ཁྱབ་པའི་དམིགས་པ་བཞི་
རྣམ་པར་རྟོག་པ་དང་བཅས་པའི་གཟུགས་བརྙན། རྣམ་རྟོག་མེད་པའི་གཟུགས་བརྙན། དངོས་པོའི་མཐའ། དགོས་པ་ཡོངས་གྲུབ། ༡རྣམ་པར་རྟོག་པ་བཅས་པའི་གཟུགས་བརྙན་ཞེས་པ་ནི། དམིགས་རྟེན་དེ་ལེ་དམིགས་ནས་དཔྱད་པ་བྱེད་པའི་ཚེ་དཔྱོད་བྱེད་ཀྱི་རྣམ་རྟོག་ཡོད་པར་བརྟེན་རྣམ་རྟོག་དང་བཅས་པ་ཞེས་དང༌། གཟུགས་བརྙན་ཞེས་པ་དམིགས་རྟེན་རང་མཚན་པ་དེ་དངོས་མིན་པར་དེའི་རྣམ་པ་སེམས་ལ་འཆར་བ་ལ་ཟེར། ༢རྣམ་པར་རྟོག་པ་མེད་པའི་གཟུགས་བརྙན་ནི་དམིགས་རྟེན་དེ་ལ་དམིགས་པའི་ཚེ་དཔྱད་པ་མ་བྱེད་པར་སེམས་རྩེ་གཅིག་ཏུ་མཉམ་པར་བཞག་པ་ཡིན་ཞིང༌། དེའི་ཚེ་དཔྱོད་བྱེད་ཀྱི་རྣམ་རྟོག་མེད་པའི་ཆ་ནས་དེ་ལྟར་བརྗོད་པ་ཡིན། དམིགས་པ་དེ་གཉིས་དམིགས་བྱེད་སེམས་ཀྱི་སྒོ་ནས་འཇོག་པ་ཡིན་ཞིང༌། དང་པོ་དེ་ལྷག་མཐོང་གི་དམིགས་པ་ཡིན་པ་དང༌། གཉིས་པ་དེ་ཞི་གནས་ཀྱི་དམིགས་པ་ཡིན། ༣དངོས་པོའི་མཐའ་ནི། འདུས་བྱས་ཀྱི་ཆོས་ཐམས་ཅད་ཕུང་པོ་ལྔར་འདུས་པ་དང༌། ཐར་པ་དོན་གཉེར་གྱི་བླང་དོར་གྱི་གཞིར་གྱུར་པའི་ཤེས་བྱ་ཐམས་ཅད་བདེན་པ་བཞིར་འདུས་ལུགས་བསམ་ནས་དེའི་རྗེས་སུ་གྲངས་ངེས་པར་ཐག་བཅད་ནས་སེམས་མ་གཡེང་བར་འཇོག་པ་ཡིན། དེ་ནི་དམིགས་པ་བྱ་ཡུལ་གྱི་སྒོ་ནས་བཞག་པ་ཡིན། ༤དགོས་པ་ཡོངས་སུ་གྲུབ་པ་ནི། དམིགས་རྟེན་དེ་དག་གི་གཟུགས་བརྙན་ལ་ཞི་གནས་དང་ལྷག་མཐོང་གཉིས་ཀྱིས་དམིགས་ནས་རྒྱུན་མི་འཆད་པར་བསམ་ནས་གོམས་འདྲིས་བྱས། ཡང་ནས་ཡང་དུ་སྒོམ་པ་ལ་བརྟེན་ནས་ལུས་ཤིན་སྦྱངས་དང༌། སེམས་ཤིན་སྦྱངས་སྐྱེ་བ་ནི་དགོས་པའི་གཙོ་བོ་ཡིན་པས་དམིགས་པ་བཞི་པ་འདི་འབྲས་བུའི་སྒོ་ནས་འཇོག་པ་ཡིན། ཞིབ་པར《ལམ་རིམ》གྱི་ཞི་གནས་སྐབས་སུ་གསལ།
༼དུང་དཀར་ཚིག་མཛོད་ཆེན་མོ་༽ནས་བཏུས།