ཀཿཐོག་རིག་འཛིན་ཚེ་དབང་ནོར་བུ་

ཀཿཐོག་རིག་འཛིན་ཚེ་དབང་ནོར་བུ་ ཁོང་ནི་སྤྱི་ལོའི་དུས་རབས་བཅོ་བརྒྱད་པའི་ནང་དུ་བྱོན་པའི་གསང་ཆེན་རྙིང་མའི་ཆོས་ལ་མངའ་བརྙེས་པའི་མཁས་གྲུབ་ཆེན་པོ་ཞིག་ཡིན་པ་དང་། བོད་ཀྱི་ལོ་རྒྱུས་སྨྲ་བའི་གཙུག་རྒྱན་ཞིག་ཀྱང་ཡིན་ལ། ལྷག་པར་དུ་སྟོད་མངའ་རིས་སྐོར་གསུམ་གྱི་ལོ་རྒྱུས་ལ་དེ་བས་ནང་བྱན་ཚུད་པ་ཞིག་ཡིན། རབ་བྱུང་བཅུ་གཉིས་པའི་ཤིང་མོ་གླང་ལོ་སྟེ་སྤྱི་ལོ་1745ལོར 《བོད་རྗེ་བཙན་པོའི་གདུང་རབས་ཚིག་ཉུང་དོན་གསལ་》བརྩམས་པ་དང་། རབ་བྱུང་བཅུ་གསུམ་པའི་ས་མོ་སྦྲུལ་ལོ་སྟེ་སྤྱི་ལོ་1749ལོར་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཞིག་གསོ་རྒྱ་ཆེན་པོ་གནང་བའི་སྐབས་སུ་མང་ཡུལ་གུང་ཐང་ཟ་འོག་ཕུག་ཏུ་ལོ་གཅིག་བཞུགས་ཏེ་གུང་ཐང་རྒྱལ་རབས་ཀྱི་ཡིག་ཚང་མང་པོའི་སྙིང་བསྡུས་གནང་བ 《བོད་རྗེ་ལྷ་བཙན་པོའི་གདུང་རབས་མངའ་རིས་མང་ཡུལ་དུ་ཇི་ལྟར་བྱུང་བའི་ཚུལ་དེབ་ཐེར་དྭངས་ཤེལ་འཕྲུལ་གྱི་མེ་ལོང་》ཞེས་བྱ་བ་བརྩམས་པ་མཛད་དོ།།