གནས་ནང་རི་ཁྲོད་

མཁར་རྡོ་རི་ཁྲོད་ཀྱི་ཤར་ངོས་(ལྷ་སའི་ཤར་ངོས་)ལུང་ཤུར་ནང་ཆགས་པའི་གནས་ནང་རི་ཁྲོད་ནི་དུས་རབས་བཅོ་བརྒྱད་པའི་དུས་མཇུག་ཏུ་མཁར་རྡོ་སྤྲུལ་སྐུ་སྐུ་ཕྲེང་གསུམ་པ་རིག་འཛིན་ཆོས་རྡོར་གྱིས་བཏབ། དེ་གར་རི་ཆུ་བྲག་ཕུག་སོགས་ངོ་ཚར་ཆེ་ལ་ཟངས་མདོག་དཔལ་རི་ཞེས་བྲག་རི་ཞིག་ལ་རི་སྐོར་རྒྱག་ས་དང། སློབ་དཔོན་རིན་པོ་ཆེའི་སྒྲུབ་ཕུག་ཅེས་པའི་ཕུག་པ་སོགས་ཡོད། རི་ཁྲོད་དེ་ཐོག་མར་མཁར་རྡོ་རིག་འཛིན་ཆོས་རྡོར་གྱིས་མཁར་རྡོའི་གཏེར་ཆོས་ཐུན་མོང་མ་ཡིན་པ་རྣམས་ཉམས་བཞེས་གནང་སའི་བཙུན་མའི་སྒྲུབ་སྡེ་ཞིག་ཡིན་རུང་། རབ་བྱུང་བཅུ་དྲུག་པའི་ལྕགས་རྟ་(༡༩༣༠)ལོའི་ཡས་མས་སུ་རྐུན་ཇག་གིས་བཙུན་མ་རྣམས་སྡོད་བཟོད་མི་བདེ་བ་བཟོས་སྟབས་གནས་སྒོ་གདོང་གི་གྲྭ་པ་དང། གནས་ནང་གི་བཙུན་མ་རྣམས་ཀྱིས་ཕན་ཚུན་སྡོད་གནས་བརྗེས་ཏེ་གནས་ནང་གྲྭ་དགོན་དང་གནས་སྒོ་གདོང་བཙུན་མའི་དགོན་དུ་གཏན་འཁེལ། རབ་བྱུང་བཅུ་དྲུག་པའི་ས་ཕག་ལོར་གནས་ནང་ལ་གྲྭ་གྲངས་༡༧ཡིན་པ་དང་དགོན་བདག་མཁར་རྡོ་བླ་བྲང་ཡིན། གོང་གསལ་མཁར་རྡོ་དང། གནས་སྒོ་གདོང། གནས་ནང་བཅས་ལ་མཁར་རྡོའི་སྒྲུབ་སྡེ་གསུམ་ཞེས་འབོད།