གུཔྟའི་རྒྱལ་བརྒྱུད་སྐོར།

ཆོས་རྒྱལ་མྱ་ངན་མེད་ཀྱི་ཡི་གེ་རི་ན་ག་རེའི་བྲག་ངོས་ལ་བརྐོས་པ།

བྲག་ངོས་དང་པོ། ཆོས་ཀྱི་ཡི་གེ་འདི་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བས་བྲིས་པ། འདིར་སྲོག་དང་ལྡན་པ་སུ་ཡང་མངོན་པར་བསད་པར་མི་བྱ་ཞིང་། མཆོད་སྦྱིན་ཀྱང་མི་བྱའོ། །དུས་སྟོན་དག་ཀྱང་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི་དུས་སྟོན་ལ་སྐྱོན་མང་དུ་མཐོང་ངོ་། །འོན་ཀྱང་འདི་ན་ཡང་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་བསམ་པ་དང་མི་འགལ་བའི་དགེ་བའི་དུས་སྟོན་ཅུང་ཟད་ཅིག་ནི་མཆིས་སོ། །

སྔོན་གྱི་ཚེ་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་ཚང་མང་དུ་སྲོག་ཆགས་བརྒྱ་སྟོང་ཕྲག་དུ་མ་ཉིན་རེ་བཞིན་ཚོད་མའི་སླད་དུ་གསོད་པར་བྱེད་དོ། །འོན་ཀྱང་ད་ལྟ་ཆོས་ཀྱི་ཡི་གེ་བྲིས་པའི་རྗེས་སུ་སྲོག་ཆགསས་སུམ་ཁོ་ན་འདི་ལྟ་སྟེ། རྨ་བྱ་གཉིས་ད་དང་། ཤྭ་བ་གཅིག་ཚོད་མའི་སླད་དུ་གསོད་དོ། །འོན་ཀྱང་ཤྭ་བ་ནི་རྟག་རེས་སུ་མིན་ནོ། །སྲོག་ཆགས་གསུམ་པོ་འདི་ཡང་མ་འོངས་པ་ན་གསོད་པར་མི་འགྱུར་རོ། །

བྲག་ངོས་གཉིས་པ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་རང་གི་རྒྱལ་ཁམས་ཀྱི་ཕྱོགས་ཐམས་ཅད་དང་། དེ་བཞིན་དུ་མཐའ་ཁོབ་ཀྱི་ཡུལ་རྣམས་འདི་ལྟ་སྟེ། ཅོཊཱ་པ་རྣམས་དང་། སྐྱ་སངས་རྣམས་དང་། ས་ཏི་ཡ་པུ་ཏོ་རྣམས་དང་། ཀེ་ཏ་ལའི་བུ་རྣམས་དང་། ཏམ་པནྀ་རྣམས་དང་། ཡོ་ནའི་རྐྱལ་པོ་ཨནྟི་ཡཀ་ཡང་། རྒྱལ་པོ་སུ་གང་ཞིག་ཨནྟི་ཡཀའི་ཡུལ་རང་ཉེ་བར་ཡོད་པ་རྣམས་ཀྱི་རྒྱལ་ཁམས་སུ་ཡང་སྟེ། ཕྱོགས་ཀུན་ཏུ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བས་སྨན་དཔྱད་རྣམ་པ་གཉིས་ཤིག་བཙུགས་ཏེ། མི་རྣམས་ཀྱི་དོན་དུ་བྱས་པའི་སྨན་དཔྱད་དང་། བ་ཕྱུགས་རྣམས་ཀྱི་དོན་དུ་བྱས་པའི་སྨན་དཔྱད་དོ། །གང་དང་གང་དུ་རྩྭ་སྔོན་པོ་མེད་པའི་ཕྱོགས་ཀུན་ཏུ། མི་རྣམས་ལ་ཕན་པར་བྱ་བའི་ཆེད་དང་། བ་ཕྱུགས་རྣམས་ལ་ཕན་པར་བྱ་བའི་ཆེད་དུ་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བས་དེ་དག་གཞན་ནས་འདྲེན་པ་དང་སྐྱེས་པའི་རྐྱེན་བྱས་སོ། །གང་དང་གང་དུ་རྩ་བ་དང་འབྲས་བུ་མེད་པའི་ཕྱོགས་ཀུན་ཏུ། མི་རྣམས་ལ་ཕན་པར་བྱ་བའི་ཆེད་དང་། ཕྱུགས་རྣམས་ལ་ཕན་པར་བྱ་བའི་ཆེད་དུ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བས། དེ་དག་གཞན་ནས་འདྲེན་པ་དང་སྐྱེས་པའི་རྐྱེན་བྱས་སོ། །མི་དང་ཕྱུགས་རྣམས་ལ་ཕན་པར་བྱ་བའི་ཆེད་དུ། ལམ་རྣམས་སུ་ཤིང་ལྗོན་པ་འཛུགས་པ་དང་། ཁྲོན་པ་བྲུ་བའི་རྐྱེན་བྱས་སོ། །

བྲག་ངོས་གསུམ་པ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་སྤྱི་པོ་ནས་དབང་བསྐུར་བ་ཐོབ་པའི་ལོ་བཅུ་གཉིས་པ་ལ། འདི་ལྟར་སྨྲ་བར་འགྱུར་བ་རྣམས་བཀས་བཅད་པ། ཆོས་དང་བྱ་བ་གཞན་གྱི་བསླབ་པ་ལ་རྗེས་སུ་འཇུག་པར་འགྱུར་བའི་དོན་འདི་ཁོ་ནར་རྟག་ཏུ་ལོ་ལྔ་ལྔ་ན་ཡུཀྟ་རྣམས་དང་། ར་ཛེ་ཀ་རྣམས་དང་། པྲདིཤིཀ་རྣམས་ཀྱིས་ཐགས་ཅད་དུ་ལྗོངས་རྒྱུ་ཞིང་བསྐོར་བར་བྱའོ། །རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་འདི་སྐད་དུ་སྨྲའོ། །ཕ་དང་མའི་བཀའ་ལ་མཉན་པ་ནི་ལེགས་པར་སྤྱོད་པའོ། །གྲོགས་རྣམས་དང་༑ མཛའ་བཤེས་རྣམས་དང་། སྣག་གི་གཉེན་མཚམས་རྣམས་དང་། བྲམ་ཟེ་དང་དགེ་སྦྱོང་རྣམས་ལ་སྦྱིན་པ་བྱེད་པ་ནི་ལེགས་པར་སྤྱོད་པའོ། །ལོངས་སུ་སྤྱོད་པ་ལ་ཚོད་ཤེས་པ་དང་༑ ཡོངས་སུ་འཛིན་པ་ལ་ཚོད་ཤེས་པ་ནི་ལེགས་པར་སྤྱོད་པའོ། །ཚོགས་རྣམས་ཀྱིས་ཀྱང་། རྣམ་པ་གཉིས་པོ་དོན་དང་བཅས་པ་དང་། རྒྱུ་མཚན་དང་བཅས་པའི་ཡི་གེ་འདི་གོ་རིམ་བཞིན་བྱེད་པའི་ཡུཀྟ་རྣམས་ཀྱི་བཀའ་ལ་མཉན་པར་བྱའོ། །

བྲག་ངོས་བཞི་བ། སྔོན་འདས་པའི་དུས་ལོ་བརྒྱ་ཕྲག་དུ་མའི་སྔ་རོལ་དུ། འདི་ན་རྟག་ཏུ་སྲོག་ཆགས་གསོད་པ་དང་། སེམས་ཅན་ལ་གནོད་པ་དང་། དགེ་སྦྱོང་དང་བྲམ་ཟེ་རྣམ་ལ་མ་གུས་པ་དང་། སྣག་གི་གཉེན་མཚམས་རྣམས་ལ་མ་གུས་པ་རྣམས་གོང་ནས་གོང་དུ་སྤྱོད་དོ། །འོན་ཀྱང་དེང་སང་ནི་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་ཆོས་ཀྱི་སྤྱོད་པའི་འབྲས་བུར། ཨེ་མ། རྔ་བོ་ཆེའི་སྒྲ་ནི་ཆོས་ཀྱི་སྒྲ་དབྱངས་སུ་གྱུར། ངོ་མཚར་བ་དག་ནི་སྐྱེ་བོ་རྣམས་ཀྱི་སྤྲོ་དགའ་ཉིད་དུ་གྱུར་ཏེ། ལྷའི་ཁང་བཟང་གི་ལྟས་མོ་དང་། གླང་པོ་ཆེའི་ལྟས་མོ་དང་། མར་མེའི་ཕུང་པོའི་ལྟས་མོ། གཞན་ཡང་ཁྱད་པར་དུ་འཕགས་པའི་གཟུགས་བརྙན་དག་སྟོན་པར་བྱེད་དོ། །འདི་ལྟར། སྔོན་འདས་པའི་དུས་ལོ་བརྒྱ་ཕྲག་དུ་མའི་བར་དུ་མ་བྱུང་བ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་ཆོས་ཀྱི་བསླབ་པ་ལ་བརྟེན་ཏེ༑ སྲོག་ཆགས་གསོད་པ་ལས་བཟློག་པ། སེམས་ཅན་ལ་གནོད་པ་ལས་བཟློས་པ། བྲམ་ཟེ་དང་དགེ་སྦྱོང་དང་སྣག་གི་གཉེན་རྣམས་ལ་གུས་པ་དང་། རྒན་རབས་ཀྱི་བཀའ་མཉན་པ་དང་༑ འདི་དང་གཞན་ཡང་རབ་ཏུ་མང་པའི་ཆོས་ཀྱི་སྤྱོད་པ་དག་འཕེལ་བར་གྱུར་ཏོ། །རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི་རྟག་ཏུ་ཆོས་ཀྱི་སྤྱོད་པ་འདི་དག་རྒྱས་པར་བྱའོ། །རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་བུ་དང་། ཚ་བོ། ཡང་ཚ་དག་ཀྱང་། ཆོས་ཀྱི་སྤྱོད་པ་འདི་དག་སྤེལ་བར་བྱའོ། །ཉམས་པར་མི་བྱའོ༑།ཇི་སྲིད་འཇིག་པ་ལ་ཐུག་གི་བར་དུ་ཡང་། ཆོས་ཀྱི་སྤྱོད་པ་ལ་གནས་ཤིང་ཆོས་ལ་འཇུག་པར་བྱའོ། །དེ་ཅིའི་ཕྱིར་ཞེ་ན། བྱ་བ་ཐམས་ཅད་ཀྱི་ནང་ན་མཆོག་འདི་ལྟ་སྟེ། ཆོས་ཀྱི་སྤྱོད་པ་ལ་གནས་ཤིང་ཆོས་ལ་འཇུག་པའོ༑ །དེའི་ཕྱིར་ཆོས་ཀྱི་སྤྱོད་པ་འདི་སྤེལ་ཅིང་ཉམས་པར་མི་བྱ་ལ། ཇི་ལྟར་བྲིས་པའི་དོན་འདི་ཡང་རང་ཉིད་ཀྱིས་སྤེལ་བར་བྱ་ཞིང་ཉམས་པར་མི་བྱ་ལ། ཉམས་པའི་བསྔགས་པ་ཡང་བརྗོད་པར་མི་བྱའོ། །ཡི་གེ་འདི་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་སྤྱི་བོ་ནས་དབང་སྐུར་བ་ཐོབ་པའི་ལོ་བཅུ་གཉིས་པ་ལ་བྲིས་སོ། །

བྲག་ངོས་ལྔ་བ། （འདིར་ཡི་གེ་མང་དུ་ཆག་ཀྱང་དོན་ཙམ་བསྡུས་པ།）རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་འདི་ལྟར་སྨྲའོ། །ཡང་དག་པའི་སྤྱོད་པ་ཉམས་པ་གསོ་བ་ནི་བྱ་དཀའ་བའོ། །གང་ཞིག་ཡང་དག་པའི་སྤྱོད་པ་གསར་དུ་སྤེལ་བ་ཡང་བྱ་དཀའ་བའོ། །རྒྱལ་པོ་ལྷ་རྣམས་ཀྱི་དག་བོ་མཐོང་ན་དགའ་བས་ནི་འདིར་ཡང་དག་པའི་སྤྱོད་པ་མང་པོ་ཞིག་གསར་དུ་སྤེལ་ཞིང་། ཡང་དག་པའི་སྤྱོད་པ་མང་པོ་ཞིག་ནི་ཉམས་པ་གསོས་ན། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་བུ་དང་ཚ་བོ་དང་ཡང་ཚ་དང་རྒྱུད་པ་རྣམས་ཀྱིས་ཀྱང་ཇི་སྲིད་འཇིག་པ་ལ་ཐུག་གི་བར་དུ་འདི་དག་གསོ་བར་བྱའོ། །འོན་ཏེ་སུ་ཞིག་འདིའི་ཆ་ཙམ་ཞིག་ཉམས་པར་བྱེད་ན་ཡང་སྡིག་པ་ལ་སྤྱོད་པ་ཉིད་དུ་གཟུང་བར་བྱའོ། །འདས་པའི་དུས་ན་ཆོས་ཀྱི་ལས་བྱེད་ཆེན་པོ་བྱ་བ་འདི་མ་མཆིས་སོ། །འོན་ཀྱང་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་སྤྱི་བོ་ནས་དབང་བསྐུར་བ་ཐོབ་པའི་ལོ་བཅུ་གསུམ་པ་ལ་བབས་པ་ན། ཆོས་ཀྱི་ལས་བྱེད་ཆེན་པོ་བྱ་བ་འདི་བཙུགས་ཏེ། དེ་ཡང་ཡོ་ན་རྣམས་དང་། ཀམྦོཛ་རྣམས་དང་། དྲི་ཟ་རྣམས་དང་། རིསྚིཀ་རྣམས་དང་། པེཏེཎིཀ་རྣམས་དང་། གཞན་ཡང་ནུབ་ཀྱི་ཕྱོགས་རྒྱལ་ཁམས་ཀྱི་མཐའ་ཀུན་ཏུ། ཆོས་ལུགས་སོ་སོའི་སྡེ་རྣམས་ལ་བལྟ་བའི་ཕྱིར་དང་། གསོད་པ་དང་བཙོན་དུ་འཇུག་པ་དག་ལ་བརྟག་པའི་ཆེད་དང་། རྒན་པོ་དང་བྱིས་པ་དང་མགོན་མེད་པ་དག་ལ་བལྟ་བའི་ཆེད་དུ་ཡིན་ནོ། །གང་དག་གི་གཉེན་དུ་གཏོགས་པ་དག་ཀྱང་ལས་འདི་བྱེད་དོ།།སྐྱ་ནར་བུའི་གྲོང་ཁྱེར་དང་ཡུལ་གཞན་ན་མཆིས་པ་གཉིས་ཀའི་དོན་དུ་ཡི་གེ་འདི་བྲིས་སོ། །

བྲག་ངོས་དྲུག་པ། (དོན་བསྡུས་པ)རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་རྟག་ཏུ་བཙུན་མོའི་འཁོར་གྱི་ནང་ངམ། སྟེང་གི་ཁང་བཟང་གི་གཞིའམ། སྐྱེད་མོས་ཚལ་ཡོད་ཀྱང་རུང་གི་སྐྱེས་བོ་རྣམས་ཀྱི་དོན་གང་ཡིན་པ་དག་ཞུ་བར་བྱ་སྟེ་དགའ་བར་མི་བྱའོ། །བདག་སྐྱེས་རྒུ་སྐྱོང་བ་ནི་ལན་ལ་རེ་བའི་ས་མིན་ཏེ། ཚེ་འདིར་ཡང་དེ་དག་བདེ་བ་དང་། ཕྱི་མ་ཡང་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེས་པའི་ཆེད་དུ་སྟེ། སྐྱེས་རྒུ་སྐྱོང་བ་ནི་ཁུར་ཡིན་ནོ་སྙམ་དུ་བདག་རྟག་ཏུ་སེམས་སོ། །

བྲག་ངོས་བདུན་པ། སྔོན་གྱི་རྒྱལ་པོ་རྣམས་ནི་རྔོན་བྱེད་པ་སོགས་ཀྱི་རྩེད་མོ་ལ་སྤྱོད་དོ༑ །རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི། དབང་བསྐུར་བའི་ལོ་བཅུ་པ་ལ་བབས་པ་ན། ཡང་དག་པའི་སངས་རྒྱས་ཀྱི་བསྟན་པ་ལ་ཞུགས་ཏེ། ཆོས་ཀྱི་རྩེད་མོ་རྣམ་པ་སྣ་ཚོགས་པ་འདི་ལྟ་སྟེ། བྲམ་ཟེ་དང་། རབ་བྱུང་དང་། རྒན་རབས་ལ་ཕུ་དུད་དང་། གསེར་གྱི་སྦྱིན་པ་དང་། ཡུལ་རྣམས་སུ་ཆོས་ཀྱི་བསླབ་པ་སྟོན་པ་དག་བྱེད་དོ། །

བྲག་ངོས་བརྒྱད་པ། རྒྱལ་པོ་ལྷ་རྣམས་ཀྱིདགའ་བོ་མཐོང་ན་དགའ་བ་འདི་ལྟར་སྨྲའོ། །འདི་ན་མི་རྣམས་ཀྱིས་བུ་དང་མནའ་མ་དང་མགྲོན་པོ་འབྱོར་བདག་གི་ཚེ་དང་། རང་གི་སྐྱེས་སྐར་ལ་བབས་པ་ན་དུས་སྟོན་བྱེད་དོ། །འོན་ཀྱང་བུད་མེད་ཀྱི་སླད་དུ་དུས་སྟོན་བྱེད་པ་དག་ཐ་ཆད་པའོ། །དེས་ན་དེང་ནས་བདག་ཅག་བྲམ་ཟེ་དང་། དགེ་སྦྱོང་དང་། རྒན་རབས་དང་༑ གཡོག་འཁོར་གྱི་ཆེད་དུ་དུས་སྟོན་བྱ་བར་རིགས་སོ། །

བྲག་ངོས་དགུ་པ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི། འདི་ལྟར་ཆོས་ཀྱི་རྗེས་སུ་འཇུག་པ་དང་། ཆོས་ཀྱི་བསླབ་པ་ལ་འཇུག་ཅིང་། སྤེལ་བ་ལས་གཞན་དུ། ཅི་ལ་ཡང་རྣམ་པར་རྒྱལ་བ་དང་། དོན་འགྲུབ་པ་ཞེས་བྱ་བར་མི་སེམས་སོ། །ཆོས་ཀྱི་རྗེས་སུ་ཞུགས་ཤིང་ཆོས་ཀྱི་བསླབ་པ་ལ་གནས་པ་འདི་ཁོ་ན་རྣམ་པར་རྒྱལ་བ་དང་། དོན་གྲུབ་པ་ཉིད་ཡིན་ནོ། །དེ་ཉིད་ཀྱི་ཕྱིར། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི་བྱ་བ་གང་ཅུང་ཟད་ཅིག་བྱེད་པ་ཐམས་ཅད་ཀྱང་། འཇིག་རྟེན་ཕ་རོལ་གྱི་སླད་དུ་ཡིན་ནོ། །འདི་ན་སྐྱེས་རྒུ་ཐམས་ཅད་ཀྱང་ཕ་རོལ་དུ་གདོན་མི་ཟ་བར་འཇིགས་པ་ཅུང་ཟད་ཅིག་དང་བཅས་ཏེ་འགྲོ་བ་ཡིན་ན། འཇིགས་པ་འདི་ཡང་གསལ་བར་ཆོས་མ་ཡིན་ནོ། །མཆོག་དང་དམན་པའི་མི་ཐམས་ཅད་ཀྱང་བཟོད་པ་མེད་པར་འཇིགས་པ་འདི་ཞི་བར་བྱེད་མི་ནུས་སོ། །ལྷག་པར་མི་གཙོ་བོ་དག་ལ་ནི་ལས་འདི་བྱ་དཀའ་བ་ཉིད་ཡིན་ནོ། །

བྲག་ངོས་བཅུ་པ། （དོན་བསྡུས་པ།）རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི་འདི་ལྟར། འདི་ན་ཆོས་ཀྱི་རྒྱལ་ཐབས་དང་། ཆོས་ཀྱི་གྲོགས་དང་། ཆོས་ཀྱི་བསླབ་པ་ལ་ཞུགས་ཏེ། རྣམ་པར་རྒྱལ་བ་ལས་ལྷག་པའི་རྣམ་པར་རྒྱལ་བའི་ཚུལ་གཞན་མ་མཐོང་ངོ་། །དེ་ཡང་ཕ་མ་དང་གཉེན་ལ་བྱམས་པ་དང་། དགེ་སྦྱོང་དང་བྲམ་ཟེ་ལ་གུས་པ་ད་ང། སྲོག་ཆགས་གསོད་པ་ལས་ལྡོག་པ་དག་ཡིན་ནོ། །གལ་ཏེ་འགའ་ཞིག་འདི་བཞིན་སྤྱོད་ན་དེ་དག་ཚེ་འདིར་ཡང་རྣམ་པར་རྒྱལ་བར་འགྱུར་ཞིང་། འཇིག་རྟེན་ཕྱིར་མར་ཡང་རྣམ་པར་རྒྱལ་བར་འགྱུར་རོ། །

བྲག་ངོས་བཅུ་གཅིག་པ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ནི། རབ་ཏུ་བྱུང་བའམ་ཁྱིམ་ན་གནས་པའི་ཆོས་སྤྱོད་པ་ཐམས་ཅད་ལ། རྣམ་པ་གཉིས་པོ་བསྙེན་བཀུར་དང་སྤང་པ་དག་ཕུལ་ཏེ་གུས་པ་བྱེད་དོ། །དེ་ལྟ་མོད་ཀྱི་རྒྱལ་པོ་ལྷ་རྣམས་ཀྱི་མཐོང་ན་དགའ་བ་ནི་ཆོས་ཀྱི་སྤྱོད་པ་ལ་ཇི་ལྟ་བར་བྱས་པ་དེ་ལྟ་བུར་རྒྱལ་བ་དང་བསྙེན་བཀུར་བྱ་བར་མི་འོས་སོ། །ཆོས་ཀྱི་སྤྱོད་པ་སྤེལ་བའི་རྩ་བ་ནི་ཚིག་བསྲུང་པའི་སྒོ་ནས་རང་གི་ལུགས་ལ་གནས་མ་ཡིན་པར་བསྔགས་པ་དང་། གཞན་གྱི་ལུགས་ལ་སྨོད་པ་མེད་པར་ཀུན་ཏུ་བཏང་སྙོམས་སུ་གནས་པ་འདི་ཡིན་ནོ། །འོན་ཀྱང་གཞན་གྱི་ལུགས་ལ་ནི་རྣམ་པ་ཀུན་ཏུ་གུས་པར་ཡང་བྱའོ། །གལ་ཏེ་འགའ་ཞིག་འདི་བཞིན་དུ་སྤྱོད་ན། དེས་ནི་རྣམ་པ་གཉིས་པོ་འདི་ལྟ་སྟེ། རང་གི་ལུགས་སྲུང་བ་དང་། གཞན་གྱི་ལུགས་ཀྱང་སྲུང་བར་བྱེད་པའོ། །གང་གི་ཕྱིར། སུ་ཡང་རང་གི་ཆོས་ལུགས་ལ་ཞེན་པ་དང་། ལུགས་ཀྱི་གྲགས་པ་གསལ་བར་བྱ་བའི་བསམ་པས་རང་གི་ལུགས་ལ་བསྔགས་པ་དང་། གཞན་གྱི་ལུགས་ལ་སྨོད་པར་བྱེད་པ་ནི། ཅུང་ཟད་ཅིག་རང་གི་ལུགས་ལ་རྨ་ཚབས་ཆེ་བར་འབྱིན་པ་ཡང་ཡིན་ནོ། །མཐུན་པའི་ལས་ནི་ཆོས་ཀྱི་སྤྱོད་པ་ཡིན་པས། དེ་དག་གིས་ཕན་ཚུན་གྱི་ཆོས་འདུལ་པ་ལ་ཐོས་པ་དང་གུས་པར་བྱའོ། །གང་གི་ཕྱིར༑ རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བའི་བསམ་པ་ནི། ཆོས་ལུགས་གང་ཅི་ཡང་རུང་སྟེ་ཐམས་ཅད་ཀྱང་བསླབ་པ་ཡོངས་སུ་རྫོགས་པར་བྱེད་པ་དང་། བསླབ་པ་ཡང་དག་པར་བྱེད་པ་ཉིད་ཡིན་ནོ་སྙམ་དུ་སེམས་སོ། །སུ་ཡང་བསྙེན་བཀུར་འདོད་པ་རྣམས་ཀྱིས་ཆོས་ཀྱི་སྤྱོད་པ་ལ་གུས་པར་བྱ་ཡི། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ལ་ནི་དེ་ལྟ་མ་ཡིན་ནོ། །དོན་འདི་ཉིད་ཀྱི་སླད་དུ། ཆོས་ཀྱི་མཧཱམཱཏྲ་རྣམས་དང་། བུད་མེད་རྣམས་སྐྱོབ་པའི་མཧཱམཱཏྲ་རྣམས་དང་། དུད་འགྲོ་རྣམས་བསྲུང་བའི་མཧཱམཱཏྲ་རྣམས་དང་། གཞན་ཡང་མང་དུ་བཙུགས་སོ། །འདི་ནི་འདི་ན་སྐྱེས་བུ་འགའ་ཞིག་གིས་ཆོས་ཀྱི་སྤྱོད་པ་གོང་དུ་སྤེལ་བའི་འབྲས་བུ་ཡིན་ནོ་ཞེས་བསམ་པར་བྱའོ། །

བྲག་ངོས་བཅུ་གཉིས་པ། ཀལིངྒ་པ་རྣམས་ལས་གང་ཞིག་བསད་པར་གྱུར་བ་ནི་བརྒྱ་སྟོང་ཕྲག་དུ་མ་དང་། སྐབས་མང་པོར་འབྲོག་སྟོང་ཆེན་པོར་བྲོས་ཤིང་ཟས་དང་ཆུ་མ་རྙེད་པར་རྐྱེན་དེ་ཉིད་ཀྱིས་ཤི་བར་གྱུར་བ་ཡང་གྲངས་མེད་དོ། །དེ་དག་དེ་ལྟར་བསད་ཅིང་ཤི་བ་དང་ཀལིངྒ་པ་རྣམས་ཀྱི་ཉམས་ཐག་པའི་གནས་སྐབས་དེ་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བོས་རྟག་ཏུ་ནད་དང་བཅས་པ་དང་། ཡི་མུག་དང་བཅས་པའི་སེམས་ཀྱིས་བསམ་པར་བྱེད་དོ། །དེ་དག་དེ་ལྟར་བསད་ཅིང་ཤི་བའི་གནོང་འགྱོད་ཀྱིས་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་འདི་དང་མ་འོངས་པའི་དུས་ཀུན་ཏུ་ཆོས་ཀྱི་སྤྱོད་པ་བརྩོན་ཏོ༑ །ཀལིངྐ་པ་རྣམས་ལས་གང་ཞིག་དགེ་སྦྱོང་དུ་གྱུར་བ་དང་། བྲམ་ཟེར་གྱུར་པ་དང་། གཞན་ཡང་པ་མ་ལ་གུས་པ་དང་རྒན་རབས་ལ་གུས་པ་དག་དང་། དེ་དག་གི་སྣག་གི་གཉེན་མཚམས་དང་བརྩེ་བའི་མཛའ་གྲོགས་རྣམས་ལ་དེ་ལྟར་སྡུག་བསྔལ་པར་བྱས་ཤིང་། བསོད་ནམས་མ་ཡིན་པ་ཉམས་དམས་པ་འདི་ལྟ་བུ་ཕབས་སོ། །གནས་སྐབས་འདི་རྣམས་ནི་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བས་རྟག་ཏུ་ནད་དང་བཅས་པ་དང་ཡི་མུག་དང་བཅས་པའི་སེམས་ཀྱིས་བསམ་པར་བྱེང་དོ། །རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་ཡུལ་རྣམ་པ་བཞི་པོ་འདི་ལྟ་སྟེ། ཡོ་ན་རྣམས་དང་། ཀམོཛ་རྣམས་དང་། ཨརྩྭར་རྣམས་དང་༑ པ་རིནྡ་རྣམས་ལས་རྒྱལ་ཏེ། ཡུལ་འདི་དག་ཀུན་ཏུ་རྒྱལ་པོ་ལྷ་རྣམས་ཀྱིདགའ་བོ་མཐོང་ན་དགའ་བའི་ཆོས་ཀྱི་བསླབ་པ་ལ་མཉན་པར་བྱེད་དོ། །ཆོས་ཀྱི་བསླབ་པ་ཚེ་འདི་དང་ཕྱི་མ་དག་ཏུ་བདེ་བར་འགྱུར་བ་ལ་མཉན་པར་བྱེད་དོ། །རྒྱལ་ཁམས་ཀྱི་རི་བྲག་པ་རྣམས་ལ་ཡང་རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བ་དེང་ནས་སྲོག་ཆགས་སུ་གྱུར་བ་ཐམས་ཅད་ལ་འཚེ་བ་ལས་ལྡོག་གོ་ཞེས་གོ་བར་བྱས་སོ། །

བྲག་ངོས་བཅུ་གསུམ་པ། ཆོས་ཀྱི་ཡི་གེ་འདི་བསྡུས་པའམ་འབྲིང་ངམ་རྒྱས་པ་ཡང་རུང་སྟེ། རྒྱལ་པོ་ལྷ་རྣམས་ཀྱི་དགའ་བོ་མཐོང་ན་དགའ་བས་བྲིས་པ་ཉིད་ཡིན་ནོ། །བདག་གི་སེམས་མ་མཉམ་པ་དང་། ཡིག་མཁན་དང་། རྐྱེན་གཞན་གྱིས་ཀྱང་རུང་སྟེ་ཅུང་ཟད་ཅིག་ནི་འཁྲུལ་བར་ཡང་སྲིད་དོ། དོན་འགའ་ཞིག་ནི་སྐྱེས་ངོ་རྣམས་འཇུག་པར་བྱ་བའི་སླད་དུ་ཡང་དང་ཡང་དུ་བཟླས་ཏེ་ཡང་བྲིས་སོ། །བདག་གི་རྩོལ་སྲིད་ཀྱི་ཡུལ་ནི་རྒྱ་ཆེ་བས་མང་པོ་ཞིག་ནི་བྲིས་ཟིན་ཅིང་། ད་དུང་ཡང་མང་དུ་འབྲི་བར་འདོད་དོ། ། རྒྱལ་པོ་འདིའི་ཆོས་ཀྱི་ཡི་གེ་རྒྱ་གར་གྱི་ཡུལ་གྲུ་དུ་མར་མཆིས་པ་ལས། ཕྱོགས་གཅིག་ཏུ་བྲིས་པ་ལ་འདི་མང་ཤོས་ཡིན་ཞིང་། དོན་འགངས་ཆེན་དུ་མ་ཡང་འདུས། ཆོས་ཀྱི་རྒྱལ་པོ་ཆེན་པོ་འདིའི་བཀའ་དྲིན་དྲན་པར་བྱ་བའི་སླད་དུ། མཁས་པ་དུ་མ་ལ་འདྲི་རྟོགས་ཀྱིས་དཀའ་ཚེགས་རྒྱ་ཆེན་པོ་དང་བཅས་དགེ་འདུན་ཆོས་འཕེལ་གྱིས་བྲིས་པ་ལགས།

རྒྱལ་པོ་འདིའི་མཚན་ལ་དེ་བ་ནམ་སྲི་ཡ་དཪྴའམ་ལྷ་སྲས་ཀྱི་དགའ་བོ་མཐོང་ན་དགའ་བོ་ཞེས་རང་རེའི་ལོ་རྒྱུས་གང་དུ་ཡང་མ་མཐོང་མོད། ལྷོ་ཕྱོགས་མ་ལ་ཡའི་ཡུལ་མཥྐིབྱན་རྒྱལ་པོ་འདིའི་ཡི་གེ་བྲག་ངོས་སུ་ཡོད་པ་གཅིག་ལ་དེབནཾཔིཡསཨསོཀསཨངྷིཀཱནིབསནི། ལྷ་རྣམས་ཀྱི་དགའ་བོ་མྱ་ངན་མེད་པ་ལོ་ཕྱེད་ལྷག་པའི་གསུམ་ནས་སངས་རྒྱས་ཀྱི་རྗེས་སུ་འབྲངས་བར་གྱུར། དགེ་འདུན་གྱི་རྗེས་སུ་འབྲངས་བར་གྱུར། ཅེས་ཡོངས་གྲགས་ཀྱི་མཚན་དངོས་སུ་འཐོན་ཏེ་བྲིས་ཤིང་། བཙུན་པ་སངས་རྒྱས་དབྱངས་ཀྱི་ལུང་རིང་པོའི་རྡོ་འབྱེད་དུ་ཡང་རྒྱལ་པོའི་མཚན་ལ་སྲི་ཡ་དཪྴར་བྲིས་ཤིང་། སིང་གྷ་ལའི་རྒྱལ་རབས་དྭེཔཝཾཤརབ། པིཡདསན་དང་། སུདསན། ཨཤྭཀ། ངྷརྨཱཤྭཀ་བྱ་བའི་མིང་བཞི་བྱུང་བས་ཤིན་ཏུ་གསལ་བར་ངེས་ནུས་ལ་དཪྴལདས་དང་པྲིཡ་སོགས་བྱུང་བ་རྣམས་པྲ་ཀྲི་ཏར་ཤེས་པར་བྱའོ།།

རྒྱལ་〔པོ〕རང་གིས་རྡོ་ཡིག་ལ་གསུངས་〔པ〕བཞིན། ཆོས་ལུགས་ཀུན་ལ་ཡང་གུས་པར་མཛད་པའི་རྟགས་ལྟ་བུ་ད་ལྟའི་བར་ག་ཡ་དང་ཉེ་བ་བརབྷར་ཞེས་བྱ་བའི་རི་ལ་མུ་སྟེགས་གཅེར་བུའི་སྡེ་ཚན། ཨཱཇཱིབིཀ་འཚོ་ས་བྱ་བ་དག་གི་སྡོད་གནས་སུ་རྒྱལ་པོ་འདིས་ཆེད་གཉེར་གྱིས་བསྐྲུན་པའི་བྲག་གི་ཁང་བ་ཡི་གེ་དང་བཅས་པ་ཞིག་ཀྱང་བསྟར་ཡོད་དོ།། །།