ངན་པ་དགུ་འཛོམས་དང་བཟང་པོ་བཅུ་འཛོམས།

ངན་པ་དགུ་འཛོམས་དང་བཟང་པོ་བཅུ་འཛོམས།

བོད་ཟླ་ ༡༡ ཚེས་ ༦ ཉིན་ཕྱེད་ནས་ཚེས་ ༧ གྱི་ཉིན་ཕྱེད་བར་ངན་པ་དགུ་འཛོམས་འཁེལ་གྱི་ཡོད་སྟབས་སྔ་མོའི་ལོ་ཐོའི་ནང་དུའང་། དུས་ཚོད་ངན་པ་དགུ་འཛོམས་པས། ཁ་སྨྲས་གླེང་གཞིའི་ཟས་མི་ཟ། རྒྱལ་བའི་གསུང་མི་སྒྲོག །ཅེས་འགོད་སྲོལ་ཡོད་པ་ལྟར། ཉིན་མོ་འདིར་བྱ་བ་གལ་ཆེན་རིགས་བྱེད་སྲོལ་མེད་པར། ཁྱོད་ངན་པ་དགུ་འཛོམས་ན། ང་བཟང་པོ་བཅུ་འཛོམས། ཞེས་དེའི་ལྡོག་ཕྱོགས་ལྟ་བུར། རང་རང་གི་དགའ་ཉེ་ནང་ཁུལ་རྣམས་ཕན་ཚུན་མགྲོན་འབོད་བྱས་ཏེ། གསོལ་ཚིག་གཟབ་རྒྱས་མཤམས་ཏེ་དགའ་སྐྱིད་ངང་བཞུགས་སྲོལ་ཡོད། ཡང་ངན་པ་དགུ་འཛོམས་ཞེས་པ་འདི། ཡིག་ལམ་འགའ་ཞིག་ཏུ་བོད་ཟླ་ ༡༡ ཚེས་ ༦ དང་ ༧ ཉིན་མཚན་གཅིག་གི་རིང་ས་བདག་ངན་པ་ཉི་མ་ནག་ཆེན་དང་། དེ་མིན་ས་བདག་ངན་པ་བརྒྱད་བཅས་མཉམ་དུ་འཁེལ་གྱི་ཡོད་སྟབས། ངན་པ་དགུ་འཛོམས་ཞེས་ཐོགས་པར་བཤད་ཅིང། དམངས་ཁྲོད་དུ་ < <མདོ་མཛངས་བླུན་> > གྱི་བམ་པོ་བཅུ་གཅིག་པའི་ནང་གསལ་ཁྱིམ་བདག་དབྱིག་པ་ཅན་གྱི་ལོ་རྒྱུས་དང་འབྲེལ་བ་ཡོད་ཚུལ་གྱི་བཤད་སྒྲོས་ཤིག་ཀྱང་འདུག །ཡང་ལ་ལས་ཇི་ལྟར་གདུག་རྩུབ་ཀྱི་བྱ་བ་སྣ་ཚོགས་ཚང་བ་ལ། གདུག་རྩུབ་ངན་དགུ་ཚང་བ་ཞེས་བརྗོད་སྲོལ་ཡོད་པ་ལྟར། ཉིན་མོ་འདིར་དུས་ཚོད་ངན་པ་འཁེལ་བའི་དབང་གིས་ངན་པ་དགུ་འཛོམས་ཞེས་བརྗོད་པ་ལས། དུས་ཚོད་ངན་པ་དགུ་འདི་དང་འདི་ཞེས་གྲངས་འདྲེན་བྱ་རྒྱུ་མེད་པར་གསུངས་སོ།། །།