ཁྲི་ལྡེ་འབུམ་

ཁྲི་ལྡེ་འབུམ་ ཁོང་ནི་རབ་བྱུང་ལྔ་པའི་ས་ཕོ་འབྲུག་ལོ་སྟེ་སྤྱི་ལོ 1268 ལོར་གུང་ཐང་ཁབ་གོང་དུ་ཡབ་ཁྲི་རྒྱལ་འབུམ་ལྡེ་མགོན་དང་། ཡུམ་སེ་མ་འབུམ་སྐྱོང་རྒྱལ་མོ་གཉིས་ཀྱི་སྲས་སུ་སྐུ་འཁྲུངས་ཤིང་འདས་ལོ་མི་གསལ། ཁོང་སྙིང་སྟོབས་དང་བློ་གྲོས་ཕུན་སུམ་ཚོགས་པས་གུང་ཐང་གི་རྒྱལ་སྲིད་ཀྱང་ཡུན་རིང་ཙམ་བསྐྱངས་ཤིང་། ཡབ་ཀྱི་དགོངས་རྫོགས་སུ་སངས་རྒྱས་ཤཱཀྱ་སེང་གེའི་སྐུ་བརྙན་དགུང་ལོ་བཅུ་གཉིས་པའི་ཚད་དང་ལྡན་པ་ཞིག་བཞེངས་པ་དང་ལོ་ཟླ་དུས་ཀྱི་མཆོད་པའི་རྒྱུན་ཡང་བཙུགས། དགུང་ལོ་བཞི་བཅུ་ཐམ་པ་རབ་བྱུང་ལྔ་པའི་མེ་མོ་ལུག་ལོ་སྟེ་སྤྱི་ལོ 1307 ལོར་ཧོར་གྱི་རྒྱལ་པོའི་བཀའ་ལུང་ལྟར་ཏའི་ཏུར་ཕེབས་ཏེ་ཨོལ་ཇ་དུ་རྒྱལ་པོས་ “ཁྱེད་རང་བོད་ལ་དབང་བསྒྱུར་བའི་རིགས་རྒྱུད་ཆེན་པོ་ཡིན་འདུག་པས་གནམ་གྱི་ཤེད་མོང་སྟེར་བའི་འོས་སུ་སྣང་ཞེས་བོད་ཤིང་སྒོ་བཙུགས་པའི་རྒྱལ་པོ་དུ་དབེན་ཤ་གསུམ་གྱི་བདག་པོ་མངའ་རིས་ཚོ་བཅུ་གསུམ་གྱི་མངའ་ཐང་ལ་དབང་བསྒྱུར་བའི་མངའ་བདག་གི་མིང་དང་། རིན་པོ་ཆེ་ལས་གྲུབ་པའི་ཐམ་ཀ་གླིང་བདུན་མ། ཐམ་གཡོག་ཐམ་ཤུ་བཅས་རྒྱལ་ཐབས་མི་འགྱུར་གཡུང་དྲུང་རིན་པོ་ཆེས་སྤྲས་པའི་གསེར་ཡིག་མར་འབོད་པའི་འཇའ་ས་ཐོ་སྟ་ཆེ་རྟགས་གནང་སྐྱེས་ཁྱད་པར་འཕགས་པ་བཅས་ཚེགས་མེད་པར་ཐོབ” ཅེས《གུང་ཐང་བཙན་པོའི་གདུང་རབས》བྲིས་མའི་ནང་དུ་གསལ། དེ་ནས་བོད་དུ་བདེ་བར་འཁོར་ཞིང་ཚ་བོ་ཆོས་སྐྱོང་ལྡེ་ལ་མང་ཡུལ་གུང་ཐང་གི་ཆབ་སྲིད་བསྐྱངས་སུ་བཅུག་ནས་ལོགས་སུ་བཞུགས་སོ།།