ཀམ་ཀམ་བསོད་ནམས་རིན་ཆེན

ཀམ་ཀམ་བསོད་ནམས་རིན་ཆེན ཁོང་ནི་རབ་བྱུང་བཞི་པའི་ཤིང་ཕོ་ཁྱི་ལོ་སྟེ་སྤྱི་ལོ1214ལོར་སྐུ་འཁྲུངས། རབ་བྱུང་ལྔ་པའི་མེ་ཕོ་ཁྱི་ལོ་སྟེ་སྤྱི་ལོ1286ལོར་སྐུ་ གཤེགས། ཁོང་དགུང་ལོ་བཅུ་དགུ་པར་རྣལ་འབྱོར་བྱང་སེང་ལས་རབ་བྱུང་བསྙེན་རྫོགས་ཀྱི་སྡོམ་པ་མནོས་ཏེ་མཚན་ལ་བསོད་ནམས་རིན་ཆེན་དུ་གསོལ། དེ་ནས་ཞིག་པོ་འདུལ་གྲྭ་བ་རིན་ཆེན་འབྱུང་གནས་དང་ཟེམ་ཚེ་རིང་མོ་པ་གཉིས་ལ་སོགས་པའི་དགེ་བའི་བཤེས་གཉེན་རྣམས་ལ་བསྟེན་ཏེ་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད་དེ་མཁས་པའི་དབང་པོར་གྱུར། དགུང་ལོ་བཞི་བཅུ་རྩ་གཅིག་པ་རབ་བྱུང་བཞི་པའི་ཤིང་ཕོ་སྟག་ལོ་སྟེ་སྤྱི་ལོ1254ལོར་ཀམ་ཀམ་གྱི་གདན་སར་ཕེབས་ཤིང་ལོ་ངོ་སུམ་ཅུ་སོ་བཞིའི་རིང་དུ་གདན་ས་བསྐྱངས་ཤིང་བསྟན་འཛིན་གྱི་སྐྱེས་བུ་མང་དུ་གསོ་སྐྱོང་མཛད། དེ་ནས་བསྟན་འགྲོའི་དོན་ཆེན་ལེགས་པར་གྲུབ་སྟེ་དགུང་ལོ་བདུན་ཅུ་དོན་གསུམ་པར་དགོངས་པ་ཆོས་དབྱིངས་སུ་གཤེགས། ཁོང་ནི་ཀམ་ཀམ་གྱི་གདན་རབས་ལྔ་པ་ཡིན་ནོ། །