གཡུ་རི་དགེ་མ་གླིང་།

ཡོང་ཁུངས་Wikipedia

གོ་སྟེང་དགོན་༼གོ་སྟེང་དགོན།༽པའི་ཁོངས་སུ་གཡུ་རི་གྲོང་གི་གཡོན་ལོགས་རི་འདབས་ལ་དགེ་མ་གླིང་ཞེས་པའི་བཙུན་མའི་དགོན་ཆུང་ངམ་རི་ཁྲོད་ཅིག་ཆགས་ཡོད། དེ་ལ་ཡུལ་མིའི་ཁ་སྐད་དུ་དགེ་ར་སྟེང་རི་ཁྲོད་ཟེར། དེ་གོ་དགོན་སྤར་མཁན་སྤྲུལ་སྐུ་ཀརྨ་ལེགས་གྲུབ་ཀྱི་སྐུ་དུས་གསར་དུ་བཏབ་པ་ཡིན། སྔོན་དུས་མེད། ད་ལྟ་བཙུན་མ་བཞི་ཅུར་ཉེ་བ་ཞིག་བཞུགས། ལོ་ལྟར་དུ་བོད་ཟླ་བཅུ་གཅིག་པའི་ཚེས་བཅུ་ནས་བཟུང་ཞག་བརྒྱའི་རིང་མཚམས་བཞུགས་དགོས། དེ་ལ་ཞག་བརྒྱ་ཟེར། དེ་དུས་ཞག་བརྒྱའི་བཅད་རྒྱ་ལ་ཁྱིམ་པ་ཕོ་མོ་སེམས་ཁྲིད་ཐོབ་པ་རྣམས་ཀྱང་ཞུགས་དགོས། བསྡོམས་པས་མི་བརྒྱ་དང་བཅུ་ཡས་མས་འདུས། ཞག་བརྒྱའི་སྐབས་དོ་དམ་བྱེད་མཁན་ནི་ཁྱིམ་པ་དགེ་སྐོས་རེ་རེ་བསྐོ་བའི་སྲོལ་ཡོད་དོ། །
ཆོས་ཚོགས་ནར་མ་ལ་ཟླ་བ་བྱུང་ངོ་ཅོག་གི་ཚེས་ཉེར་ལྔ་ལ་ཚོགས་འཁོར་དང་། ལོ་རེའི་ས་ག་ཟླ་བ་ལ་བྱང་གཏེར་ཐུགས་རྗེ་ཆེན་པོ་འགྲོ་བ་ཀུན་གྲོལ་གྱི་སྒྲུབ་མཆོད་ཞག་བདུན་གནང་གི་ཡོད་དོ། །
དེ་མིན་རང་འདོད་ལྟར་བླ་མའི་སར་ལོ་རེའི་དམ་བཅའ་བྱས་ནས་མཚམས་བཞུགས་མཁན་གྱི་བཙུན་མ་དང་ཁྱིམ་པ་ཡང་མི་ཉུང་བ་ཡོད་པ་ཡིན་ནོ། །རོང་བན། ༠༦:༡༡, ༢ ཟླ་བདུན་པ། ༢༠༡༡ (UTC)