ཁྱུང་པོ་དམ་ཚུགས་

ཁྱུང་པོ་དམ་ཚུགས་ ཁོང་ནི་སྤྱི་ལོའི་དུས་རབས་བརྒྱད་པའི་དུས་སྟོད་ཙམ་དུ་སྐུ་འཁྲུངས་ཤིང་། རྒྱལ་པོ་ཁྲི་སྲོང་ལྡེ་བཙན་གྱི་བློན་པོ་ཡིན། བན་བོན་གཉིས་ཀྱི་བར་ལ་ཆོས་ཀྱི་རྩོད་གླེང་བྱུང་སྐབས་ཁོང་གིས་བོན་གྱི་ཁ་འཛིན་དང་ཤགས་འདེབས་པ་མཛད་ནས་རྩོད་པ་ལས་བོན་ཆོས་ཁུངས་ངན་ལ་གཏན་ཚིགས་ཆུང་བ་དང་། བན་ཆོས་ཁུངས་བཙན་ལ་གཏན་ཚིགས་རྒྱ་ཆེ་བས་ཕྱིན་ཆད་བོད་དུ་བན་ཆོས་ཏེ་སངས་རྒྱས་ཆོས་ལུགས་བྱའོ་ཞེས་ཁ་འཆམས་ནས་རྒྱལ་ཁམས་ཀུན་ལ་དྲིལ་བསྒྲགས་སོ། ཁོང་ནི་གཙུག་ལག་རིག་གནས་ལ་མཁས་པ་དང་། ལྷག་པར་དུ་རྩིས་རིག་ལ་ཤིན་ཏུ་མཁས་པས་རྩིས་པ་ཆེན་པོ་ཞེས་ཞུའོ།།