ཀ་མ་པ་ཤེས་རབ་འོད

ཀ་མ་པ་ཤེས་རབ་འོད ཁོང་ནི་རབ་བྱུང་དང་པོའི་མེ་མོ་བྱ་ལོ་སྟེ་སྤྱི་ལོ1057ལོར་ཡུལ་ལན་པ་མདའ་ལ་སྐུ་འཁྲུངས། རབ་བྱུང་གཉིས་པའི་ལྕགས་མོ་ཕག་ལོ་སྟེ1131ལོར་སྐུ་གཤེགས། ཁོང་གིས་སྤྱིར་དགེ་བའི་བཤེས་གཉེན་མང་པོ་ལ་བསྟེན་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད། རབ་ཏུ་བྱུང་བའི་མཚན་ལ་ཤེས་རབ་འོད་ཅེས་གསོལ། དེ་ནས་དགོན་པ་བ་འཛེང་དབང་ཕྱུག་རྒྱལ་མཚན་དང་མཇལ་ཞིང་ལྟོ་གོས་ཆོས་གསུམ་གྱིས་ལེགས་པར་བསྐྱངས། སྒྲུབ་པ་ཉམས་ལེན་མཛད་པས་མངོན་པར་རྟོགས་པའི་ཡོན་ཏན་ཡང་ཚད་མེད་པ་དང་ལྡན་པ་ཡིན། དུས་ཕྱིས་སུ་ཁོང་གིས་ཀམ་དགོན་པ་གསར་འདེབས་མཛད་ཅིང་གྲྭ་པ་བདུན་བརྒྱ་ཙམ་ནས་དེའི་ཚོགས་པ་ཡུན་རིང་དུ་བསྐྱངས། ཁོང་ལ་ཕྱི་རོལ་གྱི་དངོས་པོ་ངན་པ་རྣམས་བཟང་པོར་བསྒྱུར་ནུས་པའི་ཏིང་ངེ་འཛིན་བརྟན་པོ་ཡང་མངའ། དེ་ནས་བསྟན་འགྲོའི་དོན་ཆེན་ལེགས་པར་གྲུབ་སྟེ་དགུང་ལོ་བདུན་ཅུ་རྩ་ལྔ་པར་དགོངས་པ་ཆོས་དབྱིངས་སུ་གཤེགས། ཁོང་ནི་དགོན་པ་བའི་བུ་ཆེན་བཞིའི་ཡ་གྱལ་ཞིག་ཡིན་ནོ།།