ཀུནྡ་ལྟ་བུའི་བྱང་སེམས་

མེ་ཏོག་ཀུ་མུ་ཏའི་མདོག་ལྟར་ཁ་དོག་དཀར་བའི་བྱང་ཆུབ་ཀྱི་སེམས་ཞེས་པའི་དོན་ཏེ། སྐྱེས་པའི་ལུས་ལ་ཁུ་ཁྲག་གཉིས་ཡོད་པའི་ནང་གསེས་ཁུ་བ་ནི་ལུས་ཀྱི་ཟུངས་ཐམས་ཅད་ཀྱི་གཙོ་བོ་ཡིན་ཅིང་། དེ་མ་ཉམས་པར་བཟུང་བ་ལ་བརྟེན་ནས་གསང་སྔགས་ཀྱི་རྟོགས་པ་གོང་ནས་གོང་འཕེལ་དུ་འགྲོ་བ་དང་། ཐུག་སངས་རྒྱས་ཀྱི་གཟུགས་སྐུ་མཚན་དཔེས་བརྒྱན་པ་འགྲུབ་ཐུབ་པ་ཡིན་པས་ན་བྱང་ཆུབ་ཀྱི་སེམས་ཞེས་ནུས་པའི་སྒོ་ནས་མིང་བཏགས་པ་ཡིན།
༼དུང་དཀར་ཚིག་མཛོད་ཆེན་མོ་༽ནས་བཏུས།