གན་དྷི་

གན་དྷི་སྐུ་ན་ཆུང་དུས་ཀྱི་སྤྱོད་བཟང་ རྒྱ་གར་པས་ཁོང་ལ་རྒྱལ་ཡབ་ཅེས་འབོད། འཛམ་གླིང་སྒང་གི་མི་རྣམས་ཀྱིས་ཁོང་ལ་སེམས་དཔའ་ཆེན་པོ་གན་དྷི་ཞེས་འབོད།

མཚན་དངོས་ལ་མོཧནདཱསཀརཅད གཱདྷཱི(1869.10.02-1948.01.30)ཞེས་གསོལ་བ་ཁོང་ནི་རྒྱ་གར་གྱི་མི་རིགས་རིང་ལུགས་ཀྱི་ལས་འགུལ་དང་རྒྱ་གར་རྒྱལ་དམངས་ཚོགས་ཆེན་ཚོགས་པའི་གཙོ་འཛིན་ཡིན་ཞིང་། རྒྱ་གར་གང་དེ་དབྱིན་ཇི་མི་སེར་སྤེལ་མཁན་གྱི་དབང་སྒྱུར་ལས་བཀྲོལ་ཏེ་རང་བཙན་གྱི་ལམ་བུར་འདྲེན་མཛད་དེད་དཔོན་ཉིད་ཡིན་ཕྱིར། ཁོང་ནི་རྒྱ་གར་གྱི་རྒྱལ་ཡབ་དང་ཆེས་རླབས་ཆེ་བའི་གཙོ་འཛིན་ཡང་ངོ་།།

ས་ཏ་ཡ་ག་ར་ཧ་སྟེ་ཁོང་གི“བདེན་པའི་ཨུ་ཚུགས”ཀྱི་ལྟ་སྤྱོད་ཀྱིས་འཛམ་གླིང་ཡོངས་ཀྱི་མི་རིགས་རིང་ལུགས་དང་རྒྱལ་སྤྱིའི་ཞི་བའི་གསར་བརྗེའི་ལས་འགུལ་ཀུན་ལ་ཤུགས་རྐྱེན་ཆེན་པོ་བཞག་པས། ཁོང་ནི་འཛམ་གླིང་གི་སྐྱེས་བུ་ཆེན་པོའི་གྲས་སུ་འཇོག་པ་རེད།

མ་ཧཱ་གན་དྷི་སྐུ་ན་ཆུང་དུས་ཀྱི་མཛད་སྤྱོད་འདི་དག་ལ་བལྟས་ན། ང་ཚོས་འཛམ་གླིང་སྒང་གི་སྐྱེས་བུ་ཆེན་པོ་མང་ཆེ་བར་སྐུ་ན་ཕྲ་བའི་དུས་ནས་བཟུང་སྐྱེས་སྦྱངས་ཀྱི་བཟང་སྤྱོད་ཡོན་ཏན་མང་དག་ཅིག་མཆིས་པ་རྟོགས། —སྒྲིག་པ་པོས།

བློ་སྟོབས་བརྟན་བརླིང་།

ནམ་ཞིག་ན་ཕ་ཁྱིམ་གྱི་གྲོགས་པོ་ཡིན་ལ་བློ་འདོན་པའང་ཡིན་པ་ཞིག་གི་སློབ་སྟོན་ལྟར། གན་དྷིས་དབྱིན་ཇིར་སློབ་གཉེར་དུ་འབྱོན་པར་དམ་བཅས་ཤིང་སྟ་གོན་བྱེད་སྒང་དུ། ཁོང་ཚོའི་རིགས་རུས་གཅིག་པའི་མི་རྣམས་ལྷན་དུ་ཚོགས་ཏེ་སྨྲས་པ། ཕྱི་རྒྱལ་དུ་སོང་བ་ཡིན་ན་འུ་ཚོའི་ཆོས་ལུགས་གོམས་སྲོལ་སྲུང་ཐུབ་རྒྱུ་ནི་དཔེ་མི་སྲིད་པ་ཞིག་རེད་ཅེས་དང་། འུ་ཚོའི་ཆོས་ལུགས་ལས་རྒྱ་མཚོའི་ཕ་རོལ་ཏུ་བགྲོད་པ་གཏན་འགོག་བྱས་ཡོད་ཅེས་དང་། གང་ཁྱོད་དབྱིན་ཇིར་འགྲོ་རྒྱུའི་ཁོག་རྩིས་དེ་རྩ་བ་ནས་ནོར་འདུག་ཅེས་སོགས་བརྗོད་དེ་ཆོས་ལུགས་དང་གོམས་སྲོལ་གྱིས་བཤོལ་བཏབ་ཅིང་གནོན་ཤུགས་སྤྲད་པའི་མཐར། ཉི་མ་དེ་རིང་ནས་བཟུང་བྱིས་པ་བསམ་མེད་འདི་འུ་ཚོའི་རིགས་རུས་ཀྱི་གྲས་ནས་ཕྱིར་འབུད་བྱས་པ་ཡིན་ཞེས་རིགས་རུས་ཀྱི་གྲས་ནས་ཕྱིར་འབུད་མཐར་སྐྲོད་བཏང་ནའང་། ཁོང་གིས་ང་རང་དབྱིན་ཇིར་སློབ་གཉེར་དུ་འགྲོ་རྒྱུའི་འདུན་པ་དེ་སུས་ཀྱང་བསྒྱུར་མི་ནུས་ཞེས་སྨྲས་ཤིང་རང་ལོ་བཅོ་བརྒྱད་ལས་མེད་ཀྱང་དམ་བཅའ་བརྟན་པོ་དེ་འདྲ་བཅངས་ནས་དབྱིན་ཇིར་སློབ་གཉེར་དུ་ཕྱིན་སོང་བ་དེ་ཡིས་ཁོང་ཉིད་ཆུང་དུས་ནས་བློ་སྟོབས་བརྟན་བརླིང་ཡིན་པ་མཚོན།

རང་གཅུན་རང་སྡོམ།

དབྱིན་ཇིར་སློབ་གཉེར་དུ་འབྱོན་པའི་ཁོང་གི་མོས་པ་དེར་ཐོག་མའི་དུས་སུ་མ་ཡུམ་མོས་མཐུན་མེད་ཅིང་དགག་བྱ་མཛད་པ་སྟེ། གོ་ཐོས་སུ་ཡུལ་དེའི་མི་རྣམས་ཀྱིས་ཁམ་ཆེན་པོས་ཤ་ཟ་བ་དང་། ཉིན་བཞིན་དུ་ཆང་ལ་འབྲལ་བ་མེད་པ་དེ་ལྟ་ན། གང་ཁྱོད་དབྱིན་ཇིར་ཕྱིན་ཚེ་མ་ངའི་བློ་བདེ་བོ་ག་ལ་འོང་། ཡོད་ཚད་བརླག་འགྲོ་རྒྱུ་རེད་ཅེས་སོགས་སྨྲས་པར། མ་ཡུམ་གྱིས་གང་ལ་ཐུགས་ཁྲལ་གནང་བ་ཁོང་གིས་རྟོགས་ནས། དབྱིན་ཇིར་འབྱོར་ཚེ་ཤ་དང་ཆང་དང་བུད་མེད་གསུམ་སྤང་གི་ཡིན་ཞེས་ཁས་ལེན་དམ་བཅའ་མཛད་པ་ནང་བཞིན་ཕྱིས་ཀྱང་དེ་ལྟའི་སྡོམ་པ་ལ་རྟག་ཏུ་གནས་པ་དེས་ཁོང་ཉིད་ཆུང་དུས་ནས་རང་གཅུན་རང་སྡོམ་ཅན་ཞིག་ཡིན་པ་མཚོན།

དྲང་པོ་དྲང་བཞག

ང་གིས་གན་དྷི་ལ་བརྡ་བསྟན་ཏེ་འགྲམ་གྱི་སློབ་གྲོགས་ལས་དཔེ་བཤུ་བྱ་བར་བསྐུལ་ནའང་། གན་དྷིས་དགེ་རྒན་ནི་རྐུ་འབྲི་འགོག་པའི་ལྟ་རྟོག་པ་ཡིན་སྙམ་ཞིང་བརྡ་དོན་དེའི་ཧ་མ་གོ མཇུག་མཐར་གན་དྷི་མ་གཏོགས་ནོར་འཆུག་བྱུང་བ་མེད་དེ་དགེ་སློབ་ཀུན་གྱིས་འཕྱས་ནའང་། ཁོང་གིས་ངས་ག་དུས་ཡིན་ཀྱང“རྐུ་བཤུས་ཀྱི་སྒྱུ་རྩལ”དེ་སློབ་ཐུབ་མ་སོང་ཞེས་གསུངས་པ་དེས་ཁོང་ཉིད་དྲང་པོ་དྲང་གཞག་ཡིན་པ་མཚོན།

གཟབ་ནན་དཔྱོད་ལྡན།

（དབྱིན་ཇིར་སློབ་གཉེར་བྱེད་སྐབས）་བདག་ནི་འཚོ་བ་སྐྱེལ་དུས་ཞིབ་རྩིས་རྒྱག་མཁས་ཤིག་ཡིན་ཏེ། དོང་ཙེ་གཅིག་གྲོན་པའང་རྩིས་ཐོར་བཀོད་པ་ཡིན། དཔེར་ན་སྤྱི་སྤྱོད་རླངས་འཁོར་དུ་བསྡད་པ་དང་། འཕྲིན་བསྐུར་པ། ཚགས་པར་ཉོས་པ་སོགས་འགྲོ་སོང་ཆུང་ངུ་དེ་རྣམས་ཀྱང་རེ་རེ་བཞིན་རྩིས་ཐོར་བཀོད་དེ་མཚན་ལྟར་གཉིད་མ་ཉལ་སྔོན་ལ་བསྡོམས་རྩིས་རེ་བརྒྱབ་པ་ཡིན། བདག་གིས་གོམས་སྲོལ་དེ་ནམ་ཡང་མ་དོར་ལ། རྒྱུ་མཚན་དེའི་དབང་གིས། རྗེས་སུ་སྤྱི་པའི་ཐེབས་རྩའི་དངུལ་གྲངས་ཆིག་འབུམ་ལོངས་པ་བདག་གི་ལག་བརྒྱུད་ནས་འགྲོ་སོང་བཏང་བ་གང་ཡང་བསྲི་ཚགས་གཟབ་ནན་ཡིན་ཞིང་། བདག་གིས་སྣེ་ཁྲིད་པའི་ལས་འགུལ་ཡོད་རྒུའི་གྲོན་དངུལ་འགྲོ་སོང་ལ་བུ་ལོན་མེད་པའི་ཁར་ད་དུང་ལྷག་འཕྲོ་ཡོད་པ་བྱུང་ཞེས་གསུངས་པ་འདིས་ཁོང་གི་གཟབ་ནན་དཔྱོད་ལྡན་གྱི་ཀུན་སྤྱོད་གཤིས་རྒྱུད་མཚོན་པའོ།། གཞན་ཡང་ཁོང་ནི་སྐྱོན་ལ་ངོས་ལེན་ཡོད་པ་དང་འགྱོད་བཤགས་བྱེད་ཤེས་ཤིག་སྟེ། ཆུང་དུས་དུ་བ་འཐེན་པའི་ཉམས་སྣང་སྐྱིད་པོ་ཁོ་ན་ལ་བསམས་ནས་གཡོག་པོའི་ཁུག་མ་ལས་སིལ་སྒོར་བརྐུས་ཏེ་དུ་བ་ཉོས་པ་སོགས་རྐུ་ཁྱེར་ཙག་ཙིག་ནི་ཐེངས་མང་དུ་བྱས་མྱོང་ལ། དགུང་ལོ་བཅོ་ལྔའི་སྟེང་ཕུ་བོའི་ལག་གདུབ་ལས་གསེར་རྡོག་ཆུང་ངུ་ཞིག་ཕྲལ་ཏེ་བདག་གིར་བྱས་པ་དེས་བློ་ཡིད་ཤིན་ཏུ་མ་བདེ་བས་ཕྱིན་ཆད་རྐུ་ཁྱེར་མི་བྱེད་པའི་དམ་བཅའ་དང་བྱས་ཉེས་ལ་འགྱོད་བཤགས་བྱེད་ཕྱིར། འགྱོད་བཤགས་ཡི་གེ་ཞིག་བྲིས་ཏེ་ཡབ་ཀྱི་མདུན་དུ་དམ་བཅའ་ཕུལ་བ་ལ། ཡབ་ཀྱིས་སྡང་སྡིགས་སྟོན་པ་ལྟ་ཞོག་སྤྱན་ཆབ་མུ་ཏིག་འཐོར་བ་བཞིན་ལྷུང་བས་བྱིས་པ་དེའི་ཡིད་སེམས་བརླན་པར་བྱས་ཤིང་། གཞན་སེམས་བསྒྱུར་པའི་ནུས་པ་ཚད་མེད་ཅིང་བློ་དཀྱེལ་ཤིན་ཏུ་ཡངས་པའི་འཚེ་མེད་ཞི་བའི་ཡོན་ཏན་དེ་ཁོང་གིས་དེ་དུས་ནས་བཟུང་ཉམས་སུ་མྱངས་ནས་འོངས་པ་ཡིན་པར་བཞེད་པ་ལྟ་བུས་མཚོན།

བདག་ནི་རང་གི་སྤྱོད་པ་ལ་ཤིན་ཏུ་འཛེམ་པ་ཞིག་ཡིན་ཞིང་། ཉེས་སྐྱོན་ཕྲ་མོ་ཙམ་གྱི་ཕྱིར་དུའང་ངོ་ཚའི་མིག་ཆུ་གཏོར་མྱོང་བ་ཞིག་ཡིན་ཞེས་གསུངས་པ་བཞིན་ཡ་རབས་སྤྱོད་བཟང་ལ་དང་དོད་བླ་ནས་མཛད་མཁན་ཞིག་ཡིན་ཕྱིར། ཀུན་སྤྱོད་ནི་ཐམས་ཅད་ཀྱི་རྨང་གཞི་ཡིན་ལ། བདེན་པ་ནི་ཀུན་སྤྱོད་ཀྱི་ངོ་བོ་རེད། དེ་བས་བདེན་པ་འཐོབ་སྙེག་བྱེད་པ་ནི་བདག་གི་དམིགས་ཡུལ་ཉག་གཅིག་ཡིན་ཞེས་བདེན་པ་འཚོལ་བ་ལ་སོ་སོའི་ཀུན་སྤྱོད་ནས་འགོ་རྩོམ་དགོས་པར་འདོད་པ་དེ་འདྲའོ།།