ཁ་ཆེ་པཎ་ཆེན་ཟླ་བ་མགོན་པོ་

ཁ་ཆེ་པཎ་ཆེན་ཟླ་བ་མགོན་པོ།

རྒྱ་གར་གྱི་པཎ་ཆེན་ནཱ་རོ་པའི་སློབ་མ་འགོས་ལོ་ཙཱ་བ་ཁུག་པ་ལྷས་བཙས་ཀྱིས་གསང་བ་འདུས་པའི་སྐོར་གསན་སའི་བླ་མ་དེ་ཡིན་ཞིང༌། བོད་དུ་བྱོན་ནས་གྲ་པ་མངོན་ཤེས་དང༌། ལྕེ་གྲལ་སྒང་པ་གཉིས་ལ་དུས་འཁོར་གྱི་སྐོར་གསུང་མཁན་དེ་ཡིན། ཚིགས་བཅད་ཚིག་རྐང་བཅུ་དྲུག་ལན་གཅིག་གཟིགས་པ་ཙམ་གྱིས་བློ་ལ་འཛིན་ནུས་པའི་མཁྱེན་རབ་ཀྱི་རྩལ་ཕུན་སུམ་ཚོགས་པ་མངའ་ཞིང༌། ཁམས་འཛག་མེད་དུ་འཆིང་ནུས་པའི་རྟོགས་པའི་ཡོན་ཏན་དང་ལྡན་ཞིང༌། བོད་དུ་དུས་འཁོར་ཙམ་མ་ཟད། དཔལ་ལྡན་ཟླ་བ་གྲགས་པའི་《སྒྲོན་གསལ》དང《དབུ་མ་རྩ་བ་ཤེས་རབ》ཀྱི་བཤད་པ་ཡང་མཛད། བོད་སྐད་བྱང་ཆུབ་པར་མཁྱེན་པས《དོན་དམ་བསྙེན་པ》དང《དུས་ཀྱི་འཁོར་ལོའི་དབང་མདོར་བསྟན་གྱི་འགྲིལ་པ》གཉིས་ཀྱང་རང་འགྱུར་མཛད་པ་བསྟན་འགྱུར་སྡེ་དགེ་དཔར་མའི་རྒྱུད[ཐ]དང[ན]གཉིས་སུ་བཞུགས་ཡོད། ལོ་རྒྱུས་འདི《དེབ་སྔོན》ལྕགས་དཔར་མའི་དེབ་གཉིས་པའི་ཤོག་གྲངས༨༩༩པར་གསལ་བ་ནས་དྲངས།
༼དུང་དཀར་ཚིག་མཛོད་ཆེན་མོ་༽ནས་བཏུས།