ཀོང་པོ་དེ་མོའི་རྡོ་བརྐོས་ཡི་གེ་
བཙན་པོ་ཁྲི་ལྡེ་སྲོང་བཙན་གྱིས་ཀོང་པོའི་དཀར་པོ་མང་པོ་རྗེ་ལ་གནང་བའི་བཀའ་གཙིགས་ཀྱི་ཡི་གེ་རྡོ་ལ་བརྐོས་པ་ཞིག་ཡིན། རྡོ་བརྐོས་ཡི་གེ་དེའི་གནས་ཡུལ་ནི། བོད་རང་སྐྱོང་ལྗོངས་ཀོང་པོ་ཉིང་ཁྲི་རྫོང་ཁོངས་སྨན་རི་ཆུས་གོ་འཇོ་ཤང་གི་གཡུང་དྲུང་འཛིན་གྲོང་ཚོའི་ཉེ་འགྲམ་དུ་ཡོད་པའི་ཕ་བོང་ཆེན་པོ་ཞིག་གི་ལྷོ་ནུབ་ཀྱི་ལྡེབས་ངོས་སུ་བརྐོས་ཡོད་ཅིང་། དེ་ཉི་འོད་དང་ཆར་རླུང་གི་གནོད་འཚེ་ཕོག་ཚད་ཆུང་བའི་བྱ་སྐྱིབས་ལྟ་བུའི་འོག་ཏུ་བརྐོས་ཡོད་པར་བརྟེན། ཡིག་འབྲུ་རྣམས་ཀྱང་ངོས་ཆོད་ཐུབ་ངེས་ཀྱི་གསལ་པོ་ཡོད། རྡོ་ཡིག་འདི་བརྐོས་པའི་དུས་ཚོད་ཐད་བཀའ་གཙིགས་འདི་དང་ལོ་རྒྱུས་ཡིག་ཆ་གཞན་དག་གང་དུ་ཡང་མི་གསལ་རུང་། བཙན་པོ་ཁྲི་ལྡེ་སྲོང་བཙན་གྱིས་སྲིད་དབང་བཟུང་བའི་དུས་སྐབས་སྤྱི་ལོ༧༩༧ནས༨༡༥བར་གྱི་ལོ་བཅོ་ལྔའི་རིང་དེར་ཡིན་པས་ད་ཕན་མི་ལོ༡༢༠༠མ་ཟིན་ཙམ་ཞིག་སོང་ཟིན། བཀའ་གཙིགས་འདིར་བོད་ཀྱི་ལོ་རྒྱུས་ཐོག་གལ་ཆེ་བའི་གནད་དོན་ཁག་དྲུག་གསལ་བཤད་བྱས་ཡོད། ༡་རྒྱལ་པོ་གཉའ་ཁྲི་བཙན་པོ་ནས་གྲི་གུམ་བཙན་པོ་ཕན་ཆད་གདུང་རབས་བདུན་བྱུང་བའི་རིང་ཕོ་བྲང་ཕྱིང་དབར་སྟག་རྩེར་བཞུགས་པ། ༢རྒྱལ་པོ་གྲི་གུམ་བཙན་པོ་ལ་སྲས་གཉིས་ཡོད་པའི་གཅེན་ནི་ཉ་ཁྱི་དང་། གཅུང་ནི་ཤ་ཁྱི་ཡིན་པ་གསལ་ཞིང་། སྲས་བྱ་ཁྲི་ཟེར་བ་ཡོད་ཚུལ་མི་གསལ་བ། ༣ཀོང་དཀར་པོ་མང་པོ་རྗེ་ལ་ཡབ་ཁྲི་སྲོང་ལྡེ་བཙན་གྱི་སྐབས་བཀའ་གཙིགས་གནང་བ་དེར་སླར་ཡང་རྒྱབ་གནོན་གྱི་བཀའ་གཙིགས་འདི་གནང་ཚུལ། ༤སྲས་གཅེན་གཅུང་གཉིས་ཀ་རྒྱལ་པོ་གྲི་གུམ་བཙན་པོའི་སྲས་ཡིན་པ་འདྲ་ཡང་གཅུང་པོའི་གདུང་རྒྱུད་རྣམས་ཀྱིས་བཙན་པོའི་རྒྱལ་སྲིད་བཟུང་བ་དང་། གཅེན་པོའི་གདུང་རྒྱུད་རྣམས་ཀོང་དཀར་པོ་མང་པོ་རྗེའི་རྒྱལ་ཕྲན་གྱི་གོ་གནས་ཙམ་དུ་བསྡད་པ་དེར་ཡབ་ཁྲི་སྲོང་ལྡེ་བཙན་གྱི་དུས་སུ་དཔྱ་ཁྲལ་དང་། ལོ་རེའི་རྟེན་འབུལ་སོགས་གང་ཡང་མི་དགོས་པར་ཀོང་པོའི་ཁུལ་དུ་རང་སྐྱོང་རྒྱལ་ཕྲན་གྱི་ཚུལ་དུ་གནས་ཆོག་པའི་བཀའ་གཙིགས་གནང་ཡོད་པ། ༥ས་གནས་ཀྱི་དཔོན་རིགས་འགའ་ཞིག་གིས་དཀར་པོ་མང་པོ་རྗེའི་སར་ནས་ཁྲལ་གསར་པ་སྡུད་པའི་བསྙད་གཙེར་བྱས་པ་དེ་ཕྱིན་ཆད་ཡབ་ཁྲི་སྲོང་། ལྡེ་བཙན་གྱི་བཀའ་གཙིགས་སུ་འཁོད་པ་བཞིན་ཁྲལ་རིགས་གང་ཡང་མི་དགོས་པར་གནས་ཆོག་པའི་སྙན་ཞུ་ཕུལ་བ་ལྟར་སྲས་ཁྲི་ལྡེ་སྲོང་བཙན་གྱིས་ཀྱང་བཀའ་གཙིགས་བསྐྱར་དུ་གནང་བ། ༦་བཙན་པོའི་དུས་སྐབས་ཀྱི་མངའ་འོག་ཏུ་གཏོགས་པའི་རྒྱལ་ཕྲན་རྣམས་དཔོན་འབངས་གཞན་དང་མི་འདྲ་བའི་དམིགས་བསལ་གྱི་ཐོབ་ཐང་ཡོད་ཚུལ་གསལ་པོར་བསྟན་པ་བཅས་ཡིན། བཀའ་གཙིགས་འདིའི་མ་ཡིག་དང་འགྲེལ་བཤད་སྐོར་ཁ་བྱང་དུ《བོད་ཀྱི་རྡོ་རིང་དང་དྲིལ་བུའི་ཁ་བྱང་གཅེས་བསྡུས》ཅེས་འཁོད་པའི་དཔེ་དེབ་པེ་ཅིན་མི་རིགས་དཔེ་སྐྲུན་ཁང་གི་ལྕགས་དཔར་མ་དེའི་ནང་གོ་བ་ཐེབས་ཚོད་ཀྱིས་འགྲེལ་བཤད་མདོར་བསྡུས་འཁོད་ཡོད་པ་དེ་དཔྱད་གཞིར་བཀོད་པ་ཞིག་ཡིན་པ་ལས། མཐའ་ཅིག་ཏུ་གཏན་འཁེལ་བྱས་པ་ནི་མིན། འགྲེལ་བཤད་བྱས་ཚུལ་དེ་དང་མི་འདྲ་བ་ཞིག་བོད་ལྗོངས་སྤྱི་ཚོགས་ཚན་རིག་ཁང་གི་མཁས་དབང་ཆབ་སྤེལ་ཚེ་བརྟན་ཕུན་ཚོགས་ལགས་མཆོག་གིས་རྩོམ་བྲིས་གནང་བའི་དཔྱད་གཏམ《ཀོང་པོ་དེ་མོའི་རྡོ་བརྐོས་ཡི་གེའི་སྐོར་གླེང་བ》ཞེས་པ་ཞིག་༡༩༨༥ལོའི《བོད་ལྗོངས་ཞིབ་འཇུག》དུས་དེབ་ཨང་གཉིས་པའི་ནང་འཁོད་འདུག་པ་དེར་གཟིགས་ན་དཔྱད་བསྡུར་གནང་རྒྱུར་ཕན་ཐོགས་ཆེན་པོ་འདུག་ལགས།
༼དུང་དཀར་ཚིག་མཛོད་ཆེན་མོ་༽ནས་བཏུས།