ཆུ་བོ་སིནྡྷུ་

ཆུ་བོ་སིནྡྷུ།

《ལྷོ་རོང་ཆོས་འབྱུང》ལྕགས་དཔར་མའི་ཤོག་གྲངས་༧༢༤ཡིག་ཆུང་ལས། ཆུ་བོ་དེའི་འགོ་ནི་ཏི་སེའི་རྒྱབ་བྲག་སེང་གེ་ལྟ་བུའི་ཁ་ནས་འབབ་ཏེ། མར་ཡུལ་གྱི་གཞུང་ནུབ་བྱང་བརྒྱུད་ཟངས་དཀར་དང་པུ་རང་གི་ཆུ་རྣམས་བརྒྱུད་ནས་ཁ་ཆེའི་བྱང་ངོས་ཐཱ་ལི་དང་བྲུ་ཤའི་ཀླུང་དུ་ཁྲིད་དེ་ཏཱ་ཟིག་གི་ཆུ་རྣམས་བསྡུས་ནས་ར་ཙ་ཧུར་གྱི་ཐུར་དུ་འབབ་པ་ཨུ་རྒྱན་གྱི་ནུབ་ནས་ཤར་དུ་འབབ་པ་དང་འདྲེས། དུར་ཁྲོད་གཏུམ་དྲག་རོལ་པ་ཡོད་པའི་བྷ་དྲའི་ཆུ་ནུབ་ཏུ་འབབ་པ་དང་། ཁ་ཆེའི་གཙང་པོ། ཙནྡྲ། བྷ་གའི་ཆུ་རྣམས་འདྲེས་ནས་རྒྱ་གར་ནུབ་ཕྱོགས་སུ་པུར་ཤོ་ནས་ལྷོ་ནུབ་རྒྱ་མཚོའི་མཐའ་ལ་འགྲོ་ཞེས་གསལ་བ་དེ་ནི་གངས་རི་ཏི་སེའི་གནས་ཡིག་རྒྱས་བསྡུས་གཉིས་ལས་གསལ་བ་མ་ཟད། དེང་སྐབས་རང་རྒྱལ་གྱིས་དཔར་བསྐྲུན་བྱས་པའི་འཛམ་གླིང་ས་བཀྲ་དང་ཀྲུང་གོའི་ས་ཁྲ་བཅས་ཀྱི་ནང་འཁོད་པའི་ཆུ་འགོ་དང་ཆུའི་འབབ་ཡུལ། ཆུ་གཞན་དག་གི་འདྲེས་མཚམས་བཅས་པ་དང་ཡོངས་སུ་མཐུན་ནར་སྣང་བས་འདིར་དེ་བཞིན་དུ་བཀོད་པ་ལགས།