གསང་བ་སྙིང་པོ་

དེ་ལྟར་བོད་ཡུལ་འདིར་འདུལ་བའི་བསྟན་པ་ལ་འཕེལ་འགྲིབ་ཆེར་བྱུང་མོད་ཀྱི། ཐེག་པ་ཆེན་པོ་གསང་སྔགས་ཀྱི་བསྟན་པ་ནི། དིང་སང་གི་བར་དུ་ནུབ་མ་མྱོང་ཞིང༌། པཎྚི་ཏ་སྨྲྀ་ཏི་བྱོན་པའི་གོང་ཡན་ཆོད་ལ་གསང་སྔགས་རྙིང་མ་ཞེས་བརྗོད་དེ། དེ་ལ་རྙིང་མ་བ་དག་གི་ལུགས་ལ། ཏནྟྲ་སྡེ་ཆེན་པོ་བཅོ་བརྒྱད་ཅེས་བཤད་པའི་ཐོག་མ་གསུམ་ནི། དཔལ་གསང་བ་འདུས་པ། ཟླ་གསང་ཐིག་ལེ། སངས་རྒྱས་མཉམ་སྦྱོར་རྣམས་ལ་ཐུགས་གསུང་སྐུའི་རྒྱུད་ཅེས་བྱས་ནས། དེ་དག་གི་བཤད་པ་ཡང་རིང་དུ་བྱུང་སྣང་སྟེ། བུ་སྟོན་རིན་པོ་ཆེས་བསྟན་འགྱུར་གྱི་དཀར་ཆག་ཏུ། རྡོ་རྗེ་བཞད་པའི་སྐོར་གྱི་ལེའུ་ཞེས་ཚན་པ་གཅིག་ཏུ་མཛད་པའི་རྡོ་རྗེ་བཞད་པའི་གསང་བ་འདུས་པའི་འགྲེལ་པ་ན། གསང་བ་སྙིང་པོའི་རྒྱུད་མང་དུ་དྲངས་ཤིང༌། བཤད་པའི་ཚུལ་ཡང་དེ་དང་མཐུན་ལ། འདུས་པ་ཕྱི་མའི་འགྲེལ་པ་བི་ཤྭ་མི་ཏྲས་མཛད་པ་བུའི་བསྟན་འགྱུར་ན་བཞུགས་པ་ཡང་རྙིང་མ་ཁོ་ནར་སྣང་ལ། མཉམ་སྦྱོར་གྱི་འགྲེལ་པ་བརྒྱ་བྱིན་སྡོང་པོས་མཛད་པར་ཡང་གསང་བ་སྙིང་པོའི་ལུང་མང་དུ་དྲངས་ཤིང༌། འགྲེལ་པ་དེ་ལ་བུ་སྟོན་རིན་པོ་ཆེ་ཡང་དགྱེས་ཤིང་དེ་ནས་ལུང་ཅི་འདྲོངས་མཛད་པ་ཡིན་ནོ། །