ཁུ་འགྱུར་གསལ་བའི་མཆོག་

གསང་སྔགས་སྔ་འགྱུར་གྱི་བླ་བརྒྱུད་དུ་བཞུགས་པའི་ཟ་དམ་རིན་ཆེན་དབྱིག་གི་སློབ་མ་སྟེ། ཡར་ལུང་ཕྱོས་སུ་འཁྲུངས། རྟེན་དགེ་སློང་ཡིན་པ་དང་། དགུང་ལོ་ང་བདུན་ལོན་པའི་ཚེ་ཟ་དམ་རིན་ཆེན་དབྱིག་དང་མཇལ་ཏེ་རྡོ་རྗེ་ཟམ་པའི་མན་ངག་རྣམས་ཚང་བར་གསན། འཁྲུངས་ཡུལ་དུ་ཕྱིར་ལོག་མ་མཛད་པར་ཝ་སེང་གེ་བྲག་ཏུ་སྐུ་ཚེའི་རིང་སྒོམ་སྒྲུབ་ལ་བཞུགས་ཤིང་། དགུང་ལོ་བརྒྱ་དང་བཅུ་བདུན་ལོན་པའི་ཚེ་ཕུང་པོ་ལྷག་མེད་དུ་གཤེགས་ཞེས《གུ་བཀྲ་ཆོས་འབྱུང་》ཤོག་གྲངས་༡༨༩པར་གསལ།

༼དུང་དཀར་ཚིག་མཛོད་ཆེན་མོ་༽ནས་བཏུས།