ཀུན་སློང་གཉིས་

ལས་བཟང་ངན་འབྲིང་གསུམ་གང་བརྩམས་ཀྱང་ཐོག་མར་ལས་དེ་བྱ་འདོད་ཀྱི་བསམ་པ་ཞིག་སྐྱེས་ནས་ལས་དེ་བརྩམ་གྱི་ཡོད་པས། དེ་འདྲའི་བསམ་པ་དེ་ལ་ཀུན་སློང་ཞེས་བརྗོད་པ་ཡིན་ཅིང་། དེ་ལ་ནང་གསེས་ཀྱིས་དབྱེ་ན་གཉིས་ཏེ། ༡་རྒྱུའི་ཀུན་སློང་དང་། ༢དུས་ཀྱི་ཀུན་སློང་གཉིས་ཡོད། དེའི་དང་པོ་རྒྱུའི་ཀུན་སློང་ཞེས་པ་ནི། བྱ་བ་དེ་མ་བརྩམས་གོང་གི་བྱ་བ་དེ་དང་དེ་བྱེད་འདོད་ཀྱི་བསམ་བློ་ཞིག་ཡོད་པ་དེ་ཡིན། གཉིས་པ་དུས་ཀྱི་ཀུན་སློང་ཞེས་པ་ནི། བྱ་བ་དེ་དངོས་སུ་བྱེད་དུས་ཀྱི་བསམ་བློ་དེ་ལ་ཟེར། དེ་འདྲའི་ཀུན་སློང་རིགས་གཉིས་པོ་དེ་ཡི་ནུས་པ་མི་འདྲ་བ་ནི། རྒྱུ་ཡི་ཀུན་སློང་གིས་བྱ་བ་དེ་ལ་ཞུགས་པའི་འབད་བརྩོན་སྐྱེད་པར་བྱེད་ཅིང་། དུས་ཀྱི་ཀུན་སློང་གིས་བྱ་བ་དེ་མཐར་ཐོན་པར་བྱེད་པ་ཡིན། དེའི་ཞར་བྱུང་ཀུན་སློང་དེ་གཉིས་གཙོ་ཆེ་ཆུང་གི་ཁྱད་པར་དང་རྒྱུའི་ཀུན་སློང་དང་དུས་ཀྱི་ཀུན་སློང་ལ་དགེ་མི་དགེ་ལུང་མ་བསྟན་རིགས་འདྲ་བ་གསུམ་དང་། རིགས་མི་འདྲ་བ་གསུམ་ཡོད་ཚུལ། དེ་གཉིས་བར་མུ་བཞི་ཡོད་ཚུལ་བཅས《མཆིམས་མཛོད》ལྕགས་དཔར་མའི་ཤོག་གྲངས༣༥༡ནས༣༥༣བར་གསལ་བ་དེར་གཟིགས།
༼དུང་དཀར་ཚིག་མཛོད་ཆེན་མོ་༽ནས་བཏུས།