ཀྱི་ཧུད་
ཀྱི་ཧུད་ཅེས་པ་ནི་བོད་ཀྱི་ཆོས་ཀྱི་གཞུང་ལུགས་ནང་གི་སྨྲེ་སྔགས་ཀྱི་ཚིག་ཅིག་སྟེ། མྱ་ངན་དང་འགྱོད་པ། སྙིང་རྗེ། དམད་པ་བཅས་ཀྱི་དོན་དུ་སྤྱོད་པའི་ཚིག་ཡིན།
ནང་དོན།
[རྩོམ་སྒྲིག]"ཀྱི་ཧུད་ཅེས་མྱ་ངན་གྱི་སྨྲེ་སྔགས་དང་བཅས་ཏེ་འཆི་བདག་གིས་གློ་རྡེག་ཏུ་བདག་ཉིད་བཅོམ་མོ་ཞེས་ཡིད་ལ་སེམས་ཤིང་འགྱོད་པས་གདུངས་པར་འགྱུར་བ།"[༡] ཞེས་གསུངས།
མྱ་ངན་གྱི་སྨྲེ་སྔགས།
འཆི་བདག་གིས་བཟུང་བའི་ཚེ་ལེ་ལོ་སྤངས་ནས་དགེ་བ་སྒྲུབ་པར་འདོད་ཀྱང་དགེ་བ་སྒྲུབ་ལོང་ཡོད་པའི་དུས་མ་ཡིན་ཞིང་དགེ་བ་སྒྲུབ་པ་ལ་ནུས་པ་ཡོད་པའི་དུས་ཀྱང་མ་ཡིན་པ་ན། "ཀྱི་ཧུད་བདག་འཆི་བདག་གིས་འདི་བཞིན་བཅོམ་པར་གྱུར་ཏོ་ཞེས་སེམས་ཤིང་བློ་ལྷག་རི་རབ་ཙམ་ལུས་ནས་ཚེ་ཕ་རོལ་དུ་མཆི་བར་འགྱུར་རོ། །"[༢]ཞེས་གསུངས།
སྙིང་རྗེའི་ཚིག
བསྟན་བཅོས་རྩོམ་པ་པོ་རྣམས་ཀྱིས་སྙིང་རྗེའི་དབང་གིས་"ཀྱི་ཧུད་རྨོངས་པ་རྣམས་འདོད་པ་མི་འཐོབ་ཅིང་མི་འདོད་པ་ཐོག་ཏུ་འབབ་པའི་སྡུག་བསྔལ་དག་གིས་བཅོམ་པར་འགྱུར་"[༣]ཞེས་སྨྲས། འདི་ནི་རྨོངས་པ་ཅན་གྱི་སེམས་ཅན་རྣམས་ལ་སྙིང་རྗེ་བསྐྱེད་ནས་བཤད་པའི་ཚིག་ཡིན།
དམད་པ་དང་གདམས་ངག
"ཀྱི་ཧུད་སེམས་རྨོངས་པ་ཁྱོད་ཀྱིས་ཅིའི་ཕྱིར་འདི་ལ་བདག་གི་ལུས་སོ་སྙམ་དུ་འཛིན་པའི་ང་རྒྱལ་ཅིའི་ཕྱིར་སེལ་བར་མི་བྱེད་དེ་གཉེན་པོའི་སྟོབས་ཀྱིས་ལུས་ལ་བདག་གམ་བདག་གིར་འཛིན་པ་བསལ་ནས་རྒྱུན་གཅོད་པར་རིགས་སོ་ཞེས་འདོམས་པའོ། །"[༤]"ཀྱི་ཧུད་འདི་ཕྱི་ཐམས་ཅད་དུ་འཆི་བ་ལ་སོགས་པ་མི་འདོད་པའི་སྡུག་བསྔལ་དག་གིས་བཅོམ་པར་འགྱུར་བས་སྙིང་རྗེ། དེས་ན་འཆི་བ་དྲན་ནས་དགེ་བ་ལ་བརྩོན་པར་རིགས་སོ། །"[༥]"ཀྱི་ཧུད་ལུས་འདི་ལ་བདག་གམ་བདག་གིར་ང་རྒྱལ་བ་ཅིའི་ཕྱིར་སེལ་བར་མི་བྱེད།"[༦] ཅེས་ལུས་ལ་ཆགས་ཞེན་གཅོད་པའི་གདམས་ངག་གི་ནང་དུ་ཡང་སྤྱོད།
"ཀྱི་ཧུད་འདི་དག་སྡུག་བསྔལ་དང་བྲལ་ན་ཅི་མ་རུང་སྙམ་པ་སོགས་ཀྱི་སྒོ་ནས་སེམས་ཅན་སྡུག་བསྔལ་གྱི་འདམ་དུ་བྱིང་བ་ལ་མྱ་ངན་བྱ་བར་འོས་པས་སྙིང་རྗེ་ཆེན་པོ་བསྒོམ་པ་ལ་འབད་པར་བྱའོ། །"[༧]ཞེས་གསུངས།
འབོད་པའི་ཚིག "ཀྱི་ཧུད་སྡུག་བསྔལ་དག་གིས་བཅོམ། །ཞེས་གསུངས་ཏེ་འདི་རྨོངས་པ་ཆེན་པོ་ཉིད་ཀྱིས་དཀའ་བའི་གནས་སྐབས་སུ་ཞུགས་སོ་ཞེས་པ་དང་། བདག་ཉིད་ལ་ཡང་སྐྱོ་བར་བྱེད་དེ། དེ་བཞིན་དུ་གཞན་དུ་ཡང་ཇི་ལྟར་རིགས་པར་བལྟ་བར་བྱའོ། །བརྩོན་མེད་ཅེས་པ་ལ་སོགས་པ་རྣམས་ནི་འབོད་པའི་ཚིག་རྣམས་ཡིན་ནོ། །"[༨] "ཀྱི་ཧུད་མ། ཀྱི་ཧུད་ཕ། ཀྱི་ཧུད་བུ་ཞེས་ཟེར་ཏེ།"[༩] ཞེས་འཆི་བའི་སྐབས་སུ་ཕ་མ་བུ་ཕྲུག་གིས་ཕན་ཚུན་ལ་སྨྲ་བའི་སྐབས་སུའང་སྤྱོད། ཀྱེ་ཧུད་ཅེས་བདག་ལྟའི་འདུ་ཤེས་ལ་དམད་པ་དང༌། དེས་སྐྱོ་བའི་ཚིག་སྟེ་འཇམ་དཔལ་རྣམ་རོལ་གྱི་མདོར། "དེ་བཞིན་གཤེགས་པས་ཚོང་དཔོན་གྱི་བུ་འཇིགས་བྱིན་ལ་སྨད་ཚོང་གི་བུ་མོ་གསེར་མཆོག་འོད་དཔལ་བསྟན་ཏེ། ཁྱོད་ཀྱིས་འདི་ཅིར་མཐོང་དྲིས་པ་ན། འདི་ལུས་རྩ་དང་རྩིག་པ་འདྲ། །སེམས་ནི་བསྟན་ཏུ་མ་མཆིས་ཏེ། །ཞེས་སོགས་ཀྱིས་ལན་བཏབ་པ་བཞིན་ནོ། །"ཞེས་གསུངས་སོ། །
ལུང་ཁུངས།
[རྩོམ་སྒྲིག]- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང། ཤིང་དཔར། ཤོག་གྲངས། 651
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང། ཤིང་དཔར། ཤོག་གྲངས། 375
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང། ཤིང་དཔར། ཤོག་གྲངས། 657
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང། ཤིང་དཔར། ཤོག་གྲངས། 896
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང། ཤིང་དཔར། ཤོག་གྲངས། 378
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་གྲངས། 175
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་གྲངས། 337
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་གྲངས། 194
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་གྲངས། 491