ཁྲོམ་གཞུང་གི་གད་དར་བ་སུ་ནི་ཏ་
རྒྱ་གར་གྱི་མཉན་ཡོད་ཅེས་བྱ་བའི་གྲོང་ཁྱེར་ན་མིང་ལ་སུ་ནི་ཏ (SUNITA) ཟེར་བའི་གད་དར་བ་ཞིག་ཡོད་ཅིང་། ཁོང་ནི་ཁྲོམ་གཞུང་ཕྱག་དར་བྱེད་མཁན་ཞིག་ཡིན་སྟབས། ལས་གླ་ཡང་ཆུང་ངུ་རེ་ལས་རག་གི་མེད་པས་རང་ཉིད་ཀྱི་གྱོན་གོས་དང་གསོལ་སྨན་གྱི་རིན་པ་སྤྲོད་མི་ཐུབ་པར་མ་ཟད། ཉིན་རེའི་འཚོ་བའི་འགྲོ་གྲོན་དེ་ཡང་འདང་ངེས་ཤིག་མེད།
སུ་ནི་ཏ་ལ་མཚོན་ན་མཚན་མོ་ཉལ་སའི་སྡོད་ཁང་ཞིག་ཀྱང་མེད་པས་ནམ་རྒྱུན་ལམ་ཟུར་དུ་ཉལ་ཏེ་དུས་ཚོད་སྐྱེལ་གྱི་ཡོད། ད་དུང་ཡུལ་མི་རྣམས་ཀྱིས་ཁོང་ལ་མི་འདི་ནི་རིགས་ངན་རེད་ཅེས་བཤད་པར་བརྟེན། ཁོང་གིས་སྐྱེ་བོ་གཞན་རྣམས་དགའ་བདེའི་དཔལ་ལ་མཉམ་རོལ་བྱེད་བཞིན་པ་མཐོང་ན་ཡང་ཁོང་དེ་ཚོའི་ཁྲོད་དུ་ཞུགས་ནས་དགའ་སྐྱིད་ལ་ལོངས་སུ་སྤྱོད་དབང་ག་ལ་ཡོད། དེ་ལྟར་རིགས་རུས་མཐོ་བར་རློམ་པའི་སྐྱེ་བོ་རྣམས་སྲང་ལམ་དེར་ཕེབས་སྐབས། སུ་ནི་ཏ་ནི་ཁོང་ཚོ་དང་ཐག་རིང་བའི་སར་ཕྱིན་ཏེ་སྡོད་དགོས་པ་མ་གཏོགས། གལ་སྲིད་ཁོང་གི་གྲིབ་མ་ཙམ་ཡང་རིགས་རུས་མཐོ་བའི་སྐྱེ་བོ་དག་ལ་ཕོག་ཚེ། ཁོང་ཚོས་སུ་ནི་ཏ་ལ་ལུས་པོ་ནས་ཟུངས་ཁྲག་མ་ཐོན་བར་རྡུང་རྡེག་དང་བཀའ་བཀྱོན་སོགས་གཏོང་རྐྱང་བྱེད་ཀྱི་ཡོད། སུ་ནི་ཏ་ནི་ཧ་ཅང་གིས་དབུལ་ཞིང་ཕོངས་པ་ཞིག་ཡིན་སྟབས། ཆོས་ཀྱི་ཉམས་ལེན་དང་སློབ་སྦྱོང་གི་གོ་སྐབས་སོགས་ཡེ་ནས་རག་མྱོང་མེད། དེར་བརྟེན་ཁོང་གིས་དུས་རྒྱུན་དུ་ཆེས་ཐབས་རྡུགས་ཤིང་ཡིད་མུག་པ་སྟེ། དབུལ་ཞིང་ཕོངས་པའི་འཚོ་བར་རོལ་དགོས་བྱུང་།
ཉིན་གཅིག་ཁོང་གིས་ལུས་ལ་རལ་ཧྲུལ་དུ་སོང་བའི་གྱོན་གོས་ཆུང་ངུ་ཞིག་གོན་ཏེ། དྲི་ངན་གྱིས་ཁྱབ་པའི་སྲང་ལམ་དེ་དག་ན། གཟུགས་པོར་དྲེག་པས་ཁེངས་ཤིང་རྡུལ་ནག་འཛར་བཞིན་ཐལ་རྡུལ་དང་གད་སྙིགས་བསྒྲུགས་ཏེ་གཙང་སྦྲ་བྱེད་སྐབས། གློ་བུར་དུ་ཁོང་གིས་སངས་རྒྱས་བཅོམ་ལྡན་འདས་འཁོར་དགེ་སྦྱོང་སྟོང་ཕྲག་དང་བཅས་སྲང་ལམ་དེ་ན་ཕེབས་བཞིན་པ་མཇལ་བས། ཁོང་གིས་མྱུར་སྟབས་ངང་སྲང་ལམ་གྱི་གད་སྙིགས་དང་ཐལ་རྡུལ་རྣམས་བསྒྲུགས་ཏེ་སླེ་པོར་བླུགས་ནས་དེ་མགོ་ལ་འཁུར་བཞིན་གད་སྙིགས་གཡུག་སར་ཕྱིན།
སངས་རྒྱས་བཅོམ་ལྡན་འདས་འཁོར་དགེ་སྦྱོང་སྟོང་ཕྲག་དང་བཅས་པ་རང་ཉིད་ཀྱི་ཕྱོགས་སུ་ཞལ་གཏད་དེ་ཕེབས་ཡོང་བ་མཐོང་བས་སེམས་ལ་དགའ་སྐྱོ་ཟུང་གི་ཚོར་བ་རྒྱས་ཤིང་། ལམ་ཟུར་ནས་ཡིབ་སའི་གནས་མ་རག་པར་སྒལ་བ་གྱང་ཟུར་གྱི་རྩིག་པ་ལ་སྦྱར་ཏེ་ཡར་ལངས་ནས་བཅོམ་ལྡན་འདས་ལ་དད་གུས་ཀྱིས་ཐལ་མོ་སྦྱར་ནས་བསྡད།
སངས་རྒྱས་བཅོམ་ལྡན་འདས་སུ་ནི་ཏ་དང་ཐག་ཉེ་བར་ཕེབས་པ་ན་བྱོན་མཚམས་བཞག་སྟེ། ཁོང་གིས་སྙན་ཞིང་འཇེབས་པའི་གསུང་དབྱངས་ཀྱི་གདངས་ལ་དྲངས་ཏེ་སྨྲས་པ། བརྩེ་བའི་གྲོགས་པོ། ཁྱོད་ཀྱིས་ལས་ཀ་འདི་མཚམས་བཞག་སྟེ་རབ་ཏུ་བྱུང་བར་འདོད་དམ་ཞེས་བཀའ་འདྲི་གནང་བར། སུ་ནི་ཏ་ལ་མཚོན་ན་དེ་སྔོན་མི་སུ་གཅིག་གིས་ཀྱང་དེ་འདྲའི་གླེང་མོལ་བྱེད་མྱོང་མེད་སྟབས། ཁོང་གི་སེམས་ལ་བླ་ན་མེད་པའི་དགའ་བདེ་ཡིས་ཁེངས་ཤིང་མིག་ཟུང་
དེ་སྔོན་སུ་ནི་ཏ་ཡིས་སངས་རྒྱས་བཅོམ་ལྡན་འདས་ནི་དེ་འདྲའི་བྱམས་བརྩེའི་རང་བཞིན་ཅན་ཞིག་ཡིན་པ་གཏན་ནས་ཤེས་མྱོང་མེད་ལ། དུས་ནམ་ཡིན་ཡང་ཁོང་གིས་སྐྱེ་བོ་གཞན་གྱི་དྲུང་ནས་བཀའི་བཀོད་ལ་ཉན་རྐྱང་བྱེད་པ་ལས་བྱམས་བརྩེའི་ཚིག་གཅིག་ཀྱང་ཐོས་མྱོང་མེད་པས། ཁོང་གིས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལགས། ངས་དུས་རྒྱུན་བཀའི་བཀོད་ལ་སྒུག་རྐྱང་བྱེད་པ་ལས་ང་ལ་བྱམས་བརྩེའི་ཚིག་གིས་སྐྱོང་མཁན་གཅིག་ཀྱང་མེད། གལ་སྲིད་ཁྱེད་ཀྱིས་མདོག་མི་སྡུག་ཅིང་སྙིང་རྗེའི་ཡུལ་དུ་གྱུར་པའི་གད་དར་བ་ང་ཡང་རབ་ཏུ་བྱུང་རྒྱུར་ཞལ་བཞེས་གནང་ན། ངས་ཅིའི་ཕྱིར་ལས་ཀ་འདི་མཚམས་འཇོག་མི་ཐུབ་པ་ཡིན། ཞེས་ཞུས་པ་ན། སངས་རྒྱས་བཅོམ་ལྡན་འདས་ཀྱིས་བཞུགས་ས་དེ་ཉིད་དུ་སུ་ནི་ཏ་ལ་རབ་བྱུང་གི་སྡོམ་པ་གནང་སྟེ། དགེ་སྦྱོང་གཞན་རྣམས་དང་ལྷན་གཙུག་ལག་ཁང་དུ་ཕྱག་ཕྱིར་ཁྲིད་ནས་བྱོན་ནོ། །དུས་དེ་ནས་བཟུང་དགེ་སྦྱོང་སུ་ནི་ཏ་ཡི་རིགས་རུས་ཅི་ཞིག་ཡིན་མིན་ཤེས་མཁན་སུའང་མེད་ཅིང་། ཐ་ན་རྒྱལ་པོ་དང་། བློན་པོ་སོགས་སྐྱེ་བོ་ཐམས་ཅད་ཀྱིས་ཁོང་ལ་དད་ཅིང་བཀུར་སྟི་བྱས་སོ། །