ཁལ་ཁ་ངག་དབང་དཔལ་ལྡན་

ཁལ་ཁ་ངག་དབང་དཔལ་ལྡན་ ཁོང་ནི་རབ་བྱུང་བཅུ་གསུམ་པའི་མེ་ཕོ་སྟག་ལོ་སྟེ་སྤྱི་ལོ 1806 ལོར་སྐུ་འཁྲུངས། འདས་ལོ་མི་གསལ། དགུང་ལོ་བཞི་བཅུར་ཕེབས་པ་ན་མཚན་ཉིད་ཀྱི་གཞུང་ཆེན་མོའི་གྲུབ་མཐའ་ཆེན་པོའི་མཆན་འགྲེལ་ཞིབ་ཕྲ་གསལ་བ་ཞིག་དབུ་བརྩམས་ནས་རི་བོ་རྩེ་ལྔར་མཇུག་རྫོགས་པར་མཛད་ཅིང་། དེ་རྗེས་ཁལ་ཁ་ཁུ་རེ་ཆེན་པོར་ཤིང་པར་དུ་བསྐྲུན་འདུག་པ་དང་། དེ་མིན་ཡང་རབ་བྱུང་བཅུ་བཞི་པའི་ས་མོ་ལུག་ལོ་སྟེ་སྤྱི་ལོ 1859 ལོར་མངོན་རྟོགས་རྒྱན་ཚིག་དོན་གྱི་འགྲེལ་པ་བརྩམས་པར་མ་ཟད། པཎ་ཆེན་བསོད་ནམས་གྲགས་པས་བརྩམས་པའི་འབྲས་སྤུངས་བློ་གསལ་གླིང་གི་མཚན་ཉིད་ཀྱི་ཡིག་ཆ་དང་། ཀུན་མཁྱེན་འཇམ་དབྱངས་བཞད་པས་བརྩམས་པའི་འབྲས་སྤུངས་སྒོ་མང་གྲྭ་ཚང་གི་མཚན་ཉིད་ཀྱི་ཡིག་ཆ་རྣམས་ལ་ཞིབ་མོར་ཐུགས་དཔྱད་མཛད་དོ། གོང་གསལ་འབྲས་སྤུངས་སྒོ་བློ་གྲྭ་ཚང་གཉིས་ཀྱི་དབུ་མ་དང་ཕར་ཕྱིན་གཉིས་ཀྱི་ཡིག་ཆའི་བཤད་ཚུལ་བཀོད་པ《བློ་གསལ་དགའ་སྟོན》བཅས་གསུང་རྩོམ་པོ་ཏི་གསུམ་ཙམ་ལོངས་པ་པེ་ཅིན་མི་རིགས་རིག་གནས་ཕོ་བྲང་དུ་བཞུགས།།