ཀྲང་ཀྱཱ་ཞབས་དྲུང་འཇམ་དབྱངས་སྐལ་ལྡན་

ཀྲང་ཀྱཱ་ཞབས་དྲུང་འཇམ་དབྱངས་སྐལ་ལྡན་ ཁོང་ནི་རབ་བྱུང་བཅུ་གསུམ་པའི་ས་མོ་གླང་ལོ་སྟེ་སྤྱི་ལོ 1769 ལོར་མདོ་སྨད་དུ་སྐུ་འཁྲུངས། རབ་བྱུང་བཅུ་བཞི་པའི་ལྕགས་མོ་ཡོས་ལོ་སྟེ་སྤྱི་ལོ 1831 ལོར་སྐུ་གཤེགས། ཁོང་བླ་བྲང་བཀྲ་ཤིས་འཁྱིལ་དུ་གྲྭ་རྐྱང་དཀྱུས་མའི་ཚུལ་གྱིས་ཚོགས་ཆོས་འགྲིམས་ཤིང་ཐུགས་གཉེར་ལེགས། བསྡུས་གྲྭ་ནས་བཟུང་གཞུང་བཀའ་པོད་ལྔ་ལ་ནང་བྱན་ཆུད་པ་སྦྱངས་ནས་རྡོ་རམས་པའི་མཚན་བཏགས་བཞེས། ཨུ་ཅི་མུ་ཆིན་ཤོག་ནས་གདན་དྲངས་པ་ལྟར་སྨད་དུ་སྔ་ཕྱི་ལན་གཉིས་ཕེབས་ཤིང་ཆོས་ཀྱི་འཁོར་ལོ་བསྐོར་ཏེ་གདུལ་བྱ་ཡོངས་ཀྱི་རེ་བ་བསྐངས། བླ་བྲང་བཀྲ་ཤིས་འཁྱིལ་གྱི་དུས་འཁོར་དང་རྒྱུད་པའི་ཁྲི་ལ་ཕེབས་ཏེ་འཆད་ཉན་དང་གཏོང་སྒོ་ལེགས་པར་མཛད། ཆོ་འཕྲུལ་སྨོན་ལམ་གྱི་སྐབས་སུ་ཚོགས་མང་ལ་དངུལ་འགྱེད་སྲང་གཅིག་དང་ཞོ་ལྔ་རེ་ཕུལ། རང་དགོན་བཀྲ་ཤིས་བདེ་ཆེན་གླིང་དུ་འདུ་ཁང་དང་། རྟེན་བརྟེན་པ་མང་དུ་བཞེངས་པ་མཛད། དགུང་ལོ་རེ་གསུམ་པ་རབ་བྱུང་བཅུ་བཞི་པའི་ལྕགས་མོ་ཡོས་ལོ་སྟེ་སྤྱི་ལོ 1831 ལོར་བླ་བྲང་བཀྲ་ཤིས་འཁྱིལ་གྱི་གདན་སའི་ཁྲི་ལ་ཕེབས་ཏེ་ཆོས་ཀྱི་འཆད་ཉན་མཛད་མུས་གློ་བུར་དུ་སྐུ་ཡི་བཀོད་པ་བསྡུས་སོ། ཁོང་ནི་བླ་བྲང་བཀྲ་ཤིས་འཁྱིལ་གྱི་གདན་རབས་སོ་བཞི་བ་ཡིན་ནོ། །