གླུད་

ཡོང་ཁུངས་Wikipedia
Jump to navigation Jump to search

མི་ཞིག་ལ་གདོན་འདྲེས་གནོད་ཀྱི་འདུག་ཟེར་བ་སོགས་ཀྱི་བཤད་སྲོལ་བྱུང་སྐབས་མི་དེའི་ཚབ་ལ་གླུད་ཟེར་བ་ཞིག་གཏོང་གི་ཡོད་ཅིང་། དེ་ལ་རིགས་མི་འདྲ་བ་སྣ་ཚོགས་ཡོད་དེ་ལ་ལ་ནི་སྤགས་སམ་འདམ་བག་གིས་ནད་པའམ་མི་དེའི་གཟུགས་བརྙན་བཟོས་ཐོག་དེའི་མཐའ་ལ་ཟས་སྣེ་དང་གོས་སྣེ་བླུགས་ཏེ་ལམ་བཞི་མདོའམ་སུམ་མདོར་བསྐྱལ་ཐོག གཟུགས་བརྙན་དེ་སྤགས་སམ་འདམ་བག་གིས་བཟོས་ཀྱང་ཆོ་ག་བྱས་ནས་སྔགས་བརྒྱབ་ཚར་དུས་ཕར་ངོས་གདོན་འདྲེས་མི་གསོན་པ་རང་དུ་མཐོང་གི་ཡོད་པས་ཚབ་ཏུ་མི་ངོ་མ་གཏོང་མི་དགོས་པ་བྱུང་བ་ཡིན་ཟེར། ཡང་ཡུལ་ཚོ་ཁ་ཤས་ལ་བོད་ཀྱི་ལོ་སར་གྱི་ཉི་ཤུ་དགའི་དགོང་མོ་དགུ་ཐུག་འཐུང་ཚར་རྗེས་མི་གཅིག་གིས་གྲོང་ཚོའི་ནང་གི་ཐེམ་དུད་ཚང་མའི་ཚབ་བྱས་ཏེ་ལུས་ལ་གྱོན་པ་ནག་པོ་གྱོན། གདོང་ལ་ཀྲེ་ནག་བྱུགས། མགོ་བོར་སྨྱུག་ཞྭ་རྩེ་ལ་དར་ལྕོག་ནག་པོ་བཙུགས་པ་ཞིག་གྱོན་ཏེ། གླུད་གཏོང་སྲོལ་ལྟར་དུ་ལམ་གྱི་བཞི་མདོའམ་སུམ་མདོར་སོང་སྟེ་ལྭ་བ་དག་བརྗེ་ནས་ཕྱིར་ཐོན་སོགས་ཡོད། གཞན་ཡང་ད་དུང་བོད་ཀྱི་གྲོང་ཁྱེར་ལྷ་སར་བོད་ཟླ་གཉིས་པའི་ཚེས་ཉི་ཤུ་དགུ་ལ་གླུད་འགོང་བརྫངས་པ་ཟེར་བ་ཞིག་བྱེད་སྲོལ་ཡོད། དེ་ནི་བསམ་ཡས་ལ་འགྲོ་མཁན་ཞིག་འཕན་པོར་འགྲོ་མཁན་ཞིག་སྟེ་གླུད་འགོང་གཉིས་ཡོད་པ་དེ་གཉིས་ཀྱིས་ར་ལྤགས་དཀར་བོ་ཕྱི་ནང་སློག་པའི་དུག་ལོག་གྱོན། ངོ་གདོང་ཕྱེད་ཀ་དཀར་བོ་དང་ཕྱེད་ཀ་ནག་པོ་བཟོས། སྨྱུག་མའི་ཞྭ་མོ་རྩེ་ལ་དར་ལྕོག་ནག་པོ་ཡོད་པ་ཞིག་གྱོན་ཐོག་ལྷ་ལྡན་གཙུག་ལག་ཁང་གི་འཁྱམས་རའི་སྒོ་འཕྱོར་འོག་ཏུ་ཆུ་ཤུལ་གྱི་རྙིང་མའི་དགོན་པ་བྱང་ཆུང་གླིང་གི་དགེ་འདུན་པས་ཆོག་བཏང་རྗེས་བྱང་ཆུང་གླིང་དགོན་པའི་སློབ་དཔོན་གྱིས་ཞྭ་ནག་གི་ཆས་སྤྲས་ཏེ་གླུད་འགོང་གཉིས་དང་ཤོ་རྒྱག་དགོས་པ་དང་། ཤོ་རྒྱག་སྐབས་ཏཱ་ལའི་བླ་མའི་ན་བཟའ་བང་བཞིན་གྱོན་པའི་གྲྭ་བ་ཞིག་ཏཱ་ལའི་བླ་མའི་སྐུ་ཚབ་ཡིན་ཁུལ་གྱིས་དེར་ཡོང་དགོས། ཞྭ་ནག་གི་ཆས་ཟེར་བ་ནི་ཕྱུ་བ་ཕུ་ཐུང་ཆེན་པོ་ནག་པོ་ཞིག་དང་ཞྭ་མོ་ནག་ལོ་མཐའ་ལ་པགས་པ་དང་། སྟེང་ལ་རྨ་བྱའི་སྒྲོ་གདོངས། དེའི་སྟེང་དུ་དཔེ་ཆའི་ནང་སེམས་ཅན་རྒང་ཟེར་བ་ཞིག་སྟེ་ཁ་སྐད་དུ་ཟེར་མོ་ཞེས་གཟུགས་པོ་ཕག་པ་དང་འདྲ་བ་ལ་ལུས་སྟེང་གི་སྒྲོ་རྣམས་ཁབ་དང་གཉིས་སུ་མེད་པ་ཞིག་ཡོད་དེའི་སྤུ་སྒྲོ་མང་བོ་ཞྭ་མོའི་ཐོག་བཙུགས་པ་དེ་འདྲ་ཞིག་ཡོད། གླུད་འགོང་གཉིས་ཀྱིས་བྱང་ཆུང་གླིང་གི་སློབ་དཔོན་དང་ཤོ་རྒྱག་དགོས་ཤིང་། གླུད་འགོང་གཉིས་ཤོ་ཤོར་ནས་ཁུངས་སོ་སོར་འགྲོ་སྐབས་སྡེ་བ་གཞུང་གིས་ཁོ་གཉིས་ལ་ཤ་མར་དང་། འབྲས། ཚྭ་བུལ་སོགས་ལམ་རྒྱགས་གྱ་ནོམ་པ་སྤྲད་རྗེས་བསམ་ཡས་ལ་འགྲོ་མཁན་གླུད་འགོང་དེ་ལྷ་ས་ནས་ཐོན་ཏེ་བསམ་ཡས་པེ་ཧར་དར་ལྕོག་ཏུ་རྒྱལ་བོའི་དབུགས་ཁང་གི་སྒོ་འགྲམ་དུ་ཞག་གཅིག་ཉལ་དགོས་པ་སོགས་མང་བོ་ཡོད་དོ།།

གླུད་གཏོང་བ

འདིའི་ནང་དུ་གླུད་གཏོང་བ་དང་གཏོར་ཟོར་འཕེན་པ། ལྕགས་མཁར་སྲེག་པ་དང་གཡང་སྒྲུབ་བྱེད་པ་སོགས་བྲིས་ཡོད་ལ། ལུགས་སྲོལ་འདི་དག་བོན་གྱི་སྲོལ་ཡིན་ལ། དེ་ནི་སངས་རྒྱས་ཆོས་ལུགས་དང་བོན་པོའི་ཆོས་ལུགས་བར་འཐབ་རྩོད་ཐེངས་མང་བྱས་ཏེ་བོན་ཆོས་མེད་པར་བཟོས་རུང་གླུད་གཏོང་བ་དང་མདོས་རྒྱག་སོགས་བྱེད་སྟངས་དེ་རིགས་རང་སོར་འཇོག་དགོས་བྱུང་ཡོད། རྒྱུ་མཚན་ནི་དེ་ཚོ་མེད་པར་བཟོས་ན་མང་ཚོགས་ཀྱིས་ཁས་ལེན་མེད་པ་རེད། དེར་བརྟེན་ཆོས་བྱེད་སྟངས་དེ་རིགས་ཕྱི་ཚུལ་དུ་བོན་གྱི་ཆོས་བྱེད་སྟངས་ཡིན་པ་ལ་ནང་དོན་དེ་སངས་རྒྱས་ཆོས་ལུགས་སོ།།

གཏོར་ཟོར

གཏོར་མ་ཟུར་གསུམ་ཆེན་པོ་དེ་འདྲ་བཞེངས་ཐོག ཚེ་ཟོར་ཞེས་གཏོར་མའི་སྟེང་དུ་གང་སར་པད་ཁའི་གང་བུ་འཛུགས་པ་དང་། ཡུམ་ཟོར་ཞེས་ཤིང་ཀྱེར་བ་རིང་ཐུང་ལི་རྨི་གསུམ་ཙམ་ལ་གཞོགས་བརྒྱབ་ནས་རྩེ་རྣོ་པོ་བཟོས་ཏེ་འཛུགས་སྲོལ་ཡོད། གཏོར་མ་གཡུགས་སྟངས་ལ་གཏོར་མ་དེ་ལྷ་ཡིན་བསམ་པ་བྱས་ཏེ་གཡུགས་སྲོལ་ཞིག་དང་ལྷ་ཡིན་བསམ་པའི་དམིགས་པ་བྱས་ཏེ་གཡུགས་སྟངས་དེ་ཧ་ཅང་ཉེན་ཁ་ཆེན་པོར་བརྩི་གི་ཡོད།

ལྕགས་མཁར

སླ་ང་ཆེན་པོ་ཞིག་གི་ནང་སྣུམ་བསྐོལ་ནས་སྣུམ་འཁོལ་མ་ཆགས་ཏེ་ལྦུ་བ་རྒྱག་པའི་སྐབས་སུ་ཨ་རག་བླུགས་དགོས། དེ་ཡང་ཨ་རག་བླུགས་མཁན་དེས་དགྲ་བོའི་གཟུགས་བརྙན་བྲིས་ཐོག་དེའི་སྙིང་ཁར་དགྲ་བོ་དེའི་མིང་ཡིག་དང་བོ་བྲིས་ཏེ་རྫས་ངན་སྣ་ཚོགས་བྱུགས་པའི་ཤོག་ལྷེ་ཞིག་རྒྱུགས་པའི་རྩེར་བསྐོན་ནས་མི་གཅིག་གིས་འཁྱེར་ཐོག ཨ་རག་བླུགས་མཁན་དེས་ཨ་རག་སྤུས་ལེགས་ཀ་ལི་གང་ལག་ཏུ་འཁྱེར་ནས་འཆམ་རྒྱག་བཞིན་དུ་མེ་ལྕེ་དྲག་ཏུ་འཕྱུར་བ་དང་ཆབས་ཅིག་མིའི་གཟུགས་བརྙན་བྲིས་པའི་ཤོག་ལྷེ་དེ་མེའི་ནང་སྲེག་སྲོལ་ཡོད། ཨ་རག་བླུགས་མཁས་པོ་མ་བྱུང་ན་སྣུམ་འཁོལ་མ་དེ་ཚུར་འཐོར་ནས་མེ་འབར་ཏེ་རང་ཉིད་འཚིག་ཉེན་ཡོད་པས་ཨ་རག་དེ་སྣུམ་གྱི་ཐོག་ཏུ་གནད་འཁེལ་པོ་ཞིག་བླུགས་དགོས།

གཡང་སྒྲུབ

མི་བསོད་ནམས་དང་དབང་ཐང་ཡོད་པ་དེ་ཚོའི་བསོད་ནམས་དང་དབང་ཐང་ཚུར་འགུགས་པའི་ཐབས་ཤིག་ཡིན་ཟེར། དེ་ནི་ལུག་དཀར་རྐྱང་ཞིག་གི་ལག་གཡས་པའི་ཤ་དར་ཚོན་སྣ་ལྔའི་ནང་སྒྲིལ་བཞག་པ་ཞིག་དང་། གོས་ཆེན་ཚོས་གཞི་མི་འདྲ་བ་ལྔ་དང་། གཟི། བྱུ་རུ། སྤོས་ཤེལ། འགྲོན་བུ། མེ་ལོང་བཅས་ཀྱིས་བརྒྱན་པའི་མདའ་དར་རྩེ་ལྔའམ་སྒྲོ་ལྔ་དང་ལྡན་པ་ཞིག ད་དུང་ཕྱེ་མར་དང་ཆང་ཕུད་སོགས་འཁྱེར་བའི་མི་གཅིག་གིས་ཁང་ཁྱིམ་གྱི་ཐོག་རྩེ་ནས་ཕྱྭ་འགུགས་གཡང་འགུགས་ཞེས་ཕྱག་རྒྱ་དང་བཅས་སྐད་རྒྱག་སྲོལ་ཡོད་ཅིང་། སྤྱིར་ན་ལོ་ལྟར་སྟོན་ཁ་འབྲུ་རིགས་བསྡུ་བའི་སྐབས་སུ་གཡང་སྒྲུབ་ཅེས་དེ་ལྟར་བྱེད་སྲོལ་ཡོད་དེ་ནི་མི་ཚང་དེ་རྒྱུ་སྟོབས་ཆེན་པོ་དང་བསོད་ནམས་ཆེན་པོ་ཡོང་ཆེད་ཡིན་ཟེར།

"https://bo.wikipedia.org/w/index.php?title=གླུད་&oldid=135217"ལས་སླར་རྙེད་སོང།