གཡུ་ཐོག་སྒང་

མཚན་གཞན་ལ་སྐྱིད་སྣ་གཡུ་ཐོག་ཁང་གསར་ཞེས་ཟེར། ཆུ་བཟང་དགོན་ནས་ཆུ་ཕར་ཕྱོགས་སུ་སྤྱི་ལེ་གསུམ་ཙམ་བསྐྱོད་ན་གཡུ་ཐོག་སྒང་ཞེས་གཡུ་ཐོག་ཡོན་ཏན་མགོན་པོའི་འཁྲུངས་ཁང་དུ་འབྱོར། དེའང་གཡུ་ཐོག་ཡོན་ཏན་མགོན་པོའི་མེས་པོ་འདྲེ་རྗེ་རྒྱ་གར་བྷརྫ་ཞེས་པ་མོང་ནས་མར་ཕེབས་སྐབས། སྟོད་ལུང་ཟམ་མོ་ཆེའི་འགྲམ་དུ་བུད་མེད་གཅིག་གིས་ཁྱེད་བདག་གི་ཡུལ་དུ་ཕེབས་པར་ཞུ་ཞེས་རྫ་ནག་རྩེ་མོ་ཞེས་པར་མཛུབ་མོ་གཏད་པས། ལམ་ཐག་རིང་བས་སང་ཉིན་འོང་ཆོག་གསུངས་པར། ད་ལྟ་རང་ཕེབས་པར་ཞུ་ཞུས་ནས་རྣམ་བུ་དཀར་པོ་ལྟ་བུའི་ཕེབས་ལམ་ཞིག་བསྟན་པས་དེའི་སྟེང་ཕེབས་མ་ཐག་དེ་མར་ཀླུ་བདུད་ཅིག་གི་ཕོ་བྲང་དུ་འབྱོར་བས་དེར་ཀླུ་བདུད་ནག་པོ་ལུས་བོང་ཆེ་བ་ཞིག་ལ་སྔགས་པའི་མཐུ་ཕོག་སྟེ་སྔགས་རྫས་ཡུང་དཀར་གྱིས་རྨ་བཟོས་པ་ཞིག་འདུག་པ་དེ་ལ་བྱ་ཁྱུང་ལྔ་པ་དང་དངུལ་ཆུ་ནང་དུ་ཕུལ། བྱུག་པ་རྒྱན་འཁོར་གྱིས་ཕྱི་ནས་བྱུག་པས་ཁོ་དེ་མར་ནད་ལས་གྲོལ། ཀླུ་བདུད་ཤིན་ཏུ་དགའ་ནས་རྒྱུད་འཛིན་དང་བཅས་པར་སྡོངས་གྲོགས་བྱེད་རྒྱུར་ཁས་བླངས། མི་མ་ཡིན་གྱི་ནོར་རྫས་མང་པོ་ཕུལ། བུད་མེད་དེས་སླར་ཡང་ལམ་དེ་བརྒྱུད་མར་གདན་དྲངས་པས་དེ་མར་ཟམ་སྣེར་འབྱོར། མོས་གུས་པ་དང་བཅས་ངས་ཀྱང་འབུལ་བ་ཕུལ་རྒྱུ་ཡོད་པས་སང་ཉིན་ས་འདིར་བཞེས་པར་ཕེབས་ཟེར་ནས་ཡལ། འདྲེ་རྗེ་ཐུགས་སྤྲོ་སྟེ་ནང་དུ་ཕེབས་པའི་སྲང་ལམ་དེར་དེང་སང་ཡང་དགའ་པོ་སྲང་ལམ་ཞེས་ཟེར། སང་ཉིན་བུད་མེད་དེས་བརྗོད་པ་བཞིན་ཟམ་སྣེར་ཕེབས་པས་ཆུ་ནང་དུ་བུད་མེད་ཀྱི་བམ་རོ་གསེར་གཡུས་བརྒྱན་པ་ཞིག་གཟིགས་པས་གསེར་གཡུ་རྣམས་བཀྲོལ་ཏེ་ཁང་སྟེང་དུ་བཀྲམ་པའི་འོད་མདངས་རི་སྟེང་ནས་ཕྱུགས་རྫི་བས་མཐོང་སྟེ། “མཁས་པ་མཐོང་བ་དོན་ལྡན་ལ་གཡུའི་ཐོག་འདུག”ཅེས་བཤད་པས་དེ་ནས་བཟུང་གཡུ་ཐོག་ཅེས་པའི་མཚན་ཐོགས། གཡུ་ཐོག་ཡོན་ཏན་མགོན་པོ་གནས་དེར་འཁྲུངས་ཤིང་མཚན་ལའང་འཁྲུངས་ཁང་གི་མིང་གཡུ་ཐོག་ཅེས་གསོལ། ད་ལྟ་འཁྲུངས་ཁང་དེ་དང་ཉེར་བར་༡༩༩༦ལོར་ལྗོངས་སྨན་རྩིས་ཁང་ནས་གཡུ་ཐོག་འཕྲོད་བསྟེན་ཁང་ཞེས་གཡུ་རྩིའི་ཙོག་ཅན་གསར་བཞེངས་གནང་བའི་ནང་། སྨན་འདམ་གྱི་གཡུ་ཐོག་ཡོན་ཏན་མགོན་པོའི་སྐུ་བརྙན་མི་ཚད་མ་དང་། སྨན་བླའི་སྐུ་ཐང་། རྗེ་རྡོར་འཛིན་མ། གཡུ་ཐོག་གི་སྨན་གཞོང་སོགས་མཇལ་རྒྱུ་ཡོད། དེ་དང་ཉེ་བའི་སྨན་ལུང་ཞེས་པར་གཡུ་ཐོག་གི་སྨན་སྒྲུབ་གནང་སའི་སྒྲུབ་ཁང་དང་ཡང་དེ་ནས་རྐང་ཐང་མར་ཆུ་ཚོད་བཞི་ཙམ་སོང་ན་འབྲི་ལུང་ནང་ཞེས་པར་གཡུ་ཐོག་གིས་བརྟུལ་གནང་བའི་ཕ་བོང་རེག་པ་དུག་ཅན་ཞེས་པ་དེའང་མཇལ་རྒྱུ་ཡོད།