ཀརྨ་རང་བྱུང་རྡོ་རྗེ།

ཡོང་ཁུངས་Wikipedia

ཀརྨ་རང་བྱུང་རྡོ་རྗེ།

འཁྲུངས་ཡུལ།[རྩོམ་སྒྲིག]

གཙང་སྟོད་སྐྱིད་གྲོང་འཕགས་པ་ཝ་ཏིའི་ལྷ་ཁང་གི་ལྷོ་ཕྱོགས་གངས་ཞུར་མོ་ཞེས་པར་འཁྲུངས།

ཡབ་ཡུམ།[རྩོམ་སྒྲིག]

ཡབ་ཆོས་དཔལ་དང་། ཡུམ་ཇོ་མོ་གཡང་འདྲེན།

འཁྲུངས་འདས་ཀྱི་ལོ།[རྩོམ་སྒྲིག]

1284 (རབ་བྱུང་ལྔ་པའི་ཤིང་ཕོ་སྤྲེལ་ལོ།)1331ལོར་སྐུ་གཤེགས་།

སློབ་སྦྱོང[རྩོམ་སྒྲིག]

དགུང་ལོ་ལྔ་པར་གྲུབ་ཆེན་ཨོ་རྒྱན་པ་རིན་ཆེན་དཔལ་མཇལ་བར་བྱོན། གྲུབ་ཆེན་པས། ངའི་བླ་མའི་གསང་མཚན་རང་བྱུང་རྡོ་རྗེ་ཡིན་པས་དེ་ཀ་འདོགས་གསུངས་ནས་རང་བྱུང་རྡོ་རྗེར་མཚན་གསོལ། དགེ་བསྙེན་གྱི་སྡོམ་པ་དང་སེམས་བསྐྱེད་གནང་། དགུང་ལོ་བདུན་པར་ཁྲོ་ཕུ་ཤེས་རབ་ཀྱིས་མཁན་པོ་མཛད་དེ་དགེ་ཚུལ་བསྒྲུབས། འདུལ་བ་གསན། རྟ་ལོར་ས་གཡོས་བྱུང་བའི་ཤིང་རྟ་ལོའི༼༡༢༩༤༽རྗེས་ཀྱི་ལོ་ཤས་དེའི་ནང་ལ་གནས་བརྟན་གཞོན་ནུ་འབྱུང་བས་མཁན་པོ་དང་། དགེ་འདུན་རིན་ཆེན་གྱིས་ལས་སློབ་མཛད་དེ་བསྙེན་པར་རྫོགས། འདུལ་བ་ཡོང་ས་རྫོགས་གསན། སློབ་དཔོན་ཤེས་རབ་དཔལ། རྒྱ་སྒོམ་ཡེ་ཤེས། སྙེ་མདོ་ཀུན་དགའ་དོན་གྲུབ་སོགས་ལས་བོད་ཀྱི་ཡུལ་དུ་བཀའ་བསྟན་འགྱུར་རོ་འཚལ་ཐམས་ཅད་གསན་པར་མཛད། དེ་ནས་ཀརྨའི་གདན་སར་བྱོན། ས་སྐྱ་འཇམ་དབྱངས་རིན་ཆེན་རྒྱལ་མཚན་དེར་ཕེབས་པ་དང་མཇལ་ནས་གསུང་གླེང་མཛད། ཁ་བ་དཀར་པོར་བྱོན་ནས་གནས་ཡིག་བརྩམས། དེ་ནས་ཀམ་པོ་གནས་ནང་དུ་བྱོན་། ཆུ་གླང་ལོར༼༡༣༡༣༽ཙྰ་རིར་ཕེབས། ཟླ་བ་གསུམ་བཞུགས། མཚུར་ཕུར་ཚུར་ཕེབས། ཤིང་བྱ་ལོར༼༡༣༢༥༽ཀོང་པོར་གདན་དྲངས། དེར་སྒྲུབ་སྡེ་འགའ་ཞིག་བཏབ། མདོ་ཁམས་སུ་བྱོན། སོག་ཆུར་ལྕགས་ཟམ་བཙུགས། དེ་ནས་ཧོར་རྒྱལ་པོས་གདན་འདྲེན་བྱས། ལྕགས་ལུག་ལོར༼༡༣༣༡༽གསེར་ཡིག་པ་མགོན་པོ་ཚིམ་ཆིང་སོགས་དབུས་སུ་སླེབས་པས་ཆོས་རྗེ་ཀོང་པོ་ནས་གདན་དྲངས། གདན་ཞུའི་འཇའ་ས་བསྒྲགས། ས་སྐྱའི་ཏི་ཤྲྰི་ཀུན་དགའ་རྒྱལ་མཚན་ནས་མེས་རྒྱལ་ནང་ཁུལ་དུ་ཕེབས་དགོས་ཚུལ་ཞུས། ཀུན་རྒྱན་པ་རང་ཉིད་སྔོན་དུ་ཕེབས། ཆུ་སྤྲེལ་ལོའི༼༡༣༣༢༽ཟླ་གཉིས་པའི་ཚེས་གཅིག་ལ་སྟོད་ལུང་མཚུར་ཕུ་ནས་བཏེགཟླ་བ་བརྒྱད་པའི་ཚེས་བཅུ་གཉིས་ལ་རྒྱལ་པོ་གཤེགས་ནས་མཇལ་མ་ཐུབ་ཀྱང་། ཆུ་སྤྲེལ་ཟླ་བཅུ་གཅིག་པའི་ཚེས་བཅོ་བརྒྱད་ལ་ཕོ་བྲང་ཆེན་པོར་འབྱོར། རྒྱལ་བུ་རཏ་ན་ཤྲི་སོགས་ཀྱི་ས་བསུ་བ་རྒྱ་ཆེན་པོ་བྱས། དེ་རྗེས་རྒྱལ་བུ་ཡང་འདས། དེའི་གཅེན་པོ་ཐོ་གན་ཐེ་མུར་སྨན་རྩེའི་ཡུལ་ནས་གདན་དྲངས། དེ་ནས་རྒྱལ་པོ་ཐོ་གན་ཐེ་མུར་དང་བཙུན་མོ་བློན་པོ་སོགས་ལ་དབང་བསྐུར་ཆོས་བཤད་གནང་། དེ་ནས་ཤིང་ཁྱིའི་ལོར་༼༡༣༣༤༽ཆོས་རྗེ་བོད་དུ་ཕེབས་ཁར་ཚལ་པ་སི་ཏུ་དགེ་སྦྱོང་ཆེན་པོ་ལ་གོ་ཤྲིའི་མིང་དང་ཤེལ་ཐམ། མཚུར་ཕུ་དང་ཀརྨ་པ་སོགས་ལ་བདག་རྐྱེན་དང་བོད་སྤྱི་ལ་ཕན་པའི་འཇའ་ས་གསུང། བསྟན་འགྱུར་བཞེངས་པའི་ཆ་རྐྱེན་སོགས་ཕུལ་ནས་བོད་དུ་ཡར་བྱོན། ཤིང་ཕག་ལོའི༼༡༣༣༥༽ཟླ་བ་བརྒྱད་པར་འདམ་དུ་ཕེབས། བོད་ཀྱི་ཆེ་དགུས་བསུས། འཇའ་ས་གསུམ་པོ་བསྒྲགས། བོདག་དུ་ཕེབས་ནས་གསེར་དངུལ་གྱིས་བསྟན་འགྱུར་པོ་ཏི་བརྒྱ་དང་དྲུག་ཅུ་བཞེངས། མེ་བྱི་ལོར༼༡༣༣༦༽གདན་འདྲེན་གསེར་ཡིག་པ་གསུམ་པ་སླེབས། ཟླ་བ་བརྒྱད་པར་སླར་ཡང་རྒྱ་ནག་ཏུ་བྱོན་ནས། མེ་གླང་ལོའི༼༡༣༣༧༽ཟླ་གསུམ་པའི་ཚེས་གཅིག་ལ་ཕོ་བྲང་ཆེན་པོར་ཕེབས། ཕེབས་བསུ་མཐོང་བཀུར་སོགས་སྔར་བས་ཀྱང་ཆེ། གསེར་བྲེ་བཞི་སོགས་འབུལ་བ་ཕུལ། ས་གཡོས་ཆེན་པོ་བྱུང་སྐབས་ཆོས་རྗེ་དང་གོང་མ་མཆོད་ཡོན་གཉིས་ཐང་དུ་གཟིམས་གུར་ཕུབ་ནས་བཞུགས་པས་ཉེས་སྐྱོན་མ་བྱུང་། དགུང་གྲངས་ང་དྲུག་ཏུ་ཕེབས་པ་ས་ཡོས་ལོའི༼༡༣༣༩༽ཟླ་དྲུག་པའི་ཚེས་བཅུ་བཞི་ལ་ཞི་བར་གཤེགས། ཆོས་རྗེ་འདི་ལ་སློབ་མ་གྲངས་ཆེ་བ་ཞྭ་དམར་གྲངས་པ་སེང་གེམཁས་གྲུབ་གཡུང་སྟོན་པ། རྟ་སྣ་གོ་ཤྲི་ཀུན་རྒྱལ། ཚལ་པ་སི་ཏུ། གཡག་སྡེ་པན་ཆེན། ཀུན་མཁྱེན་དོལ་པོ་པ་སོགས་མང་ངོ་། གསུང་རབ་ནི་སྟོན་པའི་སྐྱེས་རབས་དང་། ཟབ་མོ་ནང་དོན་གྱི་རྩ་འགྲེལ་སོགས་པོ་ཏི་ཀ་ཁ་གཉིས་དང་། བྲིས་མ་པོད་གཅིག་བཅས་ངེད་དཔེ་མཛོད་ཁང་དུ་པོད་གསུམ་བཞུགས་སོ། །

ཡོངས་ཁུངས[རྩོམ་སྒྲིག]

https://web.archive.org/web/20140803150502/http://tb.tibet.cn/2010rw/gshf/201402/t20140228_1976460.htm