ཁྲི་ཕུན་ཚོགས་ལྡེ་

ཁྲི་ཕུན་ཚོགས་ལྡེ་ ཁོང་ནི་རབ་བྱུང་དྲུག་པའི་ས་ཕོ་སྟག་ལོ་སྟེ་སྤྱི་ལོ 1338 ལོར་གུང་ཐང་ཁབ་གོང་དུ་ཡབ་ཁྲི་བཀྲ་ཤིས་ལྡེ་དང་། ཡུམ་བསོད་ནམས་འབུམ་གཉིས་ཀྱི་སྲས་སུ་སྐུ་འཁྲུངས། རབ་བྱུང་དྲུག་པའི་ལྕགས་ཕོ་ཁྱི་ལོ་སྟེ་སྤྱི་ལོ 1370 ལོར་སྐུ་གཤེགས། ཁོང་གིས་ཐོག་མར་དགེ་བའི་བཤེས་གཉེན་རྣམས་ལ་བསྟེན་ནས་དཔེ་ཡིག་ལུང་གསུམ་ལ་སྦྱངས་པ་མཛད། དེ་ནས་ཡབ་ཀྱི་དགོངས་རྫོགས་སུ་དེ་བཞིན་གཤེགས་པའི་སྐུ་བརྙན་མི་ཚད་བསྐྲུན་པ་སོགས་རྣམ་དཀར་དགེ་བའི་མཛད་འཕྲིན་གྱིས་མང་ཡུལ་གུང་ཐང་གི་ཆབ་སྲིད་བསྐྱངས། ས་སྐྱ་པ་དང་སྐུ་གཉེན་ཡིན་སྟབས་སྲིད་འཕེལ་འདུན་མ་གཅིག་པའི་བཅའ་ཡིག་མནའ་བསྒྲིགས་ཀྱང་མཛད། བྱང་པ་ཏཱ་དབེན་གྱི་སྲས་མོ་ནམ་མཁའ་འབུམ་ཁབ་ཏུ་བཞེས་ཏེ་རིགས་སྲས་ཁྲི་རྒྱལ་བསོད་ནམས་ལྡེ་སྐུ་འཁྲུངས། འགུང་ལོ་སུམ་ཅུ་སོ་གསུམ་པར་བཙུན་མོ་དངོས་ཀྱི་གྱོད་པོ་ཏཱ་དབེན་གྱིས་ལོག་པའི་བསམ་པས་ངན་བསྐུལ་བྱས་ཏེ་ཞང་རྟ་ཚག་པ་སྨོན་ལམ་རྒྱལ་མཚན་གྱིས་བཀྲོངས་སོ། ཁོང་ནི་མང་ཡུལ་གུང་ཐང་གི་རྒྱལ་རབས་བཅུ་བཞི་པ་ཡིན་ནོ།།