ཀོང་པོ་ཡེ་ཤེས་བརྩོན་འགྲུས་སམ་ཕག་མགོ་བླ་
རྗེ་འདི་ནི་ཀོང་པོའི་ཡུལ་དུ་ཡབ་ཚེ་དབང་རྒྱ་མཚོ་དང་ཡུམ་ཚེ་དབང་བཟང་མོ་གཉིས་ཀྱི་སྲས་སུ་རབ་བྱུང་བཅུ་གསུམ་པའི་ལྕགས་སྦྲུལ(༡༧༦༡)ལོར་འཁྲུངས། དགུང་ལོ་བརྒྱད་ལ་ཡབ་ཡུམ་གཉིས་ཀྱིས་ཡི་གེ་འབྲི་ཀློག་བསླབས། དེའི་ལོར་ཀོང་པོ་ཆབ་ནག་རི་བོ་དགའ་ལྡན་དུ་ཕྱག་བྲིས་སློབ་གཉེར་དུ་ལོ་གཅིག་ཙམ་བཞུགས། དགུང་ལོ་དགུ་ལ་ལྷ་ལྡན་སྤྲོ་བདེ་ཁང་གསར་དུ་ཕྱག་བྲིས་དང་། རྩིས། ཆོས་སྤྱོད་སོགས་བསླབས་ནས་དགུང་ལོ་བཅོ་ལྔ་བར་བཞུགས། དགུང་ལོ་བཅུ་དྲུག་སྐབས་གདོན་གྱི་རྣམ་པས་སྐུ་མི་བདེ་ཙམ་བྱུང་ནས་རྟ་མགྲིན་གྱི་བསྙེན་པ་དུས་མཚམས་གཅིག་རིང་བསྐྱངས། དེ་ནས་ཡབ་ཀྱི་བཞེད་དོན་མ་བསྟུན་པར་ཆོས་སྒོར་ཞུགས། དགུང་ལོ་བཅུ་བདུན་ཐོག་པཎ་ཆེན་དཔལ་ལྡན་ཡེ་ཤེས་ཀྱི་དྲུང་དུ་དགེ་ཚུལ་བསྒྲུབས། དགུང་ལོ་བཅོ་བརྒྱད་ལ་འབྲས་བློ་གསལ་གླིང་གྲྭ་ཚང་དུ་ཆོས་ཞུགས་མཛད་ནས་ཆོས་མཛད་ཆེ་བའི་མཚན་བཞེས། གཞུང་ཆེན་བཀའ་པོད་ལྔར་གསན་སྦྱོང་མཛད། དགུང་ལོ་ཉེར་གསུམ་ལ་གཙང་པ་མཁན་ཆེན་རྡོ་རྗེ་འཆང་ཆེན་པོའི་དྲུང་དུ་བསྙེན་རྫོགས་བསྒྲུབས། དེ་ནས་ཕར་ཕྱིན་འཛིན་གྲྭའི་སྐབས་བླ་མའི་བཀའ་བཞིན་དབེན་པར་བཞུགས་རྒྱུ་ཐག་བཅད་ཀྱིས་གྲྭ་ས་ནས་ཕེབས་ཏེ་དཀའ་ཆེན་ཡེ་ཤེས་རྒྱལ་མཚན་གྱི་ཞབས་ལ་གཏུགས་ནས་དབེན་གནས་ཁག་ལ་སྒྲུབ་པ་རྩེ་གཅིག་ཏུ་མཛད། དགུང་ལོ་ང་གཅིག་ལ་ཀོང་པོ་དགའ་ལྡན་བསམ་གཏན་གླིང་ཕྱག་བཏབ། དགུང་ལོ་ང་གསུམ་ལ་ལྷ་སར་ཕེབས་ནས་ཚེ་ཆོག་གླིང་སྤྲུལ་སྐུར་སྐུ་ཡོན་སྒྲོན་འབུལ་དུ་ལོ་གཅིག་བཞུགས། རྒྱུན་དུ་དབུས་དང་ཀོང་པོ་ཁུལ་དུ་བྱང་ཆུབ་ལམ་རིམ་བཤད་ཁྲིད་དང་སྐུ་མཚམས་ཁོ་ནར་བརྩོན་པ་མཛད། རྩོམ་པ་ལ་ཡང《དཀོན་མཆོག་རྗེས་དྲན་གྱི་མདོ་འགྲེལ》《གཅོད་བདག་འཛིན་འཆིང་བ་གཅོད་པའི་མཚོན་ཆ》《ལམ་རིམ་ཚིགས་བཅད་མ》《ཡོངས་འཛིན་ཆོས་ཀྱི་རྒྱལ་པོའི་གསུང་ཟིན་བདེ་ལམ་དམར་ཁྲིད་དྲང་སྲོང་ཞལ་ལུང་ལས་སྐྱེས་བུ་ཆུང་ངུ》དང་། 《རྟེན་འབྲེལ་བསྟོད་པའི་ཊྰཀྐ》སོགས་བསྟན་བཅོས་ཁག་བཅུ་གྲངས་འགའ་མཛད་། དགུང་ལོ་ང་དྲུག་ལ་ཕེབས་པ་གཞན་དུ་གཤེགས་།
༼དུང་དཀར་ཚིག་མཛོད་ཆེན་མོ་༽ནས་བཏུས།