ཁྲོ་ཕུ་ལོ་ཙཱ་བ་བྱམས་པ་དཔལ་

ཁྲོ་ཕུ་ལོ་ཙཱ་བ་བྱམས་པ་དཔལ་ ཁོང་ནི་རབ་བྱུང་གསུམ་པའི་ཆུ་མོ་སྦྲུལ་ལོ་སྟེ་སྤྱི་ལོ 1173 ལོར་གཙང་ཡུལ་ཤབ་སྨད་དུ་ཡབ་ཇོ་འཕན་དང་། ཡུམ་སྲེག་མོ་གསལ་བྱེད་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཞི་པའི་ཤིང་མོ་བྱ་ལོ་སྟེ་སྤྱི་ལོ 1225 ལོར་སྐུ་གཤེགས། ཁོང་དགུང་ལོ་དྲུག་པར་ཡི་གེའི་འབྲི་ཀློག་སྦྱངས། དགུང་ལོ་བརྒྱད་པར་རྒྱལ་ཚ་རིན་ཆེན་མགོན་དང་། ཀུན་ལྡན་རས་པ་གཉིས་ཀྱིས་མཁན་སློབ་མཛད་ནས་དགེ་ཚུལ་བསྒྲུབས། དགུང་ལོ་བཅུ་གཅིག་པར་དགེ་བཤེས་གཙང་པ་ལས་ཚད་མ་རྣམ་ངེས་སོགས་གསན། དགུང་ལོ་བཅུ་དྲུག་པར་གཙང་དཀར་པ་ལས་དབུ་མ་དང་། བྱམས་ཆོས་སོགས་གསན། ཞང་དགེ་བ་ལས་ལོ་ཙཱ་བསླབས་པས་མཁས་པར་གྱུར། རྩེ་སྟོན་ཀུན་བཟང་ལས་རྡོར་དབྱིངས་ལ་སོགས་པའི་དཀྱིལ་འཁོར་ལྔ་བརྒྱ་ལྷག་གི་ཕྱག་ལེན་དང་མན་ངག་བསླབས། དགུང་ལོ་བཅུ་དགུ་པ་ལ་བསྙེན་པར་རྫོགས། རྒྱལ་ཚ་རིན་ཆེན་མགོན་དང་ཀུན་ལྡན་རས་པ་གཉིས་ལས་གདམས་ངག་མི་འདྲ་བ་བརྒྱ་དང་སུམ་ཅུ་རྩ་དྲུག་དང་། བཀའ་བབས་བཅུ་གསུམ་བཅས་པ་མཐའ་དག་གསན། དགུང་ལོ་ཉེར་བཞི་པར་བལ་ཡུལ་དུ་བྱོན། ཁ་ཆེ་པཎ་ཆེན་བུདྡྷ་ཤྲཱི་ལས་མདོ་སྔགས་ཀྱི་གདམས་ངག་མང་དུ་གསན། སྔོན་རྗེས་སུ་མི་ཏྲ་ཛོ་གེ་དང་། ཤཱཀྱ་ཤྲཱི་བྷ་དྲ་སོགས་ཁྲོ་ཕུར་སྤྱན་དྲངས། ཁོང་གིས་ཁྲོ་ཕུར་གཞུང་ཆེན་མོའི་འཆད་ཉན་གྱི་སྲོལ་གཏོད། དགའ་ལྡན་གྱི་གཙུག་ལག་ཁང་དང་བྱམས་ཆེན་གསེར་ཟངས་ལས་གྲུབ་པའི་མིའི་ཁྲུ་བརྒྱད་ཅུ་པའི་སྐུ་ཚད་བཞེངས། དགོན་ལག་གཞན་བསྐྲུན་པ (ཁྲོ་རུ་དགོན་པ) སོགས་རླབས་ཆེན་གྱི་འཕྲིན་ལས་མཐར་ཕྱིན་ནས། དགུང་ལོ་ཞེ་བརྒྱད་པར་ཁྲོ་ཕུའི་གཉན་མཁར་གྱི་བྲག་སེང་གེ་རྫོང་དུ་སྒྲུབ་པ་མཛད་ནས་བཞུགས་སོ། ཁོང་གི་སློབ་མ་གྲགས་ཆེ་བ་ནི་བླ་ཆེན་བསོད་ནམས་དབང་ཕྱུག་དང་། མཁན་ཆེན་བྱང་ཆུབ་དཔལ། ཡང་རྩེ་བ་རིན་ཆེན་སེང་གེ་སངས་རྒྱས་ཞིག་ཆེན། བྱམས་པ་སྒྲུབ་བརྒྱུད་བསྟན་འཛིན། སྔོ་ཚ་གྲགས་པ་དཔལ། གཉོས་ལོ་རྩེ་བ། བླ་མ་རྡོ་རྗེ་དབང་། རས་མ་སེང་རྒྱལ། རོང་པ་རྒ་ལོ་བཅས་སོ།།