ཀུན་དགའ་ར་བ་

འདི་ལ་བོད་ཀྱི་ལོ་རྒྱུས་ཐོག་ཐ་སྙད་འདོགས་ཚུལ་མི་འདྲ་བ་གསུམ་ཡོད། ༡་སྤྱིར་བཏང་གོམས་གཤིས་ཐོག་ཀུན་དགའ་ར་བ་ཞེས་གསུང་རབ་ཀྱི་རྟེན་འཇོག་སའི་དཔེ་ཁྲི་ལ་གོ་བ་ལེན་གྱི་ཡོད་པ། ༢་དགེ་འདུན་རྣམས་ཆོས་ཀྱི་བྱ་བར་འདུ་འཚོགས་གནང་ཡུལ་གྱི་འདུ་ཁང་དང་ཆོས་གྲྭ་ལ་གོ་བ་ལེན་དགོས་པ། ༣དགེ་འདུན་གྱི་གནས་ཁང་ལ་གོ་དགོས་པ་བཅས་ཡོད། གཞན་ཡང་འབྲས་སྤུངས་དགའ་ལྡན་ཕོ་བྲང་རྒྱབ་ངོས་ཀྱི་ཀུན་དགའ་ར་བ་ཞེས་པའི་ལྷ་ཁང་འདི་ནི་རབ་བྱུང་བཅུ་གཅིག་པའི་ལྕགས་བྱི(༡༦༦༠)ལོ་ནས་ས་སྤྲེལ(༡༦༦༨)བར་ལོ་ངོ་དགུའི་རིང་སྡེ་སྲིད་འཕྲིན་ལས་རྒྱ་མཚོས་དགའ་ལྡན་ཕོ་བྲང་གི་སྲིད་དབང་བསྐྱངས་སྐབས་ཐོག་མའི་འཛུགས་སྐྲུན་བྱས་ཤིང་། དེ་རྗེས་སྡེ་སྲིད་སངས་རྒྱས་རྒྱ་མཚོའི་སྐབས་ཡང་བསྐྱར་ཉམས་གསོ་དང་རྒྱ་བསྐྱེད་གནང་། དེ་རྗེས་རབ་བྱུང་བཅུ་དྲུག་པའི་ལྕགས་སྦྲུལ(༡༩༤༡)ལོ་ནས་ལྕགས་སྟག(༡༩༥༠)ལོ་བར་ལོ་ངོ་བཅུའི་རིང་སྟག་བྲག་རིན་པོ་ཆེས་བོད་ས་གནས་ཀྱི་སྲིད་དབང་བསྐྱངས་སྐབས་སླར་ཡང་ཉམས་གསོ་དང་རྒྱ་བསྐྱེད་ཀྱིས་ད་ལྟའི་བཟོ་དབྱིབས་འདི་བྱུང་། ཕོ་བྲང་འདིར་རྟེན་གྱི་གཙོ་བོར་སྣར་ཐང་འཆི་མེད་སྒྲོལ་མ་དང་། རྒྱལ་རྩེ་རྩེ་ཆེན་སྒྲོལ་མ། ཡར་འབྲོག་གཡུ་མཚོའི་སྒྲོལ་མ། སློབ་དཔོན་ཙནྡྲ་གོ་མིའི་ཐུགས་དམ་རྟེན་སྤྱན་རས་གཟིགས་སོགས་ལོ་རྒྱུས་ངོ་མཚར་ཅན་གྱི་སྐུ་བརྙན་མང་པོ་ཡོད། ལྡེབས་བྲིས་སྐོར། དེ་སྔོན་ཏཱ་ལའི་བླ་མ་སྐུ་ཕྲེང་ལྔ་པ་ཞལ་བཞུགས་སྐབས་སྡེ་སྲིད་འཕྲིན་ལས་རྒྱ་མཚོས་ཀུན་དགའ་ར་བའི་ཕོ་བྲང་གསར་སྐྲུན་གནང་བ་དང་དུས་མཚུངས་ལྗགས་བཀོད་གནང་བ་ལྟར་གཡས་སྐོར་གྱི་ལྡེབས་བྲིས་ལ། བོད་དུ་འགྲོ་བ་མི་ཐོག་མར་བྱུང་ཚུལ་ནས་སྐུ་ཕྲེང་ལྔ་པ་ཆེན་པོས་པོ་ཏཱ་ལའི་ཕོ་བྲང་དཀར་པོ་གསར་བཞེངས་མ་གནང་བར་གྱི་རྒྱལ་རབས་དང་ཆོས་འབྱུང་གི་ལོ་རྒྱུས་ཆ་ཚང་བརྐོད་གནང་མཛད་ཡོད་ཅིང་། རྗེས་སུ་སྡེ་སྲིད་སངས་རྒྱས་རྒྱ་མཚོས་ལྡེབས་བྲིས་དེར་མཐོང་ཆེན་གནང་སྟེ་ཐང་ཀ་ངོ་གྲངས་བཞི་བཅུ་ཞེ་གསུམ་གྱི་ཐོག་བཤུས་གནང་མཛད་པ་དེ་གྲས་ཀྱི་ཐང་ག་ངོ་གྲངས་བཅོ་ལྔ《བོད་ལྗོངས་ཐང་ཁ》ཞེས་པའི་བརྙན་དེབ་ཐོག་བཀོད་ཡོད།
༼དུང་དཀར་ཚིག་མཛོད་ཆེན་མོ་༽ནས་བཏུས།