ཀོ་ལྤགས་ཀྱི་གཞི་

བཀའ་འགྱུར་འདུལ་བའི་སྡེ་སྣོད་ཀྱི་ཁོངས་སུ་གཏོགས་པ་ལུང་གཞི་ལ་དོན་ཚན་བཅུ་བདུན་ཡོད་པ་ལས་གཞི་ལྔ་པ་ཀོ་ལྤགས་ཀྱི་གཞི་ཞེས་པའི་ནང་གཙོ་བོར་ཆུ་ལ་འཁྱགས་པ་ཆགས་པའི་ཡུལ་དུ་ཞྭ་དང་ལྷམ་སྒྲོ་གུ་ཅན་འཆང་ཆོག་པ་དང་། གཅན་གཟན་གྱི་པགས་པའི་ནང་ནས་དོམ་ལྤགས་ནི་མིག་ནད་ཅན་གྱི་དགེ་སློང་གིས་གདན་དུ་བཏིང་ཆོག་པ་ལས་གཞན་གཅན་གཟན་གྱི་པགས་རིགས་ལོངས་སྤྱོད་མི་ཆོག་པ་དང་། རི་དྭགས་ཀྱི་པགས་པ་ལས་བཟོས་པའི་ལྷམ་ཡང་ས་རྩུབ་ཅིང་གཟར་ཟུག་ཆེ་བའི་ཡུལ་དུ་འཆང་ཆོག་པ་དང་། མཐིལ་རྡོལ་ན་རྡོག་པ་རྒྱག་རྒྱུར་མཁོ་བའི་ཀོ་གྲི་ཆུང་ངུ་དང་སྨྱུང་བུ་བཅས་འཆང་ཆོག་པའི་དམིགས་བསལ་གྱི་སྐོར་གསུངས་པ་དེར་ཀོ་ལྤགས་ཀྱི་གཞི་ཞེས་ཟེར། བཀའ་འགྱུར་སྡེ་དགེ་དཔར་མའི་འདུལ་བ[ཀ]པའི་སྨད་ནས[ཁ]པའི་སྟོད་བར་ཡོད།
༼དུང་དཀར་ཚིག་མཛོད་ཆེན་མོ་༽ནས་བཏུས།