ཀུན་མཁྱེན་བུ་

བོད་ལྗོངས་ཡོངས་སུ་གྲུབ་མཐའ་རིས་མེད་ཀུན་གྱིས་གུས་བཀུར་ཞུ་བའི་པཎྜིཏ་ཆེན་པོ་བུ་སྟོན་རིན་ཆེན་གྲུབ་ཡིན་ཅིང་། ཁོང་ནི་གཙང་སྟོད་ཀྱི་ཤབ་སྨད་སྒོམ་གནས་ཞེས་པའི་གྲོང་དུ་ཡབ་བླ་མ་རྒྱལ་མཚན་དཔལ་བཟང་དང་ཡུམ་སློབ་དཔོན་མ་བསོད་ནམས་འབུམ་གྱི་སྲས་སུ་རབ་བྱུང་ལྔ་པའི་ལྕགས་སྟག(༡༢༩༠)ལོར་སྐུ་འཁྲུངས། སྐུ་གཞོན་ནུ་བྱིས་པའི་དུས་ནས་ཐུགས་རབ་དང་ཀུན་སྤྱོད་འགྲན་ཟླ་བྲལ་ཞིང་འབྲི་ཀློག་སོགས་ཐེངས་རེ་རེ་ཙམ་གྱིས་མཁྱེན་པའི་རྩལ་ཕུན་སུམ་ཚོགས་པ་མངའ། དགུང་ལོ་བརྒྱད་ལ་ཕེབས་སྐབས་ཁྲོ་ཕུ་བསོད་ནམས་སེང་གེའི་དྲུང་ནས་སེམས་བསྐྱེད་དང་གསང་སྔགས་ཀྱི་དབང་གསན། དགུང་ལོ་བཅོ་བརྒྱད་ལ་ཕེབས་སྐབས་མཁན་པོ་སེང་གེ་དཔལ་དང་། སློབ་དཔོན་ཚད་མའི་སྐྱེས་བུ་གཉིས་ལས་རབ་ཏུ་བྱུང་། སློབ་དཔོན་དེ་ཉིད་དགེ་རྒན་དུ་བསྟེན་ནས་ཕར་ཕྱིན་དང་ཚད་མ་ལ་ཐུགས་གཉེར་མཛད་དེ། དགུང་ལོ་ཉེར་གཅིག་ལ་ཕེབས་སྐབས་བཤད་པ་དང་གྲྭ་སྐོར་མཛད་པས་མཁས་པ་གཞན་གྱིས་འགྲན་པར་མི་ནུས་པའི་མཚན་སྙན་གྱིས་ཡོངས་སུ་ཁྱབ། སློབ་གཉེར་གནང་བའི་རིང་ཞོགས་པ་དུས་ཐུང་ནང་དཔེ་རིང་མདའ་ཚད་མ(ཡིག་ཕྲེང་རིང་ཐུང་སྐར་མ༥༢ཕྲེང་རེར་ཡིག་འབྲུ༥༥ངོས་རེར་ཡིག་ཕྲེང་བདུན་རེ་ཡོད་པ་ཞིག)བདུན་རེ་ཐུགས་ལ་བཟུང་བར་མཛད། གཞན་ཡང་སློབ་དཔོན་དེ་ཉིད་ཀྱི་དྲུང་ནས་འདུལ་བ་དང་། མངོན་པ། དབུ་མ་བཅས་དང་། ཡང་རྩེ་བ་རིན་ཆེན་སེང་གེ་ལས་གསང་བདེ་འཇིགས་གསུམ། གཤིན་རྗེ་གཤེད། འཁོར་ལོ་ཆེན་པོ། སྒྲོལ་མ། ཕག་མོ། ཀུན་རིག་སོགས་རྒྱུད་སྡེ་བཞིའི་དབང་ཁྲིད་ཤིན་ཏུ་མང་བ་དང་། བླ་མ་རྣམ་སྣང་བའི་དྲུང་ནས་མ་གཅིག་གི་གཅོད་སྐོར། རང་ཉིད་ཀྱི་ཡབ་བྲག་སྟོན་རྒྱལ་མཚན་དཔལ་བཟང་ལས་ཕྱག་ན་རྡོ་རྗེའི་སྐོར། མཁན་ཆེན་དཀའ་བཞི་པ་དཀོན་མཆོག་གཞོན་ནུ་ལས་སྤྱན་རས་གཟིགས་དོན་ཡོད་ཞགས་པའི་སྐོར། ཐར་པ་ལོ་ཙཱ་བ་ཉི་མ་རྒྱལ་མཚན་ལས་སྒྲ་དང་སྙན་ངག། ཀུན་མཁྱེནའཕགས་འོད་ལས་གསང་བ་འདུས་པ། བླ་མ་རྡོ་རྗེ་རྒྱལ་མཚན་ལས་དུས་འཁོར་སོགས་བོད་འདིར་ཆོས་རྒྱུན་གང་བཞུགས་ཡོངས་སུ་རྫོགས་པ་གསན། དགུང་ལོ་ཉེར་གསུམ་པ་ལ་མཁན་ཆེན་དཀའ་བཞི་པ་གྲགས་པ་གཞོན་ནུ་དང་སློབ་དཔོན་བསོད་ནམས་གྲགས་པ་གཉིས་ཀྱི་དྲུང་ནས་བསྙེན་རྫོགས་ཀྱི་སྡོམ་པ་བཞེས། དེ་ནས་མི་རིང་བརཁྲོ་ཕུ་དགོན་པའི་འཆད་ཉན་གྱི་སློབ་དཔོན་མཛད་དེ་ལོ་ཤས་བར་གྲྭ་སློབ་རྣམས་ལ་མདོ་སྔགས་གཉིས་ཀྱི་སློབ་ཁྲིད་དུས་སྐབས་ནམ་ཡོད་ལ་སྐུ་ངལ་མེད་པར་བསྐྱངས་ཤིང་། རྒྱ་གར་དང་ཁ་སིནྔྷུ་སོགས་ཀྱི་ཡི་གེ་དང་སྐད་མི་འདྲ་བ་འགའ་ཞིག་ཀྱང་སློབ་སྦྱོང་མཛད་དེ་གཞི་འགྱུར་གནང་ཐུབ་པའི་ཚད་ལོན་པར་མཛད། མཚན་མོའི་དུས་སུ་མནལ་མ་གཟིམས་པར་ཐུགས་དམས་ཉམས་བཞེས་གཙོ་བོར་མཛད་པས་མདོ་རྒྱུད་ནས་བཤད་པ་ལྟར་གྱི་རྟོགས་པའི་ཡོན་ཏན་ཀྱང་ཐུགས་རྒྱུད་ལ་འཁྲུངས་པ་སོགས་བསྟན་པ་ཡོངས་རྫོགས་ཀྱི་བདག་པོར་བཞེངས། དགུང་ལོ་སོ་གཅིག་པ་རབ་བྱུང་ལྔ་པའི་ལྕགས་སྤྲེལ(༡༣༢༠)ལོར་ཞ་ལུའི་སྐུ་ཞང་གྲགས་པ་རྒྱལ་མཚན་གྱིས་གདན་དྲངས་པ་ལྟར་ཞ་ལུའི་མཁན་པོར་ཕེབས། གྲྭ་སློབ་རྣམས་ལ་གཞུང་ཆེན་པོ་ལྔའི་སློབ་ཁྲིད་དང་སློབ་མ་སྣོད་ལྡན་ཉུང་ཤས་ལ་གསང་སྔགས་ཀྱི་དབང་ཁྲིད་ལུང་ལ་སོགས་པ་གནང་ཞིང་། ཞ་ལུ་རི་ཕུག་གི་སྒྲུབ་སྡེ་ཡང་ཕྱག་བཏབ་པས། སྐབས་དེར་ཞ་ལུའི་ཆོས་སྡེ་རང་ལ་དགེ་འདུན་ཞལ་གྲངས་སུམ་སྟོང་བརྒྱད་བརྒྱ་ཙམ་དང་། རི་ཕུག་ཏུ་སྒྲུབ་པ་ཉམས་བཞེས་མཛད་མཁན་ཚོགས་པ་ལྔ་བརྒྱ་ཙམ་འདུས་ཐོག། སློབ་མ་མཁས་བཙུན་བཟང་གསུམ་འཛོམས་ཤིང་བསྟན་པ་འཛིན་པའི་སྐྱེས་ཆེན་དང་། གཞུང་ཆེན་པོ་འཆད་ཉན་གྱི་སློབ་དཔོན་སྒྲུབ་པའི་རྒྱལ་མཚན་འཛིན་པའི་བྱ་བྲལ་རྣལ་འབྱོར་པ་སོགས་གྲངས་ལས་འདས་པ་ཞིག་བྱུང་ཞིང་། དེ་དག་གི་ཞོར་ལ་སྐུ་གསུང་ཐུགས་རྟེན་བཞེངས་པ་དང་། དགེ་འདུན་གྱི་སྡེ་ལ་བསྙེན་བཀུར་མཛད་པ། མདོ་སྔགས་ཀྱི་གཞུང་ཆེན་མོ་མང་པོ་མཛད་པ་སོགས་གང་དང་གང་ལའང་སྐུ་ཚེ་གཅིག་རིང་དེ་ཁོ་ན་མཛད་ནས་བཞུགས་པ་ལྟ་བུའི་མཛད་རྗེས་བློ་ཡུལ་དུ་ཤོང་དཀའ་བ་ཞིག་ཡིན། དགུང་ལོ་དོན་ལྔ་བཞེས་པ་རབ་བྱུང་དྲུག་པའི་ཤིང་འབྲུག(༡༣༦༤)ལོར་དགོངས་པ་མྱ་ངན་ལས་འདས། གསུང་རྩོམ་ཡང《ཆོས་འབྱུང་ཆེན་མོ》དང《དུས་འཁོར་རྩ་རྒྱུད་ཀྱི་འགྲེལ་པ》སོགས་དུས་འཁོར་གྱི་སྐོར། 《བདེ་མཆོག་རྩ་རྒྱུད་ཀྱི་འགྲེལ་པ》སོགས་བདེ་མཆོག་གི་སྐོར། 《གསང་འདུས་རྩ་རྒྱུད་ཀྱི་འགྲེལ་པ》སོགས་གསང་བ་འདུས་པའི་སྐོར། 《རྒྱུད་སྡེ་རྒྱ་མཚོའི་གྲུ་གཟིངས》སོགས་རྣལ་འབྱོར་རྒྱུད་ཀྱི་སྐོར། 《རྒྱུད་སྡེ་སྤྱིའི་རྣམ་བཤད》རྒྱས་འབྲིང་བསྡུས་གསུམ། 《ཕར་ཕྱིན་མངོན་རྟོགས་རྒྱན་གྱི་འགྲེལ་པ》《མངོན་པ་ཀུན་བཏུས་ཀྱི་འགྲེལ་པ》《སྤྱོད་འཇུག་གི་འགྲེལ་པ》《ཚད་མ་རྣམ་ངེས་ཀྱི་འགྲེལ་པ》《སྒྲ་མདོ་ཀ་ལཱ་པའི་འགྲེལ་པ》སོགས་ལྷ་ས་ཞོལ་དཔར་ཁང་གི་དཔར་མར་པོད༢༨་བཞུགས། རྣམ་ཐར་ལོ་རྒྱུས་རྒྱས་པ་ནི། ཐུགས་སྲས་རིན་ཆེན་རྣམ་རྒྱལ་གྱིས་མཛད་པའི《དཔལ་ལྡན་བླ་མ་དམ་པ་མཁན་ཆེན་ལོ་ཙཱ་བའི་རྣམ་པར་ཐར་པ་སྙིམ་པའི་མེ་ཏོག》ཅེས་ཁ་བྱང་དུ་འཁོད་པ་ཐུགས་སྲས་དེ་ཉིད་ཀྱི་གསུང་འབུམ་ནང་དུ་ཡོད། ཁོང་གི་མཛད་རྣམ་མདོར་བསྡུས་ཤིག《དེབ་ཐེར་དམར་པོའི་མཆན་འགྲེལ》(མི་རིགས་དཔེ་སྐྲུན་ཁང་གིས༡༩༨༡ལོར་པར་སྐྲུན་བྱས་པའི་དེབ་གཟུགས་ལྕགས་དཔར་མ)གྱི་མཆན་རྟགས་ཨང༣༦༤པར་གསལ་བས་དེར་གཟིགས།
༼དུང་དཀར་ཚིག་མཛོད་ཆེན་མོ་༽ནས་བཏུས།