གླེགས་བམ་
གླེགས་བམ་ནི་སྔོན་གྱི་བོད་ཀྱི་དཔེ་ཆ་འབྲི་སྲོལ་ཞིག་སྟེ། ཤིང་ཤུན་གྱི་ངོས་སམ་ཤོག་བུའི་སྟེང་དུ་ཡི་གེ་བྲིས་ནས་དེ་དག་རིམ་པ་བསྒྲིགས་ཏེ་བཞག་པའི་དཔེ་ཆའི་རྣམ་པ་ཞིག་ལ་ཟེར།
གླེགས་བམ་གྱི་གོ་དོན།
[རྩོམ་སྒྲིག]གླེགས་བམ་ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལྟ་བུའི་གསུང་རབ་རྣམས་ཡི་གེར་བཀོད་པའི་དཔེ་ཆའི་རྣམ་པ་ཞིག་ལ་གོ་དགོས། དཔེར་ན། "བདེ་བར་གཤེགས་པ་བསྐྱེད་པའི་ཡུམ་འདི་གླེགས་བམ་ལ་ཡིག་གེར་བྲིས་ཏེ།"[༡] ཞེས་དང་། "གཞུང་གི་བདག་ཉིད་བདེ་བར་གཤེགས་པའི་ཡུམ་འདི་གླེགས་བམ་ལ་བྲིས་ཏེ།"[༢] ཞེས་གསུངས་པ་ལྟར་རོ། །
མཆོད་ཡུལ་དུ་གྱུར་པའི་གླེགས་བམ། གླེགས་བམ་ནི་མཆོད་པའི་ཡུལ་དུའང་གྱུར་ཏེ། "ཤེས་རབ་ཀྱི་ཕ་རོལ་ཏུ་ཕྱིན་པ་གླེགས་བམ་ལ་བྲིས་ཏེ་མཆོད་ན་བསོད་ནམས་དེའི་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང་མི་འགྲོ། དེ་བཞིན་དུ་བརྒྱ་སྟོང་གི་ཆ་དང། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་བརྒྱ་སྟོང་ཁྲག་ཁྲིག་གི་ཚད་ཡང་མི་ཕོད་ལ། གྲངས་དང་དཔེ་དང་རྒྱུའི་བར་དུ་ཡང་མི་ཕོད་དོ། །"[༣]ཞེས་དང་། "བདེ་བར་གཤེགས་པའི་ཡུམ་འདི་གླེགས་བམ་ལ་བྲིས་ཏེ་ཚིག་དོན་ཡིད་ལ་འཆང་ཞིང་མེ་ཏོག་དང་བྱུགས་པས་བསྟི་སྟང་བཀུར་སྟི་བྱེད་པར་གྱུར་ ན། སྔར་བཤད་པ་ལྟ་བུའི་མཆོད་རྟེན་བྱས་ཤིང་མཆོད་པའི་བསོད་ནམས་ཀྱིས་ནི། བསོད་ནམས་འདིའི་ཆར་ཡང་མི་ཕོད་ན་མཉམ་པ་ག་ལ་འོང་ཞེས་པ་ནི་གཙོ་བོར་སྒོམ་ལམ་གྱི་ཤེར་ཕྱིན་ལ་དགོས་སོ། །"[༤]ཞེས་གསུངས་པ་ལྟར་རོ། །
མཆོད་པའི་ཡོན་ཏན།
[རྩོམ་སྒྲིག]གླེགས་བམ་ལ་མཆོད་པ་བྱས་ན་བསོད་ནམས་ཆེན་པོ་འབྱུང་སྟེ། "བརྒྱ་བྱིན་གྱིས་གསོལ་བ། གལ་ཏེ་བདག་ལ་གླེགས་བམ་བཞག་པའི་ཆ་དེ་དང་རིང་སྲེལ་གང་གྷའི་རླུང་གི་བྱེ་མ་སྙེད་ཅིག་རྣམས་སངས་རྒྱས་ཀྱི་ཞིང་དུ་འགྱུར་ལ། དེ་དག་ཀུན་གྱི་ནང་ནས་རྒྱལ་བའི་རིང་བསྲེལ་གྱིས་བྱུར་བུར་བལྟམས་ཏེ་བཀང་བར་འགྱུར་བ་ཅིག་དང་ལྷན་ཅིག་ཏུ་བཞག་ཀྱང་། བདག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འདི་ཉིད་ལེན་ཏོ། །"[༥]ཞེས་གསུངས། "དེ་དང་ཤེར་ཕྱིན་གླེགས་བམ་ལ་བྲིས་པ་ཆ་གཉིས་སུ་བྱས་ཏེ་དེ་ལས་གང་འདམ་ཞིང་ལེན་ཞེ་ན། བརྒྱ་བྱིན་བདག་ནི་ཤེས་རབ་ཀྱི་ཕ་རོལ་ཏུ་ཕྱིན་པ་གླེགས་བམ་ལ་བྲིས་པ་འདི་ཉིད་ལེན་པར་བྱེད་དོ། །"[༦]ཞེས་གསུངས་པ་ལྟར་རོ། །
སྦྱིན་པའི་ཡོན་ཏན། "གང་གིས་ཤེར་ཕྱིན་འདི་ཡི་གེར་བྲིས་ཏེ་སེམས་ཅན་བྱང་ཆུབ་སེམས་དཔའ་མཆོག་ལ་གླེགས་བམ་སྦྱིན་པ་བྱིན་ན་དེ་ནི་བསོད་ནམས་ཁྱད་པར་དུ་འཕགས་སོ། །"[༧]ཞེས་དང་། "གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྟ་སྟེ་གཞུང་གི་བདག་ཉིད་ལ་མོས་པར་བྱེད་པ་གང་ཡང་རུང་བ་ལ་ཡི་གེར་བྲིས་ཏེ། སེམས་ཅན་གཞན་རྣམས་ལ་གླེགས་བམ་བྱིན་ན་དེ་བས་འདི་བསོད་ནམས་རབ་ཏུ་མང་པོ་སྐྱེ་སྟེ། སྔ་མའི་དོན་བྱེད་པ་ལས་ཁྱད་པར་དུ་འཕགས་སོ། །"[༨]ཞེས་གསུངས་པ་ལྟར་རོ། །
ལུང་ཁུངས།
[རྩོམ་སྒྲིག]- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་ནོར་བུ། ཤོག་ངོས། ༤༡
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤོག་ངོས། ༥༠
- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་ནོར་བུ། ཤོག་ངོས། ༤༡
- ↑ ཅོ་ནེ་གྲགས་པ་བཤད་སྒྲུབ། སྡུད་པའི་འགྲེལ་པ་རྒྱལ་བའི་དགོངས་གསལ། ཤོག་ངོས། ༡༥b
- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་ནོར་བུ། ཤོག་ངོས། ༤༣-༤༤
- ↑ འཇུ་མི་ཕམ། མདོ་སྡུད་པའི་འགྲེལ་པ་ཡུམ་གྱི་དགོངས་དོན། ཤོག་ངོས། ༢༤b
- ↑ ཅོ་ནེ་གྲགས་པ་བཤད་སྒྲུབ། སྡུད་པའི་འགྲེལ་པ་རྒྱལ་བའི་དགོངས་གསལ། ཤོག་ངོས། ༡༨f
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤོག་ངོས། ༥༦