ཁུ་དངོས་གྲུབ་

རབ་བྱུངདང་པོའི་འགོ་སྟེ་དུས་རབས་བཅུ་གཅིག་པའི་དཀྱིལ་ཙམ་དུ་བྱོན་པའི་བོད་ཀྱི་ལོ་ཙཱ་བ་ཞིག འདིས་བསྒྱུར་བའི་གཞུང་འགའ་ཞིག་བསྟན་འགྱུར་གྱི་ནང་དུ་ཡོད། དེ་མིན་གྱི་ལོ་རྒྱུས་ཞིབ་པ་མ་རྙེད།

ཁོང་ནི་སྤྱི་ལོའི་དུས་རབས་བཅུ་པའི་དུས་སྨད་ཙམ་དུ་སྐུ་འཁྲུངས། ཁོང་གིས་ཐོག་མར་བོད་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད་ཅིང་། དེ་རྗེས་ཁ་ཆེ་དང་། བལ་ཡུལ། རྒྱ་གར་སོགས་སུ་ཕེབས་ཏེ་པཎ་གྲུབ་མང་པོའི་ཞབས་ལ་གཏུགས་ནས་མདོ་སྔགས་གཉིས་ཀའི་ཆོས་ལ་སློབ་གཉེར་ལེགས་པར་མཛད་པ་དང་། ལེགས་སྦྱར་གྱི་སྐད་ལ་ཡང་བྱང་ཞིང་ཆུབ་པ་མཛད་ནས《ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད》ལས་ལེའུ་གཉིས་ཙམ་བསྒྱུར་ཞིང་། སླད་ནས་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ (1011—1064) ཡིས་ཞུས་ཤིང་གཏན་ལ་ཕབ་ཅེས་འགྱུར་བྱང་དུ་འཁོད་འདུག ཁོང་གི་བསྒྱུར་རྩོམ་ནི《བཀའ་འགྱུར》ལས《ཕག་མོ་མངོན་པར་བརྗོད་པ་བཤད་པའི་རྒྱུད་ཕྱི་མ་ལས་ཕག་མོ་མངོན་པར་བྱང་ཆུབ་པ》། 《ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད》ལས་ལེའུ་གཉིས། 《བསྟན་འགྱུར》ལས《བུང་བ་འདོད་པའི་སྒྲུབ་ཐབས》། 《བདུད་རྩི་འབྱུང་བའི་གཏོར་མའི་ཆོ་ག》། 《ཀྱེའི་རྡོ་རྗེའི་རྒྱུད་ཀྱི་དཀའ་འགྲེལ་པདྨ་ཅན》བཅས་བཞུགས་སོ།།

༼དུང་དཀར་ཚིག་མཛོད་ཆེན་མོ་༽ནས་བཏུས།