གཟིམ་ཁུག་དགོན

མཚན་གཞན་ལ་ཀརྨ་གླིང་ཡང་ཞུ། སྣེ་མོ་དགོན་ནས་སྤྱིར་བཏང་འཁོར་ལམ་བརྒྱུད་སྤྱི་ལེ་བཅུ་གཉིས་ཙམ་བྲག་དཀར་ཞོལ་ཏེ་སྔོན་གྱི་ཟ་དམ་རྫོང་ཤུལ་ནས་གཟིམས་ཁུག་ནང་སོང་ན་དགོན་དེར་འབྱོར། དགོན་དེ་ནི་ཐོག་མར་ཀརྨ་པ་སྐུ་ཕྲེང་དང་པོས་ཕྱག་འདེབས་གནང་མཛད། ཀ་རྨ་པ་སྐུ་ཕྲེང་དང་པོ་གནས་དེར་ཕེབས་ནས་ནུབ་གཅིག་གཟིམས་སྐབས་མནལ་སྤྲོ་པོ་ཁུག་སྟབས་རྗེས་སུ་དགོན་དེར་གཟིམས་ཁུག་ཅེས་ཐོགས། ཐོག་མར་ད་ལྟའི་དགོན་དེའི་ལྟག་ཏུ་ཀརྨ་གླིང་ཞེས་པར་དབྱར་ཁ་བཞུགས་ས་དང་། དགུན་ཁའི་བཞུགས་གནས་ནི་ད་ལྟའི་དགོན་གནས་ཡུལ་དེར་ཡིན། ཐོག་མར་ཀརྨ་བཀའ་བརྒྱུད་ཕྱག་བཞེད་མཛད་པ་ལ་ཇུན་གར་དམག་དུས་གཏོར་སྐྱོན་ཆེན་པོ་བྱུང་། དགོན་དེ་ཐོག་མར་ཕོ་དགོན་ཡིན་པ་ལ་དེ་རྗེས་ཟ་དམ་རྫོང་དང་གུང་པོ་ཆེ་བའི་པཱ་ལགས་ཀྱིས་ཡུལ་འདིར་བུ་མོ་མང་པོ་འདུག་པས་བཙུན་དགོན་དགོས་མཁོ་ཆེ་བར་གཟིགས་ཏེ་བཙུན་དགོན་ཏུ་བསྒྱུར་བའི་ལོ་རྒྱུས་ཀྱང་ཡོད། སྔོན་འདུ་ཁང་ཀ་དྲུག་ནང་རྟེན་གཙོ་སྤྱན་རས་གཟིགས་ཕྱག་སྟོང་སྤྱན་སྟོང་། མགོན་པོ་ཕྱག་དྲུག སྲུང་མ་གཡུ་སྒྲོན་མ་བཅས་དང་། བཙུན་མ་བཞི་བཅུ་སྐོར་གྱིས་རི་བོ་དགེ་ལྡན་ཕྱག་བཞེད་མཛད་ཀྱི་ཡོད། ལོ་ལྟར་བོད་ཟླ་༡༡ཚེས་༡༥ཉིན་མ་ཎིའི་གྲོལ་དབྱངས་ཞེས་པའི་བཀའ་དབང་ཡང་གནས་སྲོལ་ཡོད། ད་ལྟ་སྔོན་གྱི་འདུ་ཁང་གྱང་གོག་སྟེང་གསར་བཞེངས་གནང་བའི་ནང་སྔོན་གྱི་སྐུ་བརྙན་དེ་དག་གི་སྐུ་ཚབ་གསར་བཞེངས་གནང་བ་དང་། དགོན་དེའི་འོག་ཏུ་གྲོག་རོང་ནང་ཞེས་པར་སྨན་བླ་བདེ་གཤེགས་བརྒྱད་ཀྱི་མཆོད་རྟེན་བརྒྱད་ཡོད་པའི་སྐུ་ཚབ་ཀྱང་གསར་བཞེངས་གནང་བ་མཇལ་རྒྱུ་ཡོད།