ཁམས་ལུགས་

གསངསྔགས་སྔ་འགྱུར་གྱི་ཆོས་སྐོར་ཆེ་གྲས་གསུམ(༡འདུས་པ་མདོ། ༢་སྒྱུ་འཕྲུལ་གསང་བ་སྙིང་པོ། ༣སེམས་ཕྱོགས)གྱི་ནང་གསེས་སྒྱུ་འཕྲུལ་གྱི་སྐོར་རྣམས་པཎ་ཆེན་བི་མ་ལས་ལོ་ཙཱ་བ་རྨ་རིན་ཆེན་མཆོག་ལ་གནང་ཞིང༌། ལོ་ཙཱ་བ་དེས་བོད་སྐད་དུ་བསྒྱུར་ནས་གཙུག་རུ་རིན་ཆེན་གཞོན་ནུ་དང༌། གྱེ་རེ་མཆོག་སྐྱོང་གཉིས་ལ་གསུངས། དེ་གཉིས་ཀྱིས་དར་རྗེ་དཔལ་གྱི་གྲགས་པ་དང༌། ཞང་རྒྱལ་བའི་ཡོན་ཏན་གཉིས་ལ་གསུངས། དར་རྗེ་དཔལ་གྱི་གྲགས་པས་དབུས་གཙང་དང་ཁམས་ཁུལ་དུ་ཡང་གསུངས་པས། ཁམས་ཕྱོགས་སུ་བརྒྱུད་པ་ལ་ཁམས་ལུགས་ཞེས་གྲགས་སོ། །

དུང་དཀར་ཚིག་མཛོད་ཆེན་མོ་༽ནས་བཏུས།