གནམ་ལྷ་ཤོག་པ་

གནམ་ལྷ་ཤོག་པ་ནི་བླ་བྲང་དགོན་པའི་ཤར་རྒྱུད་དུ་གནས་ཤིང་ཤར་དུ་ཧོར་གཙང་དང་། ལྷོར་ཁ་གྱ་དང་། ཐང་དཀར་ནང་། རོང་ངར་གསུམ། ནུབ་ཏུ་ཙ་ཡུས། བྱང་དུ་རྒན་གྱ་བཅས་དང་ས་མཚམས་འདྲེས་པའི་མདའ་སྨད་ཞང་ཁག་དང་བང་སྒར་ཐང་ཞང་ཁག་གཉིས་ཀྱི་ཁོངས་སུ་གནས། གནམ་ལྷ་ནི་གཡི་ཚའི་གདུང་རྒྱུད་ལས་མཆེད་ཅིང་། ཁ་གྱ་ཚོ་དྲུག་གི་ནང་ཚན་གཅིག་ཏུ་བགྲངས། ཧོར་ཁ་གྱར་གཞི་ཆགས་ཤིང་གནས་བཅས་ཏེ་གནམ་ལྷ་ཚོ་བ་མཆེད། ད་ལྟར་ཧོར་ཁ་གྱའི་སྡེ་ཚོར་གནམ་ལྷའི་རྒྱུད་པ་མཆིས། རིམ་གྱིས་གནམ་ལྷ་གོང་སྨད་བར་གསུམ་དུ་གྱེས་སོ། །

གནམ་ལྷ་གོང་མ།

དེར་དྲེད་ཆེན་དང་། དྲེད་ཆུང་། ཧོར་ཁ་གྱ། ཆོས་ལུང་མདོ། དོམ་ལུང་ཐང་། ས་དཀར་དཀར། རྐྱང་མ། སྐྱིད་ཐང་། རྡོ་བུ་མདོ། སྲན་ཐང་། མདའ་སྨད་ནང་བཅས་སྡེ་ཚོ་བཅུ་གཅིག་མངའ། དེ་རྣམས་ཀྱི་ཡུལ་ཁོངས་སུ་རྗེ་སྐལ་ལྡན་པའི་དངོས་སློབ་ཧོར་བཀའ་བཅུ་པ་དང་། ཧོར་རབ་འབྱམས་པ་གཉིས་ཀྱིས་བཏབ་པའི་ལྷ་ཆབ་སྒར་ཡོད།

གནམ་ལྷ་བར་མ།

དེར་ཕ་བོང་ཐང་དང་། རྔག་ཅི། ལྷ་ལུང་། རྟ་རྫོང་། རྭ་མགོ། ས་སོ་མ། ཅོ་སྐོར། མཛོ་ཕུག ལྷ་ཁང་ངོ་། བོང་ཐང་བཅས་སྡེ་ཚོ་བཅུ་གཅིག་ཡོད།

གནམ་ལྷ་ཞོལ་མ།

དེར་བང་སྒར་ཐང་དང་། ནོར་ཕྱུག ནག་ཤར། བེ་མོ། རུ་རྩ། ཆུ་ཉི་ནང་། གནས་གཞི། སྒར་ཐལ། ལ་སྒང་། གུར་ཚང་བཅས་སྡེ་ཚོ་བཅུ་མངའ། གོང་སྨྲས་གནམ་ལྷ་ཚོ་གསུམ་ནི་གཏེར་ལུང་ཡིད་དགའ་ཆོས་འཛིན་གླིང་གི་ཤོག་པ་ཡིན་ནོ། །