ཁྱ་དགེ་བློ་བཟང་བཀྲ་ཤིས་

ཁྱ་དགེ་བློ་བཟང་བཀྲ་ཤིས་ ཁོང་ནི་རབ་བྱུང་བཅུ་གཉིས་པའི་ཆུ་ཕོ་ཁྱི་ལོ་སྟེ་སྤྱི་ལོ 1742 ལོར་མདོ་སྨད་དབལ་ཤུལ་རྙིང་བའི་ཁྲོད་དུ་སྐུ་འཁྲུངས། རབ་བྱུང་བཅུ་གསུམ་པའི་ཤིང་ཕོ་འབྲུག་ལོ་སྟེ་སྤྱི་ལོ 1784 ལོར་སྐུ་གཤེགས། ཁོང་ཁྱ་དགེ་དཔོན་སློབ་བློ་གྲོས་རྒྱ་མཚོའི་སྤྲུལ་སྐུ་ཡིན་ཚུལ་སོགས་ཀྱི་གསུང་བྱོན་ཡང་དཔོན་སློབ་དེ་ཉིད་ཀྱིས་སྤྲུལ་སྐུ་གདན་དྲངས་མི་ཆོག་གསུངས་ཡོད་སྟབས་གདན་སར་མ་བཀོད། བླ་བྲང་བཀྲ་ཤིས་འཁྱིལ་གྱི་ཆོས་གྲྭར་ཞུགས་ཏེ་ཐུགས་འཛིན་ཤིན་ཏུ་བཟང་བས་གུང་ཚིགས་མང་ཇ་མ་འཚོགས་གོང་དུ་ཤོག་གུ་མདའ་ཚད་བཅོ་བརྒྱད་རེ་སྟར་ཆགས་སུ་འཛིན་ཐུབ། ཀུན་མཁྱེན་འཇིགས་མེད་དབང་པོ་ལས་ཕར་ཕྱིན་སྐབས་དང་པོ་ནས་བརྒྱད་པའི་བར་ཡོངས་རྫོགས་དང་། དབུ་མ་ལུང་རིགས་གཏེར་མཛོད་ཡོངས་རྫོགས། མཛོད་གནས་དང་པོ་ནས་བརྒྱད་པའི་བར་ཡོངས་རྫོགས་བཅས་གསན་ཞིང་རྒྱུགས་ཕུལ། དེ་ནས་གཙོས་རྒྱ་མཁར་སྒར་དང་ཨུརྒེ་གྲྭ་ཚང་གི་ཁྲི་ལ་བཞུགས་ཤིང་མདོ་སྔགས་ཀྱི་འཆད་ཉན་སྤེལ། བླ་བྲང་བཀྲ་ཤིས་འཁྱིལ་གྱི་དུས་འཁོར་དཔོན་སློབ་ཀྱི་ཁྲི་ལ་ཕེབས་ནས་འཆད་ཉན་ཡུན་རིང་དུ་མཛད། ཁྲི་ཟུར་ནས་ཆེར་མ་འགྱངས་པར་དགུང་ལོ་ཞེ་གཉིས་སྟེང་དགོངས་པ་ཆོས་དབྱིངས་སུ་གཤེགས། ཁོང་ནི་བླ་བྲང་བཀྲ་ཤིས་འཁྱིལ་གྱི་དུས་འཁོར་དཔོན་སློབ་ཀྱི་ཁྲི་རབས་ལྔ་པ་ཡིན་ནོ།།