ཁ་སྐོང་ངགེ་འདུན་

ཁ་སྐོང་ངགེ་འདུན།

བསྒྲུབ་བྱ་བསྙེན་རྫོགས་ཀྱི་སྡོམ་པ་ཞུ་མཁན་ལོ་ཚད་ལོན་པ་རྣམས་སྡོམ་པ་ཞུ་སྐབས་ལས་ཀྱི་ཁ་སྐོང་དུ་ཕེབས་མཁན་དགེ་སློང་ལྔ་ལས་མི་ཉུང་བ་འཚོགས་དགོས་ཤིང༌། དེ་རྣམས་ཀྱང་གཤམ་གསལ་གྱི་འོས་ཆོས་བཅོ་ལྔ་ཚང་དགོས་པ་སྟེ། ༡སྤྱོད་ལམ་འགྲེང་ནས་བཞུགས་པ་མ་ཡིན་པ། ༢གང་ལ་བྱ་བའི་ཡུལ་མ་ཡིན་པ། ༣་འདུན་པ་ཕུལ་བ་མ་ཡིན་པ། ༤ཕམ་པ་བྱུང་སྟེ་བསླབ་པ་ཉམས་པ་མ་ཡིན་པ། ༥བསྙེན་པར་མ་རྫོགས་པ་མ་ཡིན་པ། ༦མཚམས་མེད་ལྔ་གང་རུང་བྱས་པ་མ་ཡིན་པ། ༧སྡིག་ལྟ་ཅན་མ་ཡིན་པ། ༨ས་གཞན་ན་གནས་པ་མ་ཡིན་པ། ༩ཐ་དད་དུ་གནས་པ་མ་ཡིན་པ། ༡༠བསླབ་པ་འཁྲུལ་བ་དང་བཅས་པ་མ་ཡིན་པ་བཅས་《འདུལ་བ་ལུང་གའི》ནས་གསུངས་པ་བཅུ་དང༌། ༡༡མཚམས་གཞན་ན་གནས་པ་མ་ཡིན་པ། ༡༢མཚན་མི་མཐུན་པ་མ་ཡིན་པ། ༡༣དཀོན་མཆོག་གཞན་མ་ཡིན་པ་བཅས《ལུང་ཞུ་བ》ནས་གསུངས་པ་གསུམ། ༡༤ལུས་ཐ་མལ་དུ་གནས་པ། ༡༥ཐ་སྙད་གསུམ་དང་ལྡན་པ(སྨྲ་ཤེས་པ། དོན་གོ་བ། ཤེས་པ་རང་བཞིན་དུ་གནས་པ)གཉིས་ནི་མདོར་བསྡུས་སྦྱར་བ་བཅས་བཅོ་ལྔ་ཡོད། དེ་སྐོར་འདུལ་བའི་འགྲེལ་པ་ཁག་གི་ནང་རང་རང་སོ་སོའི་འགྲེལ་བཤད་རྒྱུ་མཚན་དང་བཅས་པ་ཞིབ་ཕྲ་གསུངས་ཡོད།
༼དུང་དཀར་ཚིག་མཛོད་ཆེན་མོ་༽ནས་བཏུས།