ཁ་རག་གྲགས་པ་རྒྱལ་མཚན་

ཁ་རག་གྲགས་པ་རྒྱལ་མཚན་ ཁོང་ནི་རབ་བྱུང་གསུམ་པའི་མེ་ཕོ་རྟ་ལོ་སྟེ་སྤྱི་ལོ 1186 ལོར་སྐུ་འཁྲུངས། རབ་བྱུང་ལྔ་པའི་ལྕགས་མོ་ལུག་ལོ་སྟེ་སྤྱི་ལོ 1271 ལོར་སྐུ་གཤེགས། ཁོང་གིས་སྤྱན་སྔ་གྲགས་པ་བྱང་ཆུབ་ཀྱི་གསོལ་ཇ་བ་ཡང་མཛད། སྤྱན་སྔ་ཀུན་སྤངས་པའི་དུས་སུ་ཇ་དཔོན་མཛད་པའི་སྐབས་སུ་ཆུ་བར་དུ་བྲོས་ནས་ཐུགས་དམ་མཛད། དཀའ་བཞི་པ་ནམ་མཁའ་འོད་ཟེར་སོགས་དང་མཇལ་ནས་གདམས་པ་མང་དུ་ཞུས། རི་ཐེབས་གཉིས་ཀྱི་བར་དུ་བཞུགས་ནས་ཕྱིར་བྱོན་ཏེ་དགོན་རིན་ཆེན་གླིང་དུ་ལོ་སྐོར་གཅིག་ཙམ་བཞུགས། དེའི་སྐབས་སུ་རྟོགས་པ་ཁྱད་པར་ཅན་འཁྲུངས། དུས་ཕྱིས་སུ་ཁ་རག་ཏུ་ཡུན་རིང་དུ་བཞུགས་པས་ཁ་རག་པ་ཞེས་གྲགས། དེ་ནས་གདན་ས་ཐེལ་དུ་ཕེབས་ཏེ་ཡུན་རིང་བཞུགས་ནས་གཞན་དོན་ལེགས་པར་བསྐྱངས། དགུང་ལོ་བརྒྱད་ཅུ་གྱ་དྲུག་པར་དགོངས་པ་ཆོས་དབྱིངས་སུ་གཤེགས་སོ།།