གོ་ཆ་ཆེན་པོ་

གོ་ཆ་ཆེན་པོ་ཞེས་པ་ནི་བྱང་ཆུབ་སེམས་དཔའ་རྣམས་ཀྱིས་ཕར་ཕྱིན་དྲུག་གི་ཚོགས་ཀྱིས་བཅིངས་པའི་མི་འཇིགས་པ་དང་ཞུམ་པ་མེད་པའི་རང་བཞིན་གྱི་སྤྱོད་པ་ལ་གོ

སྒྲ་བཤད།

སྦྱིན་པ་ལ་སོགས་པའི་ཕར་ཕྱིན་དྲུག་གི་ཚོགས་ཀྱིས་ཡངས་པར་བཅིངས་པའི་ཕྱིར་གོ་ཆ་ཞེས་བྱ། "གོ་ཆ་དེ་གང་ཞེ་ན། བདོག་པ་ཐམས་ཅད་ལ་མི་ཆགས་པར་གཏོང་བ་ཆེ་བ་དང་ལྡན་པ་སྦྱིན་པའི་གོ་ཆ་དང་། འཆལ་ཚུལ་སྤོང་བའི་སེམས་པའམ་བློ་ཆེ་བ་ཚུལ་ཁྲིམས་ཀྱི་གོ་ཆ་དང་། བཟོད་པ་སོགས་གཞན་བཞིའི་གོ་ཆ་དང་ལྡན་པས་འཁྲུགས་པའི་སེམས་སོགས་རང་རང་གི་མི་མཐུན་ཕྱོགས་འཇོམས་པའི་མཐུ་ཆེ་བ་དང་། རྒྱལ་བ་རྣམས་ཀྱི་ཐེག་པ་ཆེན་པོ་མཆོག་ལ་སེམས་བསྐྱེད་པ་ནས་རྣམ་མཁྱེན་བར་གྱི་ལམ་འབྲས་བུ་དང་བཅས་པ་ལ་ཞུགས་པ་དང་ལྡན་པ་སྟེ།" ཞེས་གསུངས་པ་ལྟར་རོ། །ཆེན་པོ་ཞེས་པ་ནི་ཕར་ཕྱིན་དྲུག་གི་ངོ་བོ་དང་ལྡན་པའི་ཁྱད་ཆོས་ཆེན་པོ་ཡིན་པའི་ཕྱིར་རོ། །

སེམས་དཔའ་ཆེན་པོའི་གོ་ཆ་ཞེས་པའི་རྒྱུ་མཚན།

"ཡང་རང་གིས་ཕ་རོལ་ཏུ་ཕྱིན་པ་དྲུག་གི་ཚོགས་རྫོགས་པ་ནི་སྦྱིན་པ་གཏོང་བ་ཆེ་བ་དང་བློ་ཆེ་བ་དང་། ཤེས་རབ་དང་ལྡན་པ་དང་། མཐུ་ཆེ་བ་ནི་འཆལ་པ་དང་ཁོང་ཁྲོ་བ་དང་ལེ་ལོ་དང་གཡེང་བའི་དཔུང་འཇོམས་པ་ལ་དཔའ་བས་ན་ཚུལ་ཁྲིམས་ལ་སོགས་པ་བཞི་དང་ལྡན་པ་དང་། ཡང་དུས་གསུམ་གྱི་རྒྱལ་བ་རྣམས་ཀྱི་ལམ་ཐེག་པ་ཆེན་པོ་མཆོག་ཤེས་རབ་སྙིང་རྗེ་དང་ཐབས་དང་ལྡན་པ་ལ་ཞུགས་པ་དང་། གོ་ཆ་ཆེན་པོ་བགོས་ཤིང་བདུད་ཀྱི་བར་དུ་གཅོད་པའི་རྒྱུ་འདུལ་བ་དང་ལྡན་པ་སྟེ། དེའི་ཕྱིར་ན་བྱང་ཆུབ་སེམས་དཔའ་ཆེན་པོ་ཞེས་བྱ་བར་རབ་ཏུ་བརྗོད་དོ། །"ཞེས་གསུངས་སོ། །

གོ་ཆ་ཆེན་པོའི་ཁྱད་ཆོས།

"མདོར་ན་ལམ་ཕར་ཕྱིན་དྲུག་ཉམས་སུ་ལེན་པའི་སྒོ་ནས་ནམ་མཁའ་ལྟར་མུ་མེད་པའི་ཐེག་པ་ཆེན་པོའི་ལམ་གྱི་ཆོས་མ་ལུས་པ་ལ་སྙིང་སྟོབས་ལྡོག་ཏུ་མེད་པའི་གོ་ཆ་ཆེན་པོ་བགོས་ཤིང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་ལྟ་བའི་ཐིབ་པོ་སེལ་ཞིང་ངན་སོང་སྒྲོལ་བ་སོགས་བདུད་ཀྱི་སྒྱུ་རྩལ་མཐའ་དག་འདུལ་བ་ལ་བརྩོན་པ་དེ་ཡི་ཕྱིར་ན་སེམས་དཔའ་ཆེན་པོ་ཞེས་རབ་ཏུ་བརྗོད་དོ། །"ཞེས་པ་ལྟར་རོ། །

སྒྱུ་མའི་དཔེས་བསྟན་པ།

"དེ་ལ་བྱང་ཆུབ་སེམས་དཔའི་གོ་ཆ་ཇི་ལྟར་བགོ་བའི་ཚུལ་ནི་མི་འཇིགས་པ་དང་། ཞུམ་པ་མེད་པའི་རང་བཞིན་ཅན་ཡིན་ལ། དེ་གང་གིས་ན་འདི་ལྟར་དཔེར་ན་སྒྱུ་མ་མཁན་གྱིས་ལམ་གྱི་བཞི་མདོར་གཟུགས་སྣ་ཚོགས་སུ་སྤྲུལ་པ་བྱས་ཏེ། སྐྱེ་བོ་ཕལ་ཆེར་ཏེ་ཕལ་མོ་ཆེ་དག་གི་མགོ་མང་པོ་བྱེ་བ་གཅོད་པར་བྱེད་པའི་འཕྲུལ་བ་བསྟན་པའི་ཚེ་ན་གསད་བྱ་དེ་དག་སྒྱུ་མའི་སྤྲུལ་པ་ཙམ་ཡིན་པའི་ཕྱིར་ཇི་ཙམ་དུ་སྡུག་བསྔལ་བ་དང་ཇི་ཙམ་དུ་མང་པོར་གྱུར་པ་དེ་ཙམ་རྫུན་དུ་མཐོང་བ་ཅི་འདྲ་བ་དེ་ལྟར་དུ་བྱང་ཆུབ་སེམས་དཔས་ཀྱང་། སྡུག་བསྔལ་རྒྱ་ཆེ་ཞིང་མུ་མེད་པའི་འགྲོ་བ་འདི་ཀུན་ཀྱང་བདེན་གྲུབ་མེད་པར་སྤྲུལ་པའི་ཚུལ་དེ་འདྲ་བར་རབ་ཏུ་ཤེས་ནས། བྱང་སེམས་དེ་ལ་ཕྱི་མའི་མུ་མཐར་ཐུག་གི་བར་དུ་མུ་མེད་པའི་སེམས་ཅན་གྱི་དོན་ཁུར་དུ་ལེན་པ་ལ་འཇིགས་པ་ཅུང་ཟད་ཀྱང་མེད་དོ། །"ཞེས་གསུངས་སོ། །

ཞུམ་པ་མེད་པའི་སྤྱོད་པ།

རང་བཞིན་མེད་པར་རྟོགས་པ། "དེ་ལྟར་གཟུགས་སོགས་ཀྱི་ཆོས་ཐམས་ཅད་ཀྱང་དོན་དམ་པར་རང་བཞིན་གྱིས་སྟོང་པར་ཤེས་པའི་སྒོ་ནས་ཐ་སྙད་དུ་བྱང་ཆུབ་སྒྲུབ་པ་ལ་འཇུག་གོ། དེའི་ཚེ་ཅི་ཡང་མི་འདུག་གོ་སྙམ་དུ་ཞུམ་པའི་སེམས་མེད་པ་དགོས་ཏེ། དོན་དམ་པར་ཅི་ཡང་མེད་ཀྱང་ཐ་སྙད་ཙམ་དུ་ཡོད་པའི་ཕྱིར་རོ། དེ་ལྟར་ཤེས་པ་འདི་ནི་གང་ཟག་དམ་པ་རྣམས་ཀྱི་སྤྱོད་པའི་གོ་ཆ་མཆོག་གོ །"ཞེས་གསུངས་སོ། །

ཁྱད་ཆོས།

"དེ་ལ་དང་པོ་བརྩོན་འགྲུས་ཀྱི་རང་བཞིན་གོ་ཆའི་བསྒྲུབ་པ་བསྟན་པའི་ཕྱིར་སེམས་དཔའ་ཆེན་པོར་གདགས་པའི་རྒྱུ་མཚན་གཏོང་བ་ཆེ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཐམས་ཅད་སྟོང་པའི་བསམ་པ་ཡོད་པའི་ཕྱིར་གཏོང་བ་ཆེ་བའོ། བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ལ་སོགས་པ་རྒྱ་ཆེན་པོ་དང་ལྡན་པས་ན་བློ་ཆེའོ། གཞན་གྱིས་གནོད་པ་ལ་ཇི་མི་སྙམ་པ་ལ་སོགས་པའི་བཟོད་པ་དང་ལྡན་པས་ན་མཐུ་ཆེ་བའོ། སེམས་ཅན་གྱི་དོན་གྱི་བརྩོན་འགྲུས་ཀྱི་སྟོབས་དང་ལྡན་པས་ན་ཐེག་པ་ཆེན་པོའོ། སེམས་རྩེ་གཅིག་པ་ཐོབ་པས་ན་མཆོག་གོ། ལས་དང་བྱེད་པ་པོ་དང་བྱ་བ་གསུམ་གྱི་དམིགས་པ་ནི་ཤེས་རབ་དང་ལྡན་པས་ན་དེ་བཞིན་གཤེགས་པའི་མྱ་ངན་ལས་འདས་པ་ལ་ཞུགས་པའི་ཕྱིར་ཞུགས་པའོ། །"ཞེས་གསུངས་སོ། །

མཐའ་དོན།

གོ་ཆ་ཆེན་པོ་ཞེས་པ་ནི་བྱང་ཆུབ་སེམས་དཔའ་རྣམས་ཀྱིས་ཕར་ཕྱིན་དྲུག་གི་ཚོགས་ཀྱིས་ཡོངས་སུ་བཅིངས་ནས། སེམས་ཅན་ཐམས་ཅད་ཀྱི་དོན་དུ་མི་འཇིགས་པ་དང་ཞུམ་པ་མེད་པའི་སྒོ་ནས་སྤྱད་པའི་ཤེས་རབ་ཀྱི་ཕར་ཕྱིན་གྱི་སྤྱོད་པ་ལ་གོ་དགོས་སོ། །