གསང་སྔགས་ལུགས་ཀྱི་མཆོད་པ་དང་བསྒྲལ་བའི་རྣམ་བཤད་མདོར་བསྡུས་པ་

༄༅།།གསང་སྔགས་ལུགས་ཀྱི་མཆོད་པ་དང་།བསྒྲལ་བའི་རྣམ་བཤད་མདོར་བསྡུས་པ་བཞུགས།

དེ་ལ་མཆོད་པ་འབུལ་བ་ལ་དོན་གསུམ་སྟེ། ཕྱི་ནང་གསང་བའོ། །དེ་ལ་ཕྱིའི་ལ་ཡང་གཉིས་ཏེ། དེ་ལ་ཕྱིའི་སྤྱིའི་དབང་དུ་མཆོད་པའི་སྤྲིན་ཕུང་རབ་འབྱམས་བླ་ན་མེད་པར་བསྔོས་ཏེ་དེ་མང་བ་ནི་སེམས་ཀྱི་སྟོབས་ཀྱིས་སོ། །ཁྱད་པར་དུ་བསྔོ་བ་ནི་དམར་ཆེན་གྱི་ཨརྒཾ་སྦྲེང་ཞིང་།ཛཿཧཱུཾ་བཾ་ཧོ་ཤྲཱི་ཧེ་རུ་ཀ། ཨ་བེ་ཤ་ཡ་ཨ་བེ་ཤ་ཡ། པྲ་བེ་ཤ་ཡ་པྲ་བེ་ཤ་ཡ།མ་ཧཱ་ཨརྒྷཾ་པྲ་ཏཱི་ཛ་ཧོ། དེ་བཞིན་དུ་གཙོ་བོ་དང་འཁོར་ཀུན་གྱི་མཚན་ནས་བརྗོད་ཅིང་དམར་རེ་སྦྲེང་ངོ་། །ཡིད་བཞིན་བདུད་རྩི་མཆོད་ཡོན་དཔལ་གྱི་སྐུ་ལ་ཐིམ་པར་བསམ་མོ། །ཛཿཧཱུཾ་བཾ་ཧོ། །ཤྲཱི་ཧེ་རུ་ཀ་ཨི་དན་པུས་པ་དཱི་པཾ་དྷཱུ་པེ་བ་ལིན་ཏ་ཨརྒཾ་པྲ་ཏཱི་ཛ་ཧོ། །ཞེས་བརྗོད་དེ། དེ་ལ་ཨི་ དན་ཅེས་པ་ནི་དྲི་ཆབ་སྟེ། དེ་ཡང་ཕྱི་ཡན་ལག་བརྒྱད་དང་ལྡན་པའི་ཆུ་ལ་དྲི་རྣམ་པ་ལྔ་བླུག་ནས་ཆོས་ཉིད་རྣམ་པར་དག་པའི་སྔགས་དང་ཆུ་ལྔས་བྱིན་གྱིས་བརླབས་པའོ། །ནང་གི་ནི་བདུད་རྩི་ལྔ་སྦྱར་བ་ལ།ཁྲོ་མོ་དབང་ཕྱུག་མའི་སྔགས་ཀྱི་བྱིན་གྱིས་བརླབས་པའོ། །གསང་བར་ཐབས་ཤེས་རབ་ཀྱི་བྱང་ཆུབ་སེམས་དཀར་དམར་གཉིས་རྡོ་རྗེའི་ཆུ་དང་སྦྱར་ནས། ཡི་གེ་གསུམ་གྱིས་བྱིན་གྱིས་བརླབ་པའོ། །པུས་པ་ནི་མེ་ཏོག་སྟེ། ཕྱིའི་ནི་མཱ་ལི་ཀ་དང་ཡུ་ཏི་ཀ་དང་། ཨུད་པ་ལ་དང་ཀུ་མུ་ད་ལ་སོགས་པའོ། །ནང་གི་ནི་ཏིང་ངེ་འཛིན་ལས་བྱུང་བ་དང་། ལྷ་མོའི་ཚོགས་རྣམས་སོ། །གསང་བ་ནི།ཡང་ན་ཁྲག་གོ །དེ་ཡང་། ཁྲག་ནི་མེ་ཏོག་ཡིན་པར་བཤད། །ཅེས་གསུངས་སོ། །དྷུ་པ་ནི་བདུག་པ་སྟེ་དེ་ཡང་ཕྱིའི་ནི་ཨ་རུ་ར་༼ཨ་ག་རུ་ཡིན་ནམ་དཔྱད།ཅེས་རྨུགས་སངས་ཤིང་པར་དུ་མཆན་འདུག༽དང་དུ་རུ་ཀ་ལ་སོགས་པའོ། །ནང་གི་ནི་ཚིལ་ཆེན་དང་དུར་ཁྲོད་ཀྱི་ཐལ་བའོ། །གསང་བ་ནི་ཡབ་ཡུམ་གྱི་བྱང་ཆུབ་སེམས་ལས་དྲི་བྱུང་བའོ། ། དཱི་པ་ནི་མར་མེ་སྟེ། ཕྱི་ནི་རྔོས་པའོ། །ནང་ནི་གཡུལ་དུ་ཤི་བའི་ཐོད་ཚལ་སྐྱོན་མེད་པར་སོར་མོ་བསྐམ་ལ་དྲི་ཞིམ་པོར་བཙོས་ནས་སྙིང་པོ་བྱས་ཏེ། ཚིལ་ཆེན་གྱི་མར་ཁུ་ལ་མེ་བཏང་བའོ། །གསང་བ་ཡུམ་གྱི་པདྨར་རྡོ་རྗེ་བཞག་སྟེ་བསྐྱོད་པའམ་འོད་ཟེར་འཕྲོ་བའོ། །ཨརྒྷཾ་ནི་ཡོན་ཆབ་སྟེ་དེ་ཡང་ཕྱིའི་ནི་ཆུ་གཙང་འོ་མ་བསྲེས་པའོ། །ནང་གི་ནི་འཛའ་གད་དོ། །གསང་བ་ནི་ཞིང་ཆེན་པོའི་སྙིང་ཁྲག་དང་། མཱཾ་ས་དང་།རུ་དིར་རྣམས་བསྲེས་པའོ། །བྷ་ལིན་ཏ་ནི་གཏོར་མ་སྟེ། དེ་ཡང་འབྲུ་སྣ་ཚོགས་དང་ཆང་དང་འཁུར་བ་ལ་སོགས་པའོ། །ནང་སྐྱེས་བུ་རེམ་པ་གཡུལ་དུ་ཤི་བའི་ཤ་དང་། གློ་བ་དང་། ཁྲག་དང་། ཚིལ་བུ་དང་། ཀླད་པ་དང་། མཚན་མ་དང་རྐང་ལ་སོགས་པའོ། །གསང་བ་ནི་ཡུམ་གྱི་བྱང་སེམས་སོ། །དེ་དག་བྱིན་གྱིས་བརླབ་པ་ནི་གཞུང་བཞིན་དུ་སྟེ་མན་ངག་ཏུའོ། །མདོར་ན་རྫས་དང་འབྲེལ་བ་ཐམས་ཅད་ཕྱིའོ།།ཏིང་ངེ་འཛིན་དང་འབྲེལ་བ་ཐམས་ཅད་ནི་གསང་བར་ཤེས་པར་བྱའོ། །སྔགས་ནི་གོང་མའི་རྟིང་ལ།ཤྲཱི་མན་ཁ་ཁ་ཁཱ་ཧི་ཁཱ་ཧི། །ཛཿཧཱུཾ་བཾ་ཧོཿ། །ཤྲཱི་ཧེ་རུ་ཀ་ཨ་བེ་ཤ་ཡ་ཧོ།ཚིག་ནི་ཧེ་རུ་ཀའི་གནས་བཅུ་དང་ངོ་། །དཔལ་ཆེན་བུདྡྷ་ཧེ་རུ་ཀ་དང་།ཡུམ་ཆེན་ཀྲོ་ཏི་ཤྭ་རི་ལ། ཅེས་པ་ནི། ཟག་པ་དང་བཅས་པའི་གཟུགས་ཀྱི་ཕུང་པོ་དང་། ཕྱིན་ཅི་ལོག་གི་གཏི་མུག་གནས་སུ་དག་ཅིང་ཡང་དག་པའི་གཏི་མུག་ཆེན་པོར་སངས་རྒྱས་པའི་རང་བཞིན། ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། དེ་བཞིན་གཤེགས་པའི་རིགས་ཀྱི་ཁྲག་འཐུང་ཆེན་ པོ་དང་། དེའི་ཡེ་ཤེས་ཀྱི་ཡུལ་དུ་གྱུར་པ་དེ་བཞིན་རིགས་ཀྱི་ཁྲོ་མོ་ དབང་ཕྱུག་མའོ། །དེས་འགྲེའོ། །དེ་རྣམས་ལ་དམ་ཚིག་གི་མཆོད་པ་ འབུལ་ཅེས་པ། དམ་ཚིག་གི་ངོ་བོར་གྱུར་པ་ཡང་ཡིན་ལ། སྐུ་གསུང་ ཐུགས་མཉེས་པར་བྱེད་པའི་མཆོད་རྫས་སམ་དམ་རྫས་ཀྱང་ཡིན་ལ། དམ་ཚིག་ལས་མི་འདའ་ཞིང་། དམ་ཚིག་རྗེས་སུ་བསྐུལ་བར་བྱེད་པའི་ མཆོད་རྫས་ཡིན་པས་དམ་ཚིག་མཆོག་གི་མཆོད་པའོ། །མཆོད་པའི་ཏིང་ ངེ་འཛིན་ནི། ཡེ་ཤེས་ལྔའི་འོད་ཟེར་འཕྲོ་བས་སོ་སོའི་ཞལ་དུ་ཐིམ་ཞིང་ མཉེས་པར་བསམ་མོ།།མཆོད་པའི་རྫས་དང་། མཆོད་པའི་གནས་དང་། མཆོད་པའི་འབྲས་བུ། མཆོད་པའི་སྔགས། མཆོད་པའི་ཡོན་ཏན་དང་དྲུག་གོ །སྒྲོལ་བ་ལ་གཉིས་ཏེ། ཐུན་མོང་དང་ཐུན་མོང་མ་ཡིན་པའོ། །ཐུན་མོང་ནི། བྱང་ཆུབ་སེམས་ཀྱི་ཁ་དང་སྦྱར་བའོ། །ཐུན་མོང་མ་ཡིན་པ་ནི།རྟོག་པས་བདག་བསྒྲལ་བ་སྟེ། དེ་ཡང་རྟོགས་པ་རྣམ་པ་བཞི། དག་པ་རྣམ་པ་གསུམ། མཉམ་པ་རྣམ་པ་བཞི་ཀློང་དུ་གྱུར་པས་བདག་ཉིད་འཁོར་བ་དང་ངན་སོང་ལས་བསྒྲལ་བའོ། །ཐུགས་རྗེས་གཞན་བསྒྲལ་བ་ལ་དོན་བཞི་སྟེ། ཐབས་ཀྱིས་བསྒྲལ་བ་དང་། ཏིང་ངེ་འཛིན་གྱིས་དང་།ནུས་མཐུས་དང་། མངོན་སྤྱོད་ཀྱིས་བསྒྲལ་བའོ། །དེ་ལ་ཐབས་ཀྱི་ནི།གང་མི་ལ་སོགས་པ་དབང་པོའི་སྤྱོད་ཡུལ་དུ་སྣང་བ་རྣམས་ལ། བློ་དང་སྦྱར་བའི་ཆོས་འཆད་ཅིང་དགེ་བའི་ལམ་ལ་འཛུད་པའོ། །དེ་ལ་ཏིང་ངེ་འཛིན་ནི། ཁྱད་པར་དུ་དམྱལ་བ་ལ་སོགས་པ་རྣམས་ལ། བདག་ཉིད་ཕྱག་རྒྱར་གསལ་བའི་ཐུགས་ཀའི་འོད་ཟེར་འཕྲོ་འདུ་ལས་ལྕགས་ཀྱུ་ལ་སོགས་པས་སེམས་ཅན་ཐམས་ཅད་ཐུགས་ཀར་བསྡུས་ཏེ་སྐུའི་དབྱིག་ཏུ་གྱུར་པ་ལས། གསང་ལམ་ནས་བཏོན་ཏེ་སྐུར་བསྐྱེད་བྱིན་གྱིས་རླབས་དབང་ བསྐུར་བའོ། །མཐུས་ནི། དུར་ཁྲོད་ལ་སོགས་པའི་གནས་སུ་གྲུ་གསུམ་ལ་སོགས་པའི་དལ་བསྐྱེད་ལ། ཤིན་ཏུ་ཁ་བ་དང་རྩུབ་པ་དང་གནག་པ་དང་དུག་དང་ཉུང་དཀར་ལ་སོགས་པ་ལ་བརྟེན་ཏེ་བྱ་བ་དང་། ཤིང་ཚེར་མ་ཅན་ལ་སོགས་པ་ལ་ལིང་ག་བྲིས་ཏེ་ཕོ་ཉས་དགུག་པ་བྱས་ལ།གཏུབ་པ་དང་བསྲེག་པ་ལ་སོགས་པ་བྱས་ལ། རྣམ་པར་ཤེས་པ་ཧཱུཾ་དུ་བསྡུས།ཕཊ་ཀྱིས་འོག་མིན་གནས་སུ་རིགས་ལྔ་ཡབ་ཡུམ་སྦྱོར་མཚམས་སུ་འཕང་ལ་སྲས་སུ་བསྐྱེད་པའོ། །མངོན་སྤྱོད་ལ་དགུ་སྟེ། སློབ་དཔོན་ཇི་ལྟ་བུས་བསྒྲལ་བ་དང་། གང་བསྒྲལ་བ་དང་། གང་དུ་བསྒྲལ་བ་དང་། ཏིང་ངེ་འཛིན་ཇི་ལྟ་བུས། ཚུལ་ཇི་ལྟར། འབྲས་བུ་གང་དང་། བསྒྲལ་བ་གནས་སུ་སྟོབ་ན་ཡོན་ཏན་ཇི་ལྟར་འཐོབ་པ་དང་། གནས་སུ་མ་བསྟབ་ན་ཉེས་ཅིར་འགྱུར་བ་དང་། མ་བསྒྲལ་བར་བཞག་ན་སྐྱོན་ཅི་ཡོད་པའོ།།ལུང་དང་མན་ངག་མཁས་པ། དམ་ཚིག་ལ་སེལ་མེད་པ།ལུས་ངག་ཡིད་གསུམ་སྐུ་གསུང་ཐུགས་ཀྱི་ཏིང་ངེ་འཛིན་གྱི་དབང་ཐོབ་པ། སེམས་ལས་སུ་རུང་བ། ཤེས་རབ་དང་སྙིང་རྗེར་ལྡན་པ།ཕྱི་ནང་གི་དབང་ཐོབ་པ།གང་བསྒྲལ་བ་དེའི་རྣམ་ཤེས་གང་དུ་སྐྱེ་བ་རྟོགས་པ། སྡིག་མཛུབ་བཙུག་པ་དང་མཚོན་ཆ་འཕྱར་བ་ཙམ་གྱིས་འཆི་བར་བྱེད་ཅིང་གཏན་འཕོ་བར་ནུས་པའོ། །སྤྱི་དང་ཁྱད་པར་རོ། །སྤྱི་ནི་མི་ཁོམ་པའི་གནས་བརྒྱད་དུ་སྐྱེ་བ་རྣམས་སོ། །ཞིང་བཅུ་ལྟ་བུ་ལ་སོགས་པ་རྣམས་ནི་ཁྱད་པར་རོ། །ཚད་མེད་པ་བཞི་དང་ལྡན་པའི་སྒོ་ནས་ལྷའི་སྐུར་གསལ་བ་དང་།སྔགས་ཀྱི་བཟླས་བརྗོད་ཀྱི་འཕྲོ་འདུས་ངན་པ་སྦྱངས་པ་གསེར་བཞུ་བ་ལྟ་བུའི་ཏིང་ངེ་འཛིན་སྔོན་དུ་བསྒོམ་པའོ། །འོག་མིན་གྱི་གནས་སུའོ། །ལུས་ཀྱི་གནས་ལྔར་དཔའ་བོ་འབྲུ་ལྔ་བཀོད་དེ་དེའི་ཡེ་ཤེས་ཀྱི་འཕྲོ་འདུས་སྒོ་གསུམ་གྱི་བག་ཆགས་བསྲེགས་ཏེ། འབྱུང་བའི་སྒོ་དགག་པ་དང་སྐྱེ་བའི་རྒྱུན་གཅད་པའོ། །ཤེས་པ་ཧཱུཾ་དུ་གནས་པ་དེ་སྦྱོར་བའི་ལྷུམས་སུ་ཕཊ་ ཀྱིས་འཕང་བའོ། །ཕུང་པོ་མཆོད་སྦྱིན་དུ་བསྔོས་པ་དང་རྣམ་པར་ཤེས་པ་ཡེ་ཤེས་སུ་བྱས་པས་ཚོགས་གཉིས་རྫོགས་པའོ། །བདག་གཞན་འཁོར་བ་ དང་ངན་སོང་གི་རྒྱུ་གསོག་པར་འགྱུར་རོ། །བདག་གིས་བསྒྲལ་བའི་ནུས་ པའི་མཐུ་ཡོད་ལ། ཕ་རོལ་བསྒྲལ་བའི་འོས་སུ་སྣང་བ་ལ་མ་བསྒྲལ་ན། འགྲོ་བའི་དོན་ཡལ་བར་དོར་བས་ཐེག་པ་ཆེན་པོའི་གཞུང་དང་འགལ།སྤྱད་པར་བྱ་བའི་དམ་ཚིག་ཉམས་ཏེ་ཉེས་པའི་རྩ་བར་འགྱུར་རོ། །ཞེས་སློབ་དཔོན་ཀུན་དགའ་སྙིང་པོས་བཤད་དོ། །སློབ་དཔོན་སཱུརྱ་སིང་ཧས། རང་བཞིན་གྱི་སྦྱོར་སྒྲོལ་དང་། ཏིང་ངེ་འཛིན་དང་། དབང་པོ་ཡུལ་དུས་ཀྱི་དང་། ཐབས་ཆེན་པོའི་དང་། མངོན་དུ་བྱུང་བ་དང་།སྦྱོར་སྒྲོལ་བདག་ལ་རྫོགས་པ་དྲུག་དྲུག་ཏུ་བསྟན་ནོ། །རྫོགས་སོ། །