཅོ་ལྔའི་ཐོག་དབུས་སུ་ཕེབས་ནས་སེར་སྨད་ཐོས་བསམ་ནོར་བུའི་གླིང་དུ་ཆོས་གྲྭར་ཞུགས་ནས་མཁན་པོ་གྲགས་པ་མཁས་གྲུབ་བསྟེན་ཏེ་གཞུང་ཆེན་བཀའ་པོད་ལྔ་ལ་གསན་བསམ་མཛད། དགུང་ལོ་ཉེར་གཅིག་ལ་གྲྭ་སྐོར་གནང་། དགུང་ལོ་ཉེར་གཉིས་པར་པཎ་ཆེན་བསྟན་པའི་ཉི་མའི་དྲུང་དུ་དགེ་སློང་གི་སྡོམ་པ་ཞུས། དེ་ནས་མདོ་སྨད་དུ་ཕྱིར་བྱོན། དགུང་ལོ་སུམ་ཅུ་ཐམ་པར་སྐུ་འབུམ་གྱི་ཁྲི་ཆེན་ལ་ཕེབས། རྗེ་འདི་བྱང་ཕྱོགས་ཧོར་གྱི་ཡུལ་སྨད་སོགས་སུ་ཐེངས་དྲུག་ཕེབས་ནས་ཐེངས་རྗེས་མར་ཏ་ཡན་ཆི་བླ་མའི་དགོན་པར་མཚན་ཉིད་གྲྭ་ཚང་དང་། དར་ཧན་བེ་ལིག་དར་རྒྱས་ཆོས་གླིང་དུ་དུས་འཁོར་གྲྭ་ཚང་། ཨ་བྷ་ཀ་དགའ་ལྡན་བཤད་སྒྲུབ་གླིང་དུ་ལམ་རིམ་གྲྭ་ཚང་སོགས་གསར་སྐྲུན་མཛད། དེ་བཞིན་འབྲུག་རྒྱལ་དབང་ཆོས་རྗེས་མཛད་པའི《ཆེ་ཤོས་ངག་དབང་བསྟན་པ་དང་རྗེ་གོང་མའི་རྣམ་ཐར་སྟོད་ཆ》《བཅོམ་ལྡན་འདས་དཔལ་དུས་ཀྱི་འཁོར་ལོ་ལྷ་བཅུ་གསུམ་མའི་བསྙེན་ཡིག་དངོས་གྲུབ་རྣམ་གཉིས་འགུགས་པའི་ལྕགས་ཀྱུ་ཤེལ་དཀར་མེ་ལོང》《རབ་གནས་བཀྲ་ཤིས་སྙེ་མའི་དགོངས་གསལ་ཤེལ་དཀར་མེ་ལོང》སོགས་བཀའ་རྩོམ་མང་དུ་མཛད། དགུང་ལོ་བདུན་ཅུ་དོན་གསུམ་ལ་ཕེབས་པ་རབ་བྱུང་བཅུ་བཞི་པའི་ས་ལུག（༡༨༥༩）ལོར་དགོངས་པ་ཆོས་དབྱིངས་སུ་ཐིམ།